ބަނގުލަދޭޝްގެ ކުރީގެ ބޮޑުވަޒީރުގެ ޖަނާޒާއަށް ވަޑައިގަންނަވާ ރައީސްގެ ޚާއްޞަ މަންދޫބަކީ ވަޒީރު ހައިދަރު

ބަނގުލަދޭޝްގެ ކުރީގެ ބޮޑުވަޒީރު، ބޭގަމް ޚާލިދާ ޒިޔާގެ ޖަނާޒާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ  ޚާއްޞަ މަންދޫބެއްގެ ގޮތުގައި ބައިވެރިވެވަޑައިގަންނަވާނީ، މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވަޒީރު ޑރ. ޢަލީ ޙައިދަރު އަޙްމަދު ކަމުގައި ރައީސުލްޖުމްހޫރިއްޔާގެ އޮފީހުން ހާމަކޮށްފިއެވެ.

ބަނގުލަދޭޝްގެ ފުރަތަމަ އަންހެން ބޮޑުވަޒީރު، ޚާލިދާ ޒިޔާ އަންގާރަ ދުވަހު އަވަހާރަވުމާ ގުޅިގެން، ރައީސުލްޖުމްހޫރިއްޔާ ވަނީ ބަނގުލަދޭޝްގެ ސަރުކާރާއި އެ ޤައުމުގެ ރައްޔިތުންނަށް ތަޢުޒިޔާ ވިދާޅުވެ، ސޯޝަލް މީޑިއާގައި މެސެޖެއް ވެސް ޙިއްޞާ ކުރައްވާފައެވެ.

Minister of Higher Education, Labour and Skills Development to attend state funeral of former Bangladeshi Prime Minister as President’s Special Envoy
https://t.co/KiNseLFB10 pic.twitter.com/7kjzafztCF

— The President's Office (@presidencymv) December 30, 2025

ރައީސުލްޖުމްހޫރިއްޔާގެ ޚާއްޞަ މަންދޫބެއްގެ ގޮތުގައި، ވަޒީރު ޙައިދަރު ބަނގްލަދޭޝްއަށް ކުރައްވާ މި ދަތުރުފުޅުގައި އެ ޤައުމުގެ ވަގުތީ ސަރުކާރުގެ ޗީފް އެޑްވައިޒަރ، ޑރ. މުޙައްމަދު ޔޫނުސާއި، ބޭގަމް ޚާލިދާ ޒިޔާގެ ޢާއިލާގެ މެމްބަރުންނާއި ބައްދަލުކުރައްވައި، ރައީސުލްޖުމްޖުމްހޫރިއްޔާ އަދި ދިވެހި ސަރުކާރާއި ރައްޔިތުންގެ ފަރާތުން ތަޢުޒިޔާ ދެންނެވުމަށް ވަނީ ހަމަޖެހިފައެވެ.

 ޚާލިދާ މިދިޔަ މަހު ހޮސްޕިޓަލުގައި އެޑްމިޓުކުރީ ފުއްޕާމޭގެ އިންފެކްޝަނެއް އުފެދިގެންނެވެ. ނަމަވެސް ޚާލިދާއަށް ވަނީ ހިތުގެ މައްސަލަތަކާއި، ކިޑްނީގެ މައްސަލަތަކާއި، ހަކުރު ބައްޔާއި ފުއްޕާމޭގެ މައްސަލަތަކާއި، އާތުރައިޓިސް އަދި ލޮލުގެ މައްސަލަތައް ވެސް ކުރިމަތިވެފައިކަމަށް ރިޕޯޓުތައް ބުނެއެވެ.