ތުޅާދޫ ހޮސްޕިޓަލުގެ މަސައްކަތް މި އަހަރުގެ ނިޔަލަށް ނިންމުމަށް ދަނީ މަސައްކަތް ކުރަމުން: އެމްޓީސީސީ

ބ. ތުޅާދޫ ހޮސްޕިޓަލުގެ މަސައްކަތް މި އަހަރުގެ ނިޔަލަށް ނިންމުމަށް މަސައްކަތް ކުރަމުންދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ހާމަކޮށްފިއެވެ.

ތުޅާދޫ ހޮސްޕިޓަލްގެ މަސައްކަތަކީ 2023 ވަނަ އަހަރުގެ ޖުލައި މަހުގެ 24 ވަނަ ދުވަހު، 1 އަހަރާއި 6 މަސް ދުވަހުގެ ތެރޭގައި ނިންމުމަށް ފެށި މަސައްކަތެކެވެ. ނަމަވެސް އެކި ސަބަބުތަކާހުރެ އެ މަސައްކަތް ނިންމަން އެއްބަސްވި ތާރީޙަށް ނިންމިފައެއް ނުވެއެވެ.

އެމްޓީސީސީއިން ހާމަކޮށްފައިވާ ގޮތުގައި، މި މަޝްރޫޢުގެ ދަށުން މިހާރު ކުރިޔަށްދަނީ ރާނާ ސިމެންތި ޖެހުމުގެ މަސައްކަތެވެ. 

30  އެނދުގެ ހޮސްޕިޓަލެއްގެ ގޮތުގައި ތަރައްޤީކުރާ ތުޅާދޫ ހޮސްޕިޓަލުގެ މަސައްކަތް އެމްޓީސީސީއާ ހަވާލުކޮށްފައި ވަނީ 124 މިލިއަން ރުފިޔާއަށެވެ. މި މަޝްރޫޢުގެ ދަށުން ހޮސްޕިޓަލުގައި އެކޮމޮޑޭޝަން ބްލޮކެއް ތަރައްޤީ ކުރުމަށްވެސްވަނީ ހަމަޖެހިފައެވެ.

ޞިއްޙީ ޚިދުމަތް ހޯދުމަށް މިހާރު ތުޅާދޫ ރައްޔިތުން ގިނަ ފަހަރަށް ދާންޖެހެނީ އޭދަފުއްޓަށް ނުވަތަ މާލެއަށެވެ. އެހެންކަމުން ތުޅާދޫ ހޮސްޕިޓަލު ތަރައްޤީވެގެން ދިޔުމުން ބޭސްފަރުވާއަށް ރަށުން ބޭރަށް ދިޔުމަށް އުފުލި ތަކުލީފުތަކާއި އަދި ކުރި ބޮޑު ހޭދަ ނިމުމަކަށް އަންނާނެއެވެ.