ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކުގެ ގުރުއަތުލުން ފަށައިފި

ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކުގެ ގުރުއަތުލުން އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން މިއަދު ހެނދުނު ފަށައިފި އެވެ.

އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ވިދާޅުވީ، ގިރާވަރުފަޅުގެ ލޭންޑް ޔޫސް ޕްލޭން އަށް ބަދަލު ގެނެވި، އައު ލޭންޑް ޔޫސް ޕްލޭނެއް ތައްޔާރުކުރެވިފައިވާތީ، އެ ޕްލޭންއަށް ރިޢާޔަތްކޮށް ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކުގެ ގޯތީގެ ސަރަޙައްދަށް ބަދަލު އައިސްފައިވުމުން، އައު ލޮޓް ނަންބަރު ކަނޑައަޅާފައިވާ ކަމަށެވެ. އެހެންކަމުން، މިއަދު ކުރިއަށް މިދަނީ، މި ބަދަލާއި ގުޅިގެން ގިރާވަރުފަޅުން ގޯތި ޙަވާލުކޮށްފައިވާ ފަރާތްތަކުގެ މެދުގައި އައު ޕްލޮޓް އެލޮކޭޓް ކުރުމަށްޓަކައި ގުރުއަތުލުމުގެ މަސައްކަތްކަމަށް އެ ވުޒާރާއިން މަޢުލޫމާތުދެއެވެ.

ގިރާވަރުފަޅުގެ ލޭންޑް ޔޫސް ޕްލޭންގައި 610 ގޯތި މަދުވާތީ، އެ އަދަދު ހިމަނައިގެން ގިރާވަރު ފަޅުން ދޫކުރަންޖެހޭ ޖުމްލަ 4،072 ގޯތި ހިމެނޭހެން، މިދިޔަ ޖުލައި މަހު އައު ލޭންޑް ޔޫސް ޕްލޭނެއް ގެދޮރުވެރިކަމާ ބެހޭ ވުޒާރާއިން ވަނީ އެކުލަވާލާފައެވެ. އަދި މި ބަދަލާ ގުޅިގެން "ބިންވެރިޔާ" ސްކީމުގެ ދަށުން ގިރާވަރު ފަޅުން ގޯތި ލިބިފައިވާ ފަރާތްތަކަށް ކަނޑައަޅާފައިވާ ބިމުގެ ސަރަޙައްދުތަކަށް ބަދަލު އައިސްފައިވާކަމަށް އެ ވުޒާރާއިން ވަނީ ހާމަކޮށްފައެވެ.

ގިރާވަރުފަޅުން ދޫކޮށްފައިވާ ގޯތީގެ ޢަދަދާއި ބޮޑުމިނުގެ ތަފްޞީލް:

• 1250 އަކަފޫޓުގެ 2605 ގޯތި
• 1650 އަކަފޫޓުގެ 1213 ގޯތި
• 2050 އަކަފޫޓުގެ 253 ގޯތި
•  2450 އަކަފޫޓުގެ 1 ގޯތި

އެ ވުޒާރާއިން އިތުރަށް ވިދާޅުވީ، މި ބަދަލާއެކު ގިރާވަރުފަޅުން ގޯތިލިބޭ ފަރާތްތަކަށް ލިބިގެންދާ ޕްލޮޓްގެ ގުރުއަތުލުމުގެ ކަންކަން ކުރިއަށް ގެންދާނީ އެކަމަށް ކަނޑައަޅާފައިވާ އެ ވުޒާރާގެ މުވައްޒަފުން ކަމަށެވެ. އަދި ގުރުއަތުނެގުމަށް ހަމަޖެހިފައިވާ ސަރަޙައްދަށް ވަދެވޭނީ ގޯތި ލިބިފައިވާ ފަރާތްތަކުގެ ތެރެއިން ކޮންމެ ޕްލޮޓަކަށް 1 ފަރާތަށް ކަމަށާއި، ގޯތި ލިބޭ ފަރާތްތަކެއްގެ ބަދަލުގައި އެހެން ފަރާތަކުން ޙާޟިރުވާން ބޭނުންވާނަމަ، އެކަން އަންގައިދޭ ލިޔުމާއި ގޯތީގެ ވެރިފަރާތުގެ އައިޑީ ކާޑުގެ ކޮޕީގެ އިތުރުން ބަދަލުގައި ޙާޟިރުވާ ފަރާތުގެ އައިޑީ ކާޑުގެ ކޮޕީއާއެކު ހާޟިރުވުމުން، ގުރުއަތު ނެގުމަށް ހަމަޖެހިފައިވާ ސަރަޙައްދަށް ވަދެވޭނެކަމަށް އެ ވުޒާރާއިން ވިދާޅުވެއެވެ.

ގެދޮރުވެރިކަމާ ބެހޭ ވުޒާރާއިން ވިދާޅުވީ ގޯތި ލިބޭ ފަރާތްތަކުގެ ގުރުނަގާ ނިމުމުން، ގޯތި ޙަވާލުކުރުމުގެ އެއްބަސްވުމުގެ ސޮއިކުރުމާއި ގޯތީގެ ރަޖިސްޓަރީ ޙަވާލުކުރުމުގެ މަސައްކަތް ކުރިއަށްގެންދާނެ ގޮތުގެ މަޢުލޫމާތު ފަހުން ހިއްސާކުރާނެކަމަށެވެ. އަދި ބިން ހިއްކާ ނިމުމުން، ގޯތި ލިބިފައިވާ ފަރާތްތަކާ ގޯތި ހަވާލުކުރުމުގެ މަސައްކަތް ކުރިއަށް ގެންދާނެކަމަށް އެ ވުޒާރާއިން ވަނީ ވިދާޅުވެފައެވެ.