ސަރުކާރުގެ ހައުސިންގ ލޯން ސްކީމްތަކަށް މަސްވެރިންނަށް ހުށަހެޅޭގޮތަށް ހަމަޖައްސައިފި

ސަރުކާރުގެ ހައުސިންގ ލޯން ސްކީމްގެ ހުރިހާ ދާއިރާއަކުންވެސް މަސްވެރިކަމުގެ ދާއިރާގައި މަސައްކަތްކުރާ ފަރާތްތަކަށް ހުށަހެޅުމުގެ ފުރުސަތު ހުޅުވާލައިފިއެވެ.

ހިޔާވެހި ފައިނޭންސިން ސްކީމްގައި މަސްވެރިން ބައިވެރިކުރުމަށް ކުރެވިފައިވާ މަސައްކަތުގެ މައުޟޫމާތު ހިއްސާކުރުމަށް ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު އަދި  މަސްވެރިކަމާ ކަނޑުގެ ވަސީލަތްތަކާ ބެހޭ ވަޒީރު ވަނީ މިއަދު ބައްދަލުވުމެއް ކުރިއަށްގެންގޮސްފައެވެ. 

މި ބައްދަލުވުމުގައި ވާހަކަ ދައްކަވަމުން ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު ޑރ. އަލީ ހައިދަރު އަޙްމަދު ވިދާޅުވީ ސަރުކާރުގެ ހައުސިންގ ލޯން ސްކީމްތަކަށް މަސްވެރިންނަށް ހުށައެޅޭނެ އިންތިޒާމް މިހާރު ހަމަޖެހިފައިވާކަމަށެވެ. އެގޮތުން ސަރުކާރުގެ ހައުސިންގ ލޯން ސްކީމްގެ ހުރިހާ ދާއިރާއަކުންވެސް މަސްވެރިކަމުގެ ދާއިރާގައި މަސައްކަތްކުރާ ފަރާތްތަކަށް ފުރުސަތު ހުޅުވާލާފައިވާކަމަށް ވަޒީރު ވިދާޅުވިއެވެ. ވަޒީރު ވިދާޅުވީ މި ފުރުސަތު ހުޅުވާލީ އިޤްތިޞާދީ މަސައްކަތް ކުރާ ހުރިހާ ފަރާތްތަކަކީވެސް މަސައްކަތުގެ ތެރޭގައި ޝާމިލްވާންޖެހޭ ބައެއްކަމަށް ފެންނާތީކަމުގައެވެ. އެއާއެކު ފަތުރުވެރިކަމުގެ ދާއިރާއާއި އަދި ދަނޑުވެރިކަމުގެ ދާއިރާގެ ފަރާތްތައްވެސް ބައިވެރިކުރުވުމަށް އޮތީ ކަނޑައަޅާފައިވާކަން ވަޒީރު ފާހަގަ ކުރެއްވިއެވެ. 

މި ބައްދަލުވުމުގައި ވާހަކަ ދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ އަންނަ އަހަރަށް ލަފާކުރާ ބަޖެޓްވެސް ޙާއްޞަ ވެފައިވަނީ ބޯހިޔާވަހިކަން ކަށަވަރުކޮށްދިނުމަށް ކަމުގައިވާތީ، މަސްވެރިން މިފަދަ މުހިންމު ކަމަކުން މަހުރޫމް ވާނަމަ އެއީ ޔަޤީނުންވެސް ދެވޭނެ ވަރަށް ބޮޑު ނިކަމެތިކަމެއްކަމުގައެވެ. އެގޮތުން މަސްވެރިންގެ ޤާނޫނެއް އޮންނަންޖެހޭނެކަމަށާއި މަސްވެރިންގެ އިޖްތިމާއީ ރައްކާތެރިކަން ކަށަވަރުކޮށްދޭންޖެހޭނެކަމަށް ވަޒީރު ވިދާލުވިއެވެ.ވަޒީރު އިތުރަށް ވިދާޅުވީ ގެދޮރުވެރިކަމަކީ އިޖު ތިމާއީ ޙައްޤެއް ކަމުގަޔާއި މި ޙައްޤުން މަސްވެރިން މަހުރޫމްވިޔަ ނުދިނުމަށް އެޅުއްވި މުހިންމު ފިޔަވަޅެއް ކަމުގައެވެ. މަސްވެރިންނަށް ލޯނު ސްކީމް ތަކުން ޝަރުތު ހަމަ ނުވާކަމަކީ މަސްވެރިންގެ ވަރަށް ބޮޑު ޝަކުވާއެއްކަންވެސް ވަޒީރު ފާހަގަ ކުރެއްވިއެވެ. 

ވަޒީރު އިތުރަށް ވިދާޅުވީ މި ސަރުކާރުގެ އެންމެ ފުރަތަމަ ދުވަހުން ފެށިގެންވެސް މަސްވެރިންނަކީ ދައުލަތް ދަންނަ ބަޔަކަށް ހެދުމުގެ މަސައްކަތް ކުރަމުންދާކަމަށެވެ. އެގޮތުންމަސްވެރިންގެ ދަފްތަރަކީ ހަޤީގަތުގައި ގިނަ ކަންކަމަށް ހައްލު ގެނެސްދޭނެ ކަމެއްކަން ވަޒީރު ފާހަގަކުރެއްވިއެވެ.