މި އަހަރު ގްރޭޑު އެކަކަށް ވަތް ކުދިންގެ ތިންބައިކުޅަ އެއްބަޔް ވުރެ ގިނަ ކުދިން ދާނީ މާލޭގެ ސްކޫލްތަކަށް

ދުވަހެއްދުވަހަކަށް މާލޭ ސަރަޙައްދުގެ އާބާދީ އިތުރުވަމުން އަންނައިރު، މި އަހަރު ގުރޭޑު އެކަކަށް ވަތް ކުދިންގެ ތިންބައިކުޅަ އެއްބަޔަށް ވުރެ ގިނަ ކުދިން ދާނީ މާލޭގެ ސްކޫލްތަކަށްކަން، ތަޢުލީމީ ވުޒާރާގެ ތަފާސްހިސާބުތަކުން ހާމަވެއްޖެއެވެ.

ތަޢުލީމީ ވުޒާރާއިން ހާމަކުރި ތަފާސްހިސާބުތަކަށް ބަލާއިރު، ގްރޭޓާ މާލޭ އޭރިއާގެ ސްކޫލްތަކަށް ވަނުމަށް 20 ޖެނުއަރީ 2026ގެ ނިޔަލަށް 1،748 ދަރިވަރަކު ވަނީ ރަޖިސްޓްރީވެފައެވެ. އަދި މާލޭ ސަރަޙައްދު ފިޔަވާ ދެން ހުރި ހުރިހާ ސްކޫލެއް އެއްކޮށްލުމުން އެ ސްކޫލްތަކަށް ގްރޭޑު އެކަކަށް ކިޔަވަން ދާނީ 3،042 ދަރިވަރުންނެވެ. މި އަދަދުތަކަށް ބަލާއިރު، ގްރޭޑު އެކަކަށް ވަންނަ ކުދިންގެ %36.49 ކުދިން ދާނީ މާލޭގެ ސްކޫލްތަކަށެވެ.

މިކަމުގެ އެންމެ ބޮޑު ސަބަބެއް ކަމުގައި ބެލެވެނީ، ރާއްޖޭގެ އާބާދީގެ ޒުވާނުންގެ ބޮޑު ނިސްބަތެއް މާލޭ ސަރަޙައްދުގައި މިހާރު ދިރިއުޅެމުން ދިއުމެވެ. މިއީ ގުރޭޑު އެކަކަށް ވަންނަ ކުދިންގެ ޖުމްލަ އަދަދު އިތުރުވެގެން އައި ބަދަލެއް ނޫންކަން ޔަޤީންވެއެވެ.

ކަން މިހެން އޮތްއިރު، އަތޮޅުތެރޭގެ ސްކޫލުތަކުން މާލޭގެ ސްކޫލްތަކަށް ބަދަލުވި ކުދިންގެ އަދަދު ވެސް އިތުރެވެ. އެގޮތުން ޖުމްލަ 1،530 ދަރިވަރުން ވަނީ މާލޭ ސްކޫލްތަކަށް ބަދަލުވެފައެވެ. 

އަދި މާލޭގެ ކާރުބާރު ބޮޑުކަމުންނާއި، ހުޅުމާލެއިން ބޯހިޔާވަހިކަން ހަމަޖެހުމާއި އަދި މިނޫން ވެސް ސަބަބުތަކާހެދި، މާލޭ ސްކޫލްތަކުން ހުޅުމާލޭގެ ސްކޫލްތަކަށް ބަދަލުވެފައިވާ ދަރިވަރުންގެ އަދަދުވެސް އިތުރެވެ. އެގޮތުން 20 ޖެނުއަރީ 2026ގެ ނިޔަލަށް 836 ދަރިވަރަކު ވަނީ މާލޭގެ ސްކޫލުތަކުން ހުޅުމާލޭގެ ސްކޫލްތަކަށް ބަދަލުވެފައެވެ.

Public School Grade 1 Enrolment and Student Migration for 2026 (status as of 20 January 2026). pic.twitter.com/39pAxYYekF

— Ministry of Education (@MoEdumv) January 21, 2026

އާ އަހަރުގެ ކިޔެވުން މިއަދު ފެށިއިރު، އެންމެ ބޮޑު ސްކޫލެއްގެ ގޮތުގައި އަލަށް ހުޅުވީ، ހުޅުމާލޭ ދެ ވަނަ ފިޔަވަހީގައި ގާއިމްކޮށްފައިވާ ޝަހީދު އަލީ ސްކޫލެވެ. އެ ސްކޫލުގައި މި އަހަރު 1،900އަށް ވުރެ ގިނަ ދަރިވަރުން ކިޔަވާނެ އެވެ.

ތަޢުލީމީ ވުޒާރާއިން ހާމަކޮށްފައިވާ ގޮތުގައި، ދިރާސީ އަހަރު މިއަދު ފެށުނުއިރު ދަރިވަރުންނަށް ބޭނުންވާ ހުރިހާ ފޮތްތަކެއް ވަނީ ސްކޫލްތަކަށް ފޮނުވާ ނިމިފައެވެ.