ޒުވާނުން ސޯޝަލް މީޑިއާއަށް ދެވިހިފާ މައްސަލައިގައި މެޓަ، ޓިކްޓޮކް އަދި ޔޫޓިއުބާ ދެކޮޅަށް ބޮޑު ޝަރީއަތެއް ފަށަނީ

ޓެކްނޮލޮޖީގެ ދާއިރާގައި ނުފޫޒުގަދަ މެޓަ، ޓިކްޓޮކް އަދި ޔޫޓިއުބް ފަދަ ކުންފުނިތަކުގެ ޕްލެޓްފޯމްތަކުގެ ސަބަބުން ޒުވާނުންގެ ނަފްސާނީ ދުޅަހެޔޮކަމަށް ނޭދެވޭ އަސަރުކުރާ ކަމަށް ބުނެ އުފުލާފައިވާ ދައުވާތަކުގެ ތާރީޚީ ޝަރީއަތެއް ފެށުމަށް ތައްޔާރުވެއްޖެއެވެ.

މިއީ މިފަދަ މައްސަލައެއްގައި މި ކުންފުނިތަކުން ޖޫރީއެއްގެ ކުރިމަތީގައި ޖަވާބުދާރީވާންޖެހޭ ފުރަތަމަ ފަހަރެވެ.

ކެލިފޯނިއާގެ ސުޕީރިއާ ކޯޓުގައި އަންގާރަ ދުވަހު ފެށުމަށް ހަމަޖެހިފައިވާ މި ޝަރީއަތަކީ، ސޯޝަލް މީޑިއާގެ ސަބަބުން ލިބޭ ގެއްލުންތަކުގެ ބަދަލު ހޯދުމަށް ހުށަހަޅާފައިވާ އެތައް ހާސް މައްސަލައެއްގެ ނަތީޖާ ބިނާވާނެ މުހިންމު ޓެސްޓް ކޭހެކެވެ. މި މައްސަލައިގައި ހިމެނޭ ހަތަރުވަނަ ކުންފުނި ކަމަށްވާ ސްނެޕްޗެޓްގެ ބެލެނިވެރި ކުންފުނި ސްނެޕް އިން ވަނީ މިދިޔަ ހަފްތާގައި ކޯޓުން ބޭރުގައި މައްސަލަ ހައްލުކޮށްފައެވެ.

މި މައްސަލަ ހުށަހަޅާފައިވަނީ ކެލިފޯނިއާގެ އުމުރުން 19 އަހަރުގެ އަންހެނެކެވެ. އޭނާ ތުހުމަތުކުރާ ގޮތުގައި މި އެޕްލިކޭޝަންތައް ފަރުމާކޮށްފައިވަނީ ކުޑަކުދިން އޭގެއަށް ދެވިހިފާނެ ގޮތަށެވެ. "ސްލޮޓް މެޝިންތަކާއި ސިނގިރޭޓް އިންޑަސްޓްރީން ބޭނުންކުރާ ފަދަ އުކުޅުތައް ބޭނުންކޮށްގެން، އިޝްތިހާރުން ލިބޭ އާމްދަނީ އިތުރުކުރުމަށްޓަކައި ކުދިން ގިނަވަގުތު އެޕްތަކުގައި ބޭތިއްބުމަށް މި ކުންފުނިތަކުން ވަނީ ގަސްދުގައި މަސައްކަތްކޮށްފައި،" ދައުވާގައި ބުނެފައިވެއެވެ.

މި ޝަރީއަތް ހަފްތާއަކުން އަށް ހަފްތާއަށް ދެމިގެންދާނެ ކަމަށް ބެލެވޭއިރު، މެޓަގެ ސީއީއޯ މާކް ޒަކަބާގް ހިމެނޭހެން ކުންފުނިތަކުގެ އިސްވެރިން ހެކިބަސް ދިނުމަށް ވަނީ ހަމަޖެހިފައެވެ. ދައުވާކުރާ ފަރާތުން ބުނާ ގޮތުގައި މި އެޕްތަކުގެ ސަބަބުން އޭނާ ޑިޕްރެޝަނަށް ގޮސް، އަމިއްލައަށް މަރުވުމުގެ ޚިޔާލުތައް އުފެދުމަށް މަގުފަހިވިއެވެ.

ޓެކް ކުންފުނިތަކުން މި ތުހުމަތުތައް ދޮގުކުރެއެވެ. އެ ކުންފުނިތަކުން ބުނާ ގޮތުގައި ކުޑަކުދިންގެ ރައްކާތެރިކަމަށްޓަކައި ގިނަ ފިޔަވަޅުތަކެއް ވަނީ އަޅާފައެވެ. އަދި އެހެން ފަރާތްތަކުން ޕްލެޓްފޯމްގައި ޝާއިއުކުރާ ކޮންޓެންޓަކަށް ކުންފުނިތަކުން ޒިންމާވާން ނުޖެހޭނެ ކަމަށް ވަނީ ބުނެފައެވެ. މެޓަ އާއި ޓިކްޓޮކުން ވަނީ ބެލެނިވެރިން ހޭލުންތެރިކުރުމަށާއި ސްކްރީން ޓައިމް ކޮންޓްރޯލް ކުރުމަށް ތަފާތު ޕްރޮގްރާމްތައް ހިންގާފައިވާކަން ފާހަގަކޮށްފައެވެ.

ނަމަވެސް 'މަދާސް އެގެއިންސްޓް މީޑިއާ އެޑިކްޝަން' ގެ ބާނީ ޖޫލީ ސެލްފޯ ބުނި ގޮތުގައި، މި ކުންފުނިތަކުން ދަނީ ނުފޫޒު ފޯރުވުމަށް ހުރިހާ ވަސީލަތެއް ބޭނުންކުރަމުންނެވެ. މި ޝަރީއަތަކީ ސޯޝަލް މީޑިއާ ކުންފުނިތަކުގެ ޒިންމާދާރުކަން ކަނޑައެޅުމުގައި ދުނިޔޭގެ ފެންވަރުގައި ބެލެވޭނެ މުހިންމު މަރުހަލާއެކެވެ.