ކަނޑުއަޑީގައި ބޭނުންކުރާ ޚާއްސަ އިކުއިޕްމަންޓްތަކެއް އުރީދޫއިން އެމްއެންޑީއެފްއަށް ހަދިޔާކޮށްފި

ކަނޑުއަޑީގައި ބޭނުންކުރާ ޚާއްސަ އިކުއިޕްމަންޓްތަކެއް އުރީދޫއިން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އަށް ހަދިޔާކޮށްފިއެވެ.

ރާއްޖޭގެ ކަނޑުގެ ސަލާމަތާއި ރައްކާތެރިކަން ކަށަވަރުކުރުމަށް އެމްއެންޑީއެފްއިން ކުރަމުންދާ މަސައްކަތްތަކަށާއި، ކަނޑުއަޑީގެ އޮޕަރޭޝަންތައް ކުރިއަށްގެންދިއުމަށް އެހީތެރިވުމުގެ ގޮތުން ހަދިޔާކުރި މި އިކުއިޕްމެންޓުތައް އެމްއެންޑީއެފްއާ ހަވާލުކުރީ ބަންޑާރަކޮށީގައި ބޭއްވި ޚާއްޞަ ރަސްމިއްޔާތެއްގައެވެ.

މި ރަސްމިއްޔާތުގައި މި ތަކެތި އެމްޑީއެފްއާ ހަވާލުކޮށްދެއްވީ އުރީދޫ މޯލްޑިވްސްގެ މެނޭޖިންގ ޑައިރެކްޓަރ އަދި ސީއީއޯ، ޚާލިދު އަލް ހަމާދީއެވެ. އެމްއެންޑީއެފްގެ ފަރާތުން މި ތަކެއްޗާ ހަވާލުވެވަޑައިގެންނެވީ ދިފާޢީ ވަޒީރު، މުޙައްމަދު ޣައްސާން މައުމޫނެވެ.

އެމްއެންޑީއެފްއިން ހާމަކޮށްފައިވާ ގޮތުގައި މި ތަކެއްޗަކީ ކަނޑުއަޑީގައި މުއާމަލާތްކުރުމަށާއި، ޑައިވަރުންގެ ސަލާމަތާއި ރައްކާތެރިކަމުގެ އިތުރުން އޮޕަރޭޝަންތަކުގެ ފެންވަރު ރަނގަޅު ކުރުމަށް ފަރުމާކޮށްފައިވާ ތަކެއްޗެވެ. އަދި މީގެ ސަބަބުން އެމްއެންޑީއެފް ކޯސްޓްގާޑުން ރާއްޖޭގެ ކަނޑުގެ ސަރަހައްދުގައި ހިންގާ ސަލާމަތީ އަދި މީހުން ސަލާމަތްކުރުމުގެ އޮޕަރޭޝަންތަކަށް ބޮޑު އެހީތެރިކަމެއް ލިބިގެންދާނެ ކަމަށްވެސް ވިދާޅުވިއެވެ. އެހެންކަމުން، މި ތަކެއްޗާއެކު އެމްއެންޑީއެފްގެ ކޯސްޓްގާޑުގެ އޮޕަރޭޝަންތަކަށް ފަސޭހަތަކެއް ލިބިގެންދާނެކަމަށް އެމްއެންޑީއެފްއިން ހާމަކުރެއެވެ.

އުރީދޫއިން އެމްއެންޑީއެފްއަށް ހަދިޔާކުރި ތަކެތި:

• 1 އޯޝަން ރީފް އެމް
• 105 ޑިޖިޓަލް ޑުއަލް ޗެނަލް ކޮމިއުނިކޭޝަން އިކުއިޕްމަންޓް 
• 1 ލޫބެލް ލެބް އަންޑަރ ވޯޓަރ ލައުޑްސްޕީކަރ 
• 3 އޯޝަން ރީފް ފުލް ފޭސް
• ފޭސް 2 ޑައިވިންގ މާސްކު
  

މި ރަސްމިއްޔާތުގައި ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީ ވަނީ އުރީދޫ މޯލްޑިވްސްއިން ދެއްވި ދީލަތި އެހީއަށްޓަކައި ޝުކުރު ދަންނަވައި، ރާއްޖެފަދަ ކަނޑުގެ މާހައުލަށް ބިނާވެފައިވާ ގައުމެއްގައި، ކޯސްޓްގާޑުގެ ސާޗް އެންޑް ރެސްކިއު އަދި ކަނޑުއަޑީގެ އޮޕަރޭޝަންތައް ވަރުގަދަކުރުމަށް މިއިކުއިޕްމަންޓްތަކަކީ ނުހަނު ބޭނުންތެރި ތަކެތިކަން ފާހަގަކުރެއްވިއެވެ.

އުރީދޫ މޯލްޑިވްސްގެ ސީއީއޯ ޚާލިދު އަލް ހަމާދީ ވިދާޅުވީ، ރާއްޖޭގެ ކަނޑަކީ ރައްޔިތުންގެ ދިރިއުޅުމުގެ މުހިންމު ބައެއްކަމަށާއި އެމްއެންޑީއެފުން ކުރާ ބުރަ މަސައްކަތަކީ ގައުމީ ސަލާމަތަށް ނުހަނު މުހިންމު މަސައްކަތެއްކަމަށެވެ. އެގޮތުން ޑައިވަރުންގެ ސަލާމަތާއި ކަނޑުއަޑީގެ އޮޕަރޭޝަންތަކަށް އެހީތެރިވުމަށް މިތަކެތި ހަދިޔާކުރެވުމަކީ އުރީދޫން ފަޚުރުވެރިވާ ކަމެއް ކަމަށްވެސް ވިދާޅުވިއެވެ. އަދި އުރީދޫގެ އަމާޒަކީ މުޖުތަމަޢުއަށް ފައިދާހުރި، ދެމެހެއްޓެނިވި އެހީތެރިކަން ފޯރުކޮށްދިނުންކަންވެސް ފާހަގަކުރައްވިއެވެ.