ބުޅާ ފެސިލިޓީއަށް ބޭނުންވާ ބައެއް މަރާމާތުކޮށްދޭނެ ބައެއް ހޯދަން އިއުލާނުކޮށްފި

ހުޅުމާލޭ ފަރުކޮޅުފުށީގައި ގާއިމުކޮށްފައިވާ "އޮޅުހިޔާ" ބުޅާ ފެސިލިޓީގެ ބައެއް ތަންތަން މަރާމާތުކޮށްދޭނެ ފަރާތެއް ހޯދުމަށް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން އިއުލާނުކޮށްފިއެވެ. މި މަސައްކަތަކީ އެ ފެސިލިޓީގެ ހިދުމަތްތައް އިތުރަށް ފުރިހަމަކުރުމަށް ކުރިއަށްގެންދާ މަސައްކަތެކެވެ.

ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ވިދާޅުވީ، މި މަރާމާތުގެ ދަށުން އޮޅުހިޔާގެ އައިސޮލޭޝަން ޔުނިޓް، ޖެނެރަލް ހޯލްޑިން އޭރިއާ، ފާޚާނާ، އަދި އޮފީހާއި ފާރަވެރިންގެ ކޮޓަރި މަރާމާތު ކުރުމަށް ވަނީ ހަމަޖެހިފައެވެ. މި މަސައްކަތްތަކަށް ޝައުގުވެރިވާ ފަރާތްތަކަށް މިހާރު ވަނީ ބީލަން ހުށަހެޅުމުގެ ފުރުސަތު ހުޅުވާލާފައެވެ.

މި މަސައްކަތާ ގުޅޭ މައުލޫމާތު ސާފުކުރުމަށް ބޭނުންވާ ފަރާތްތަކުން އަންނަ މަހުގެ 3 ވާ އަންގާރަ ދުވަހުގެ 10:00 ގެ ކުރިން އޮޅުހިޔާ ފެސިލިޓީއަށް ވަޑައިގަތުމަށް އެ ވުޒާރާއިން ވަނީ އެދިފައެވެ. އަދި އަންދާސީ ހިސާބު ހުށަހެޅުން އޮންނާނީ އަންނަ މަހުގެ 10 ވާ އަންގާރަ ދުވަހުގެ 11:00 ގެ ކުރިން އެ ވުޒާރާގައެވެ.

ބީލަން ހުށަހެޅުމަށް ކަނޑައަޅާފައިވަނީ ރަސްމީ ބަންދު ނޫން 7 ދުވަހުގެ މުއްދަތެކެވެ. ވުޒާރާއިން ވިދާޅުވި ގޮތުގައި، އެ މުއްދަތުގެ ތެރޭގައި ސަރުކާރު ބަންދު ދުވަހެއް ދިމާވެއްޖެނަމަ، ބިޑް ބަލައިގަންނާނީ ބަންދުވި ދުވަސްތަކަށް ރަސްމީ ދުވަސް ހަމަކޮށް، ޖެހިގެން އޮންނަ ރަސްމީ ދުވަހުގެ 11:00 އަށެވެ. އިތުރު މައުލޫމާތު ސާފުކުރުމަށް 3309331 ނުވަތަ 3309333 އަށް ގުޅުމަށް ވެސް ވަނީ އެދިފައެވެ.

މާލެ ސިޓީ ކައުންސިލްގެ ހަރަދުގައި އިމާރާތްކޮށްފައިވާ މި ފެސިލިޓީއަކީ މާލެ ސަރަހައްދުގައި އުޅޭ ބުޅާތަކުގެ މައްސަލައަށް ހައްލެއް ހޯދުމަށް ގާއިމުކުރި ތަނެކެވެ. މި ތަން ރަސްމީކޮށް ހުޅުއްވައިދެއްވީ 2024 ވަނަ އަހަރުގެ ނޮވެމްބަރު މަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. މިހާރު މި ފެސިލިޓީ ހިންގަމުން ގެންދަނީ ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ ބެލުމުގެ ދަށުންނެވެ.