އިޒްރާއިލް ޕާސްޕޯޓު މަނާކުރުމުގެ ބިލް އެމްޑީޕީ އިން މަޖިލީހަށް ހުށައެޅީ ސަރުކާރުގެ އަގުވައްޓާލަން!

އިޒްރާއިލް ޕާސްޕޯޓު މަނާކުރުމުގެ ބިލް އެމްޑީޕީ އިން މަޖިލީހަށް ހުށައެޅުމުގެ ބޭނުމަކީ ރައްޔިތުންގެ ކުރިމަތީގައި ސަރުކާރުގެ އަގުވައްޓާލުމަށް ކަމަށް ސަރުކާރު ކޯލިޝަންގައި ހިމެނޭ އެމްއެންޕީގެ ލީޑަރު އަދި މަޖިލީހުގެ މާފަންނު އުތުރު ދާއިރާގެ މެންބަރު މުޙައްމަދު ނާޒިމް ވިދާޅުވެއްޖެއެވެ.

މެމްބަރު ނާޒިމް މިހެން ވިދާޅުވީ މިއަދު ކުރިއަށްދިޔަ މަޖލީހުގެ 241 ކޮމިޓީގައި ވާހަކަފުޅު ދައްކަވަމުންނެވެ.

އިޒްރާއީލްގެ ޕާސްޕޯޓުގައި ރާއްޖެ އެތެރެވުން މަނާކުރަން މަޖިލިހަށް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއިލް އަޙްމަދު ނަސީމެވެ. އެޢީ ޖޫން މަހުގެ 29 ވަަނަ ދުވަހުއެވެ. މީކާއިލް ހުށަހެޅުއްވި ބިލު ބަލައިގަނެ މަޖިލިހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ވަނީ ފޮނުވައިފައިވަނީ މިދިޔަ ޖޫން މަހުގެ 10 ވަނަ ދުވަހުއެވެ.

މިއަދު 241 ކޮމެޓީގައި އިޒްރާއިލް ޕާސްޕޯޓު މަނާކުރުމުގެ މައްސަލާގައި ވާހަކަދައްކަަވަމުން ނާޒިމް ވިދާޅުވީ މިއީ ވަރަށް ހައްްސާސް މައްސަލައަކަށްވާއިރު، މި ކޮމިޓީގައި ހަމަ ތިބެލާފައި މަދު މެންބަރުން ކޮޅެއް ގޮތެއް ނިންމުމަކީ ރަނގަޅު ގޮތެއް ނޫން ކަމަށެވެ. އަދި މިކަމާ ބެހޭ ގޮތުން ގިނަފަރާތްތަކާ މަޝްވަރާކޮށް ދެކޭ ގޮތް ބަލަން ޖެހޭ ކަމަށް އޭނާ ވިދާޅުވިއެވެ.

އޭގެ ތެރޭގައި ސިޔާސީ ޕާޓީތަކާއި، ޓޫރިޒަމް ދާއިރާގެ ފަރާތްތަކާއި ޖަމިއްޔާތަކާއި އަދި އެހެނިހެންވެސް ކަމުވޮށިގެންވާ ހުރިހާ ފަރާތްތަކަކާއި މަޝްވަރާ ކުރަން ޖެހޭ ކަަމަށް ޤަބޫލުފުޅު ކުރައްވާ ކަމަށް މެމްބަރު ނާޒިމް ވިދާޅުވިއެވެ.

އޭނާ ވިދާޅުވީ، އިޤްތިސާދީ ގޮތުން އުނދަގޫ ދަނޑިވަޅެއްގައި އަނެއްކާވެސް އިތުރު ކަމެއް ކުރުމަކީ ވިސްނާން ޖެހޭ ކަމެއް ކަަމަށެވެ.

"އަޅުގަނޑުވެސް ގަބޫލު ކުރާ ގޮތުގައި އިޒްރާއީލުން ފަލަސްޠީނަށް ދެމުންގެންދާ ނޭއްގާނީ އމަލުތަކަކީ ބަލައިގަނެވޭނެ ކަމެއް ނޫން، ހާއްސަ ގޮތެއްގައި އިސްރާއިލުން ހިންގަމުންދާ ޖަރީމާތަކަކީ އަޅުގަނޑުމެން ބަލައިގަންނަ ކަމެއް ނޫން، އެކަން ހަރުކަށި އިބާރާތުން އަޅުގަނޑުގެ ޕާޓީގެ ފަރާތުންނާއި، އަޅުގަނޑުގެ އަމިއްލަ ނަމުގައި އަދި ދާއިރާގެ ނަމުގައި ކުށްވެރިކަން، އެ ޖަރީމާތައް ވަގުތުން ވަގުތަށް ހުއްޓާލަން ގޮވާލަން” މެމްބަރު ނާޒިމް ވިދާޅުވިއެވެ. 

އަދި އޭނާ ވަނީ މިކަމާއި ގުޅޭގޮތުން ރައީސް ޑރ. މުހައްމަދު މުއިއްޒު ކުރައްވަމުން ގެންދަވާ މަސައްކަތްތައް ފާހަގަކޮށް ޝުކުރު ދަންނަވައިފައެވެ.

ނާޒިމް ވިދާޅުވީ މިކަމަކީ ސިޔާސީ ނުފޫޒެއްގެ ތެރެއިން ބަޔަކު ސިޔާސީ ފަރާތްތަކުގެ މައްޗަށް ނުފޫޒު ހިންގުމަށްޓަކައި، ޚާއްސަކޮށް ސަރުކާރަށް ނުފޫޒު ހިންގުމަށްޓަކައި، ސަރުކާރު ރައްޔިތުންގެ ކުރިމަތީގައި ނިކަމެތި ކުރުމަށްޓަކައި ހުށަހެޅިފައި އޮތް އެއްޗެއް ކަމަށް ޤަބޫލުކުރައްވާ ކަމަށެވެ. 

ނާޒިމް ވިދާޅުވީ މިދިޔަ ސަރުކާރުގައިވެސް މިކަން ހުށަހެޅި ކަަމަށާއި، އެހެން ނަމަވެސް މިދިޔަ ސަރުކާރު ނިމިގެން ދިޔައިރުވެސް އެކަން ނުކޮށް މި ސަރުކާރުގެ ބުރައެއްގެ ގޮތަށް މިކަން ވައްޓާލައި މިކަން ހުށައަޅައިފައިވަނީ ސަރުކާރު ބަދުނާމު ކުރުމަށް ކަމަށެވެ.

ނާޒިމްގެ ވާހަކައިގައި ވިދާޅުވީ އެމްޑީޕީއިން ހުށައެޅި މި ބިލްގެ ނިޔަތް ސާފް ނުވާކަމަށެެވެ. އަދި މިކަމުން ކުރާނެ އަސަރުވެސް ދެނެގަންނަން ޖެހޭ ކަމަށާއި، އެހެންކަމުން އޭނާ ހުށަހަޅަނީ ގިނަ ބަޔަކާއި މަޝްވަރާ ކުރެވިގެން މިކަމާއި މެދު ގޮތެއް ނިންމުމަށް ކަމަށެވެ.