ކެންޑިޑޭޓުންގެ ކުށުގެ ރެކޯޑް ސާފުކުރުމުގެ މަސައްކަތް ޑީޖޭއޭ އިން އަވަސްކޮށްފި، އިތުރު ގަޑީގައި ވެސް ދަނީ މަސައްކަތް ކުރަމުން

ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލާ ކެންޑިޑޭޓުންގެ ކުށުގެ ރެކޯޑް ސާފުކުރުން ލަސްވާތީ ، އެ މަސައްކަތް ނިންމުމަށް އިތުރު ގަޑީގައި ވެސް މަސައްކަތް ކުރަމުންދާ ކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.

މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ކެމްޕެއިން މެނޭޖަރު އަބްދުﷲ ވަހީދު ވަނީ، ކުށުގެ ރެކޯޑް ސާފުކުރުމުގައި ޑީޖޭއޭ އާއި ކަރެކްޝަނަލް ސާވިސް އިން އިންތިހާއަށް ލަސްވަމުންދާ ކަމަށް ވިދާޅުވެފައެވެ. އޭނާ ފާހަގަކުރެއްވި ގޮތުގައި އެ މުއައްސަސާތައް އޮތީ އިންތިހާބަށް އެކަށީގެންވާ ވަރަށް ތައްޔާރުވެފައެއް ނޫނެވެ.

މިކަމާ ގުޅޭގޮތުން ޗީފް ޖުޑީޝަލް އެޑްމިނިސްޓްރޭޓާ އަމްޖަދު މުސްތަފާ ވިދާޅުވީ، ރެކޯޑް ސާފުކުރުން ލަސްވަނީ ހުރިހާ ރަށެއްގެ ކޯޓުތަކަށް ފޮނުވައިގެން ވަކިވަކިން މެނުއަލްކޮށް އެ މަސައްކަތް ކުރަންޖެހޭތީ ކަމަށެވެ. ނަމަވެސް، މިހާރު ސާފުނުކުރެވި ހުރީ ގާތްގަނޑަކަށް 400 ވަރަކަށް ކެންޑިޑޭޓުންގެ ރެކޯޑް ކަމަށާއި، ކެންޑިޑެސީ ހުށަހެޅުމުގެ މުއްދަތު ހަމަވުމުގެ ކުރިން އެ ހުރިހާ ރެކޯޑެއް ސާފުކޮށް ނިންމުމަށް މުވައްޒަފުން ހުކުރު، ހޮނިހިރު އަދި ކޮންމެ ދުވަހެއްގެ ރޭގަނޑު ވެސް މަސައްކަތް ކުރަމުންދާ ކަމަށް އޭނާ ވިދާޅުވިއެވެ.

އަމްޖަދު އިތުރަށް ވިދާޅުވީ، ކުރިއަށް އޮތް ތަނުގައި މި ނިޒާމު އޮޓަމޭޓް ކުރުމުގެ މަސައްކަތް ޑީޖޭއޭ އިން ކުރަމުންދާ ކަމަށެވެ. އެގޮތުން ރަށްރަށުގެ ކޯޓުތަކުން ޕޯޓަލަށް މަޢުލޫމާތު އަޕްޑޭޓްކޮށް ނިމުމުން، ކުށުގެ ރެކޯޑް ވަގުތުން ބެލޭނެ އިންތިޒާމު ހަމަޖެހިގެންދާނެ ކަމަށް އޭނާ ފާހަގަކުރެއްވިއެވެ. މިހާރު އީފާސް މެދުވެރިކޮށް ޕޯޓަލްއިން ރެކޯޑް ސާފުކުރަން ހުށަހެޅުނު ނަމަވެސް، އެކަމަށް އަދިވެސް 3 އާއި 5 ދުވަހާ ދެމެދުގެ މުއްދަތެއް ހޭދަވެއެވެ.

އެމްޑީޕީގެ ކެމްޕެއިން މެނޭޖަރު ވަހީދު ވިދާޅުވީ، އިންތިހާބަށް ކުރިމަތިލުމަށް ލިބިފައިވާ ކުރު މުއްދަތުގެ ތެރޭގައި ރެކޯޑް ސާފުކުރުމަށް ގިނަ ދުވަސްތަކެއް ހޭދަވުމަކީ ކެންޑިޑޭޓުންނަށް ކުރިމަތިވާ ބޮޑު ގޮންޖެހުމެއް ކަމަށެވެ. އަދި ހަމައެކަނި އޮންލައިންކޮށް ފޯމު ހުށަހަޅަން ޖެހުމަކީ އިންތިހާބީ ހައްގަށް ހުރަސް އެޅޭ ކަމެއް ކަމަށް ވިދާޅުވެ، އިންތިހާބަށް ކުރިމަތިލުމުގެ މުއްދަތު އިތުރު 10 ދުވަހަށް އިތުރުކޮށްދިނުމަށް އެމްޑީޕީން ވަނީ އެދިފައެވެ.

ނަމަވެސް، މުއްދަތު އިތުރުކުރުމާ ގުޅޭގޮތުން އިލެކްޝަންސް ކޮމިޝަނުން މިހާތަނަށް ރަސްމީ ބަހެއް ބުނެފައެއް ނުވެއެވެ.