"911" ޚިދުމަތާއެކު ކުއްލި ހާލަތްތަކުގައި އިޖާބަދިނުން އަވަސްވާނެ - ވަޒީރު އިޙްސާން

"911" ޚިދުމަތާއެކު ކުއްލި ހާލަތްތަކުގައި އިޖާބަދިނުން އަވަސްވާނެކަމަށް ދާޚިލީ ސަލާމަތާ ފަންނިއްޔާތާބެހޭ ވަޒީރު އަލީ އިޙުސާން ވިދާޅުވެއްޖެއެވެ.

ކުއްލި ހާލަތްތަކުގައި ރާއްޖޭގައި ހަރަކާތްތެރިވާ ހުރިހާ އިދާރާތަކަކަށް އެއް ނަންބަރަކުން ގުޅޭގޮތް ހަމަޖެއްސުމަށްޓަކައި ތައާރަފްކުރި އެމަޖެންސީ ސަރވިސް ހޮޓްލައިން "911" އިފްތިތާޚުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ވަޒީރު ވިދާޅުވީ 911 އަށް ހުށައަޅާ މައްސަލަތައް ކަމާގުޅުން ހުރި ހުރިހާ އިދާރާތަކަށް ވަގުތުން އެ މަޢުލޫމާތު ފޯރުކޮށްދެވޭނެކަމުގައެވެ.

ވަޒީރު ވިދާޅުވީ ރައީސް ޑރ. މުޢިއްޒުގެ ވެރިކަމުގެ ކުރީކޮޅުގައި ނޭޝަނަލް އެމަޖެންސީ ކޯލް ސެންޓަރެއްގެ މުހިންމުކަން އެނގިވަޑައިގަތް ކަމަށާއި އެވަގުތުން ފެށިގެން މި ޚިދުމަތް އެއް ނަންބަރެއްގެ ޒަރިއްޔާއިން ރައްޔިތުންނަށް ދިނުމަށް ރައީސް ނިންމެވީ ކަމަށެވެ. އެއާއެކު ކެބިނެޓުން މި މަސައްކަތް ކުރުމަށް ނިންމުމުން ރައީސް ވަނީ ސަލާމަތީ ޚިދުމަތްދޭ މުއައްސަސާތަކާއި ހަވާލުވެތިބި ވުޒާރާތަކަށް މި ޚިދުމަތް ތަޢާރަފްކުރުމަށް އިރުޝާދު ދެއްވާފައި ކަމަށްވެސް ވަޒީރުގެ ވާހަކައިގައި ފާހަގަކުރެއްވިއެވެ. 

ވަޒީރު އިތުރަށް ވިދާޅުވީ މި ޚިދުމަތްދޭން ނިންމީ ފުލުހުންގެ މުއައްސަސާގައި މި ޚިދުމަތް ގާއިމްކޮށް އަދި މި ޚިދުމަތް ގާއިމްކުރެވިގެން އަންނައިރު ފުލުހުންގެ ޚިދުމަތާއި، އެމްބިއުލާންސްގެ ޚިދުމަތުގެ އިތުރުން ކޯސްޓްގާޑް، ފަޔަރ އެންޑް ރެސްކިޔު ސަރވިސްގެ ޙިދުމަތްވެސް 911 ނަންބަރުގެ ތެރެއިން ރައްޔިތުންނަށް ލިބިގެންދާ ގޮތަށް ކަމަށެވެ.

އެންމެ ބޭނުންވާ ފުރިހަމަ ފެންވަރެއްގައި މި ޚިދުމަތް ތަޢާރަފްވެގެން ނުދިޔަ ނަމަވެސް ރައްޔިތުންނަށް ބޭނުންވާ ފެންވަރަށް މިޚިދުމަތް މިހާރު ފެށިފައިވާ ކަމަށްވެސް އެމަނިކުފާނު ވިދާޅުވިއެވެ. އަދި ކަމާގުޅޭ ހުރިހާ އިދާރާއެއް ގުޅިގެން މި ޚިދުމަތް އިތުރަށް ފުޅާކޮށް ރައްޔިތުންނަށް މިއައްވުރެ ފުރިހަމަ ޚިދުމަތްތަކެއް ފޯރުކޮށްދިނުމުގެ މަގު ހޯއްދަވައިދެއްވާނެ ކަމުގެ ޔަގީންކަން ވަޒީރު ދެއްވާފައިވެއެވެ.

ވަޒީރު ވިދާޅުވީ އެމަޖެންސީ ސަރވިސްގެ ނަންބަރުގެ ގޮތުގައި "911" ކަނޑައެޅީ، މިއީ ޒުވާނުންނާއި އާއްމުންގެ ތެރޭގައިވެސް މީހުންނަށް އެނގޭ ދަންނަ ނަންނަބަރަކަށްވުމާއި ފަސޭހައިން ޕްރޮމޯޓް ކުރެވޭނެ ނަންބަރަކަށްވާތީކަމަމަށެވެ. ވަޒީރު ވިދާޅުވީ މި ޚިދުމަށް ކުރިމަގުގައި އިތުރަށް ފުޅާކުރާނެކަމަށާއި އެގޮތުން އަތޮޅުތަކުގައިވެސް ކުއްލި ޙާލަތުގައި އިޖާބަދޭ މިންވަރު އިތުރުކުރައްވާނެކަމަށެވެ.

ވަޒީރު ވަނީ އާއްމުންނާއި ގުޅިފައިވާ މިފަދަ މުހިންމު ޚިދުމަތެއް، ނަހަމަ ގޮތުގައި ބޭނުން ނުކުރުމަށް އިލްތިމާސްކުރައްވާފައެވެ.