ފަލަސްޠީނަށް މިނިވަންކަމާއި ސުލްޙައަކަށް ވަކާލާތުކުރުމުގައި ދެމިހުންނާނަން- ނައިބު ރައީސް

ފަލަސްޠީނަށް މިނިވަންކަމާއި ސުލްޙައަކަށް ވަކާލާތުކުރުމުގައި ދެމިހުންނަވާނެ ކަމަށް ނައިބު ރައީސް އަލްއުސްތާޛް ޙުސައިން މުޙައްމަދު ލަޠީފް ވިދާޅުވެއްޖެއެވެ.

ނައިބު ރައީސް މިހެން ވިދާޅުވީ ފަލަސްޠީނުގެ މިނިވަންކަން އިޢުލާނު ކުރިތާ 36 އަހަރު ފުރުމުގެ މުނާސަބަތުގައި، އެޤައުމުގެ ރައީސް، ޑޮކްޓަރ މަޙްމޫދު ޢައްބާސްއަށާއި ބޮޑުވަޒީރު އަދި ޚާރިޖީ ވަޒީރު މުޙައްމަދު މުސްޠަފާގެ އިތުރުން އެޤައުމުގެ ރައްޔިތުންނަށް ފޮނުއްވި މެސެޖެއްގައެވެ.

ރައީސުލްޖުމްހޫރިއްޔާގެ ނައިބު ފޮނުއްވި މެސެޖުގައި ވަނީ ފަލަސްޠީނުގެ މިނިވަންކަން އިޢުލާނުކުރި 36 ވަނަ އަހަރީ ދުވަހުގެ މުނާސަބަތުގައި،  ރައީސް ޑރ. އައްބާސްއަށާއި، ބޮޑުވަޒީރު  މުސްޠަފާއަށާއި، އަދި ފަލަސްތީނުގެ ރައްޔިތުންނަށް ހެޔޮ އެދުންތައް ފޮނުއްވާކަމަށެވެ. އަދި ހަމައެއާއެކު ފަލަސްޠީނަކީ މިނިވަން ދައުލަތަކަށް ހެދުމަށާއި، ފަލަސްޠީނު އަޚުންނަށް ދެމިގެންވާ ސުލްޙައަކަށް ވަކާލާތުކުރުމުގައި ދިވެހިރާއްޖެ ދެމިއޮންނާނެ ކަމަށެވެ.

🇲🇻🇵🇸
On the Anniversary of Palestine’s Declaration of Independence, I extend solidarity to President Dr. Abbas, PM HE Mustafa & the resilient people of Palestine. Maldives stands firm in supporting a sovereign Palestine & advocating for lasting peace for our Palestinian family. pic.twitter.com/5q8losaL4a

— Hussain Mohamed Latheef (@HucenSembe) November 15, 2024

މި މުނާސަބަތާއި ގުޅިގެން ފަލަސްޠީނުގެ ރައީސާއި ބޮޑުވަޒީރަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒުވެސް ވަނީ ވަކިވަކިން ފޮނުއްވި މެސެޖުގައި، ފަލަސްޠީނުގެ މިނިވަންކަން އިޢުލާން ކުރިތާ 36 އަހަރު ފުރުމުގެ މުނާސަބަތުގައި، ހެޔޮ އެދުންތައް ފޮނުއްވާފައިވެއެވެ. އަދި ފަލަސްޠީނުގެ ރައްޔިތުން، އަނިޔާވެރިކަމާއި ބޭއިންސާފާ ދެކޮޅަށް ކުރަމުން ގެންދާ މަސައްކަތުގައި، އެ ރައްޔިތުންގެ ސާބިތުކަމާއި ހިތްވަރުގަދަކަމަށް ނުހަނު ތަޢުރީފު ކުރައްވާފައިވެއެވެ.