ޓެކްސީގެ ޚިދުމަތްތައް ރަނގަޅުކޮށް، ފުރުޞަތުތައް ފުޅާކުރުމުގެ މަޤްޞަދުގައި ޓެކްސީ ޤަވާއިދަށް ބޮޑެތި އިޞްލާޙުތަކެއް ގެނެސްފި

މޯބައިލް އެޕްލިކޭޝަންތައް މެދުވެރިކޮށް ޓެކްސީގެ ހިދުމަތްދޭ ޑްރައިވަރުން، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ހާއްސަ ހުއްދައެއް ހޯދުން މަޖުބޫރުވާ ގޮތަށް ޓެކްސީ ގަވާއިދަށް މިއަދު އިސްލާހު ގެނެސްފިއެވެ.

މި އިސްލާހާ ގުޅިގެން ޓްރާންސްޕޯޓް މިނިސްޓްރީން ނެރުނު ނޫސްބަޔާނެއްގައި ބުނީ، މި ބަދަލަކީ ދަތުރުވެރިންގެ ރައްކާތެރިކަން ކަށަވަރުކުރުމަށާއި، ޑިޖިޓަލްކޮށް ހިދުމަތްދޭ ޑްރައިވަރުން ޖަވާބުދާރީ ކުރުވުމަށް ބާރު އެޅުމުގެ ގޮތުން ނިންމި ނިންމުމެއް ކަމަށެވެ. އެހެންކަމުން، މޯބައިލް އެޕް ނުވަތަ އޮންލައިން ޕޯޓަލްތައް މެދުވެރިކޮށް ހިދުމަތްދޭން ބޭނުންވާ ހުރިހާ ޑްރައިވަރުން ދެން މިނިސްޓްރީން ދޫކުރާ ހާއްސަ ހުއްދަ ހޯދަން ޖެހޭނެއެވެ.

ގަވާއިދަށް ގެނައި އިތުރު މުހިންމު ބަދަލުތައް:

• ޓެކްސީ ސެންޓަރުތަކުގެ ޝަރުތަށް ލުޔެއް: ޓެކްސީ ސެންޓަރެއް ރަޖިސްޓްރީ ކުރުމަށް ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް ވަނީ މަދުކޮށްފައެވެ. މިނިސްޓްރީން ބުނީ މީގެ ސަބަބުން އާ ސެންޓަރުތައް އުފެދުމަށް ހުރި ހުރަސްތައް ކުޑަވެ، މާކެޓުގައި ވާދަވެރިކަން އިތުރުވެ ހިދުމަތުގެ ފެންވަރު ރަނގަޅުވާނެ ކަމަށެވެ.
  
• ޑްރައިވަރުންނަށް ދެ ސެންޓަރުގައި މަސައްކަތް ކުރުމުގެ ފުރުސަތު: ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓަރީވެގެން މަސައްކަތް ކުރުމުގެ ހުއްދަ ވަނީ ދީފައެވެ. މިއީ ޑްރައިވަރުންނަށް ލިބޭ އާމްދަނީ އިތުރުކުރުމަށް މަގުފަހިކޮށްދިނުމަށް ގެނައި ބަދަލެކެވެ.
  
• ކުންފުނިތަކުގެ މެންޑޭޓް ކަށަވަރުކުރުން: ކުންފުންޏަކުން ދަތުރުފަތުރުގެ ހިދުމަތްދޭ ނަމަ، އެއީ އެ ކުންފުންޏެއްގެ މެންޑޭޓުގައި ހިމެނޭ ކަމެއްކަން ކަށަވަރުކުރަން ޖެހޭނެއެވެ. އަދި ގަވާއިދާ އެއްގޮތަށް ރަޖިސްޓަރީކޮށް ހުއްދަ ހޯދުން ޓެކްސީ ކުންފުނިތަކަށް މިހާރު ލާޒިމްވާނެއެވެ.

މިނިސްޓްރީން ބުނި ގޮތުގައި މި ހުރިހާ ބަދަލުތަކެއްގެ މައިގަނޑު އަމާޒަކީ ފަސިންޖަރުންނާއި ހިދުމަތްދޭ ފަރާތްތަކަށްވެސް މަންފާ ކުރާނެ، އިތުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ގާއިމުކުރުމެވެ.

މި ބަދަލުތައް ގެނެސްފައި މިވަނީ ސަރުކާރުން އަމިއްލަ ޓެކްސީ ލައިނެއްގެ ހިދުމަތް ފެށުމަށް ތައްޔާރުވަމުންދާ ދަނޑިވަޅެއްގައެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިއަހަރުގެ ކުރީކޮޅު ސަރުކާރުގެ ޓެކްސީ ލައިންގެ ހިދުމަތް ފަށާނެ ކަމަށް ވިދާޅުވެފައެވެ.

ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެފައިވާ ގޮތުގައި، އެންމެ ފުރަތަމަ ހިދުމަތަށް ނެރޭނީ 100 ކާރެވެ. މީގެ ތެރޭގައި ހަނި ގޯޅިތަކަށް ވަދެވޭ ފަދަ ކުދި ޓެކްސީތައްވެސް ހިމެނޭނެއެވެ. ސަރުކާރުން މި ހިދުމަތް ފަށަން ނިންމީ މާލޭގައި 1,500 އެއްހާ ޓެކްސީ އޮތް ނަމަވެސް، އާންމުންނަށް ޓެކްސީ ހޯދުމުގައި ދިމާވާ ދަތިތަކަށް ދާއިމީ ހައްލެއް ހޯދައިދިނުމަށެވެ. މިހާރު މި ހިދުމަތަށް ބޭނުންވާ ޑްރައިވަރުން ހޯދުމުގެ މަސައްކަތް މިނިސްޓްރީން ވަނީ ފަށާފައެވެ.