ޔޫއެންއޯޑީސީގެ ފަރާތުން އެންޑީއޭއަށް ޑްރަގް ޓެސްޓް ކިޓްތަކެއް ހަދިޔާކޮށްފި

ޔޫއެންއޯޑީސީގެ ފަރާތުން ނޭޝަނަލް ޑްރަގް އޭޖެންސީ (އެންޑީއޭ) އަށް ޑްރަގް ޓެސްޓް ކިޓްތަކެއް ހަދިޔާކޮށްފި އެވެ.

މިކަމަށްޓަކައި އެންޑީއޭގައި ބޭއްވި ޚާއްޞަ ރަސްމިއްޔާތުގައި ނޭޝަނަލް ޑްރަގް އޭޖެންސީގެ ފަރާތުން ޑްރަގް ޓެސްޓް ކިޓްތަކާއި ޙަވާލުވެލެއްވީ، އެންޑީއޭގެ އެކްޓިން ސީއީއޯ އަހުމަދު އިބްރާހިމް ދީދީއެވެ. އަދި ޔޫއެންއޯޑީސީ ގެ ފަރާތުން މި ކިޓްތައް ޙަވާލުކޮށްދެއްވީ، ޔުނައިޓެޑް ނޭޝަންސް އޮފިސް އޮން ޑްރަގްސް އެންޑް ކްރައިމް (ޔޫއެންއޯޑީސީ) ގެ ރީޖަން އޮފިސަރ، ކްރިސްޓިއަން ހޯލެގްއެވެ.

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާޅުވީ، ޔޫއެންއޯޑީސީއިން ރާއްޖެއަށް ހަދިޔާކޮށްފައިވާ ޓެސްޓް ކިޓްތަކުގެ ތެރޭގައި 30 ޑްރަގް ޓެސްޓް ކިޓާއި، 30 ޕްރިކާސާރ ކެމިކަލް ކިޓުގެ އިތުރުން، 180 ޕޮކެޓް ކެމިކަލް ޓެސްޓް ކިޓް ހިމެނޭ ކަމަށެވެ. ހަމަ އެހެންމެ، ޓެސްޓް ކިޓްތައް ބޭނުންކުރާނެ ގޮތުގެ ތަމްރީން ވީޑިއޯތައް ހިމެނޭ 5 ޔޫއެސްބީ ޑްރައިވްވެސް މި ތަކެއްޗާއެކު ހަދިޔާ ކޮށްފައިވާކަމަށް އެ ވުޒާރާއިން މަޢުލޫމާތުދެއެވެ.

މީގެ އިތުރުން، މި ޓެސްޓް ކިޓްތަކަކީ އެއް ކިޓުން 500 ޓެސްޓް ކުރެވޭނެ ގޮތަށް ފަރުމާ ކޮށްފައިވާ ކިޓްތަކެއް ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވަނީ ވިދާޅުވެފައެވެ. ހަމަ އެއާއެކު، މި ކިޓްތައް ތައްޔާރުކޮށްފައި ވަނީ، ވަގުތު ސަލާމަތްކޮށް، ސައްޙަ ނަތީޖާ ފޯރުކޮށްދިނުމުގެ އިތުރުން ހެއްކެއްގެ ގޮތުގައި ބޭނުންކުރެވޭނެ ގޮތަށްކަމަށް އެ ވުޒާރާއިން ވިދާޅުވެފައިވެއެވެ.

މި ޓެސްޓް ކިޓުތަކަކީ ޢާންމުކޮށް ރާއްޖެއަށް އެތެރެކުރާ މަސްތުވާތަކެތީގެ 10 ބާވަތް ޓެސްޓް ކުރެވޭނެހެން ތައްޔާރުކޮށްފައިވާ ކިޓުތަކެއްކަން ފާހަގަކޮށްލެވެއެވެ.