ތ. ވިލުފުށީ ބިން ހިއްކުމުގެ މަޝްރޫޢުގެ 80 އިންސައްތަ މަސައްކަތް ނިމިއްޖެ

ތ. ވިލުފުށީގެ ބިން ހިއްކުމަށް ކުރިއަށްގެންދާ ބޮޑު މަޝްރޫޢުގެ މަސައްކަތް ބާރު ސްޕީޑެއްގައި ކުރިއަށް ގޮސް، މުޅި މަޝްރޫޢުގެ 80 އިންސައްތަ މަސައްކަތް މިހާރު ނިމިފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން ހާމަކޮށްފިއެވެ.

މި މަޝްރޫޢުގެ ދަށުން ޖުމްލަ 81 ހެކްޓަރުގެ ބިން ހިއްކުމަށް ހަމަޖެހިފައިވާއިރު، މިހާތަނަށް 65 ހެކްޓަރުގެ ބިން ވަނީ ހިއްކައި ނިންމާފައެވެ. މި މަސައްކަތް ހަލުވިކަމާއެކު ކުރިއަށް ގެންދިއުމަށްޓަކައި ބޭނުންކުރަމުންދަނީ 11,300 ކިއުބިކް މީޓަރުގެ ކެޕޭސިޓީ ހުންނަ "ފިލިޕޯ ބްރުނެލެސްކީ" ޑްރެޖަރެވެ.

އެމް.އޭ.ސީ.އެލް އިން މަޢުލޫމާތު ދޭ ގޮތުގައި، 14 ނޮވެމްބަރު 2025 ގައި އަމަލީ މަސައްކަތް ފެށި މި މަޝްރޫޢު ކުރިއަށްދަނީ ކަނޑައެޅިފައިވާ ތާވަލާ އެއްގޮތަށެވެ. މި މަޝްރޫޢަކީ ވިލުފުށީގެ ބިމުގެ ދަތިކަން ހައްލުކޮށް، ރަށުގެ ތަރައްޤީއަށް ބޭނުންވާ ޖާގަ އިތުރުކުރުމަށްޓަކައި ސަރުކާރުން އިސްކަންދީގެން ކުރިއަށްގެންދާ މުހިންމު މަސައްކަތެކެވެ.