ގިރާވަރުފަޅުގެ ލޭންޑް ޔޫސް ޕްލޭންއަށް ގެނައި ބަދަލާ ގުޅިގެން އައު ޕްލޮޓްތައް ކަނޑައެޅުން ހޮނިހިރުގައި

ގިރާވަރުފަޅުގެ ލޭންޑް ޔޫސް ޕްލޭންއަށް ގެނައި ބަދަލާ ގުޅިގެން އައު ޕްލޮޓްތައް ކަނޑައެޅުމަށް ބާއްވާ ގުރުއަތުލުން  ހޮނިހިރު ދުވަހަށް ތާވަލުކޮށްފިއެވެ.

އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ނެރުނު ބަޔާނެއްގައި ބުނީ، ގިރާވަރުފަޅުގެ ލޭންޑް ޔޫސް ޕްލޭންގައި 610 ގޮތި މަދުވާތީ، އެ އަދަދު ހިމަނައިގެން ގިރާވަރު ފަޅުން ދޫކުރަންޖެހޭ ޖުމްލަ 4،072 ގޯތި ހިމެނޭހެން، މިދިޔަ ޖުލައި މަހު އައު ލޭންޑް ޔޫސް ޕްލޭނެއް އެކުލަވާލާފައިވާ ކަމަށެވެ. މި ބަދަލާ ގުޅިގެން "ބިންވެރިޔާ" ސްކީމުގެ ދަށުން ގިރާވަރު ފަޅުން ގޯތި ލިބިފައިވާ ފަރާތްތަކަށް ކަނޑައަޅާފައިވާ ބިމުގެ ސަރަޙައްދުތަކަށް ބަދަލު އައިސްފައިވާކަމަށް އެ ވުޒާރާއިން ވަނީ ހާމަކޮށްފައެވެ.

އެހެންކަމުން، ގިރާވަރު ފަޅުން ގޯތި ލިބިފައިވާ ފަރާތްތަކަށް އައު ޕްލޮޓުތައް ކަނޑައެޅުމަށް ބާއްވާ ގުރުއަތުލުން 31 ޖަނަވަރީވާ ހޮނިހިރު ދުވަހުގެ ހެނދުނު 9:30ގައި ސޯޝަލް ސެންޓަރުގެ ހޯލުގައި ބޭއްވުމަށް ހަމަޖެހިފައިވާކަމަށް، ގެދޮރުވެރިކަމާ ބެހޭ ވުޒާރާއިން ވަނީ ހާމަކޮށްފައެވެ.

ގިރާވަރު ފަޅުން ދޫކޮށްފައިވާ 4،072 ގޯތީގައި ހަތަރު ބޮޑު މިނެއްގެ ގޯތި ހިމެނެއެވެ. އެއީ  1،250 އަކަފޫޓުގެ 2،603 ގޯއްޗާއި، 1،650  އަކަފޫޓުގެ 1،214 ގޯއްޗާއި، 2،050  އަކަފޫޓުގެ 254 ގޯތި އަދި
 2،450 އަކަފޫޓުގެ 01 ގޯތި ހިމެނެއެވެ. 

ނޫސްބަޔާން:
އުސޫލު ނަންބަރު 2022/G-19 (ބިންވެރިޔާ ސްކީމްގެ ދަށުން މާލެ ސަރަޙައްދުން ބަންޑަރަ ގޯތި ދޫކުރުމުގެ އުސޫލު) ގެ ދަށުން ގިރާވަރުފަޅުން ދޫކޮށްފައިވާ ގޯތި ލިބިފައިވާ ފަރާތްތަކަށް ލިބޭ ޕްލޮޓް ކަނޑައެޅުމަށްޓަކައި ގުރުއަތުނެގުމާ ގުޅޭ

ގިރާވަރުފަޅުން ގޯތި ލިބޭ ފަރާތްތަކުގެ… pic.twitter.com/Peh3qClYVV

— Ministry of Construction, Housing & Infrastructure (@MoCImv) January 28, 2026

ގެދޮރުވެރިކަމާ ބެހޭ ވުޒާރާއިން ވިދާޅުވީ،  ގުރުއަތުނެގުމަށް ހަމަޖެހިފައިވާ ސަރަޙައްދަށް ވަދެވޭނީ ގޯތި ލިބިފައިވާ ފަރާތްތަކުގެ ތެރެއިން ކޮންމެ ޕްލޮޓަކަށް 1 ފަރާތަށް ކަމަށެވެ. އަދި ގޯތި ލިބޭ ފަރާތްތަކެއްގެ ބަދަލުގައި އެހެން ފަރާތަކުން ޙާޟިރުވާން ބޭނުންވާނަމަ، އެކަން އަންގައިދޭ ލިޔުމާއި ގޯތީގެ ވެރިފަރާތުގެ އައިޑީ ކާޑުގެ ކޮޕީގެ އިތުރުން ބަދަލުގައި ޙާޟިރުވާ ފަރާތުގެ އައިޑީ ކާޑުގެ ކޮޕީއާއެކު ހާޟިރުވުމުން، ގުރުއަތު ނެގުމަށް ހަމަޖެހިފައިވާ ސަރަޙައްދަށް ވަދެވޭނެކަމަށް ވަނީ ހާމަކޮށްފައެވެ.

ގުރުއަތުނެގުން ކުރިއަށްދާއިރު ގޯތި ލިބިފައިވާ ފަރާތަށް ހަމަޖެހިގެންދާ ޕްލޮޓް ހިޔާވެހި ޕޯޓަލްއިން ވަގުތުން ފެންނާނެއެވެ. އަދި އެފަރާތަކަށް ލިބޭ ޕްލޮޓް ނަންބަރު އެސް.އެމް.އެސްގެ ޒަރިއްޔާއިން އެންގުމަށް ވަނީ ހަމަޖެހިފައެވެ. މި ގުރުއަތުލުން ޕީއެސްއެމްއިން ވަގުތުން ދެއްކުމަށް ވެސް ވަނީ ހަމަޖެހިފައެވެ. 

ގެދޮރުވެރިކަމާ ބެހޭ ވުޒާރާއިން ވިދާޅުވީ ގޯތި ލިބޭ ފަރާތްތަކުގެ ގުރުނަގާ ނިމުމުން، ގޯތި ޙަވާލުކުރުމުގެ އެއްބަސްވުމުގެ ސޮއިކުރުމާއި ގޯތީގެ ރަޖިސްޓަރީ ޙަވާލުކުރުމުގެ މަސައްކަތް ކުރިއަށްގެންދާނެ ގޮތުގެ މަޢުލޫމާތު ފަހުން ހިއްސާކުރާނެކަމަށެވެ.