މިލްކިއްޔާތުގައި ރިސޯޓުތަކާއި ގެސްޓުހައުސް ހުއްޓަސް ރައްޔިތުންނާއި ޤައުމަށް ފައިދާވާން ނޭދޭ މަހުޖަނުން!

ރިސޯޓުތަކަށް އަންނަ ކޮންމެ ފަތުރުވެރިއެއްގެ ބޮލަަކަށް 500 ޑޮލަރު މާރުކުރަންޖެހޭނެ ކަމަށް މަރުކަޒީ ބޭންކުން އެންގި ހިސާބުން ރިސޯޓު އޯނަރުންނަށް ހަމަ ނިދި ނުލިބެއެވެ. 

ވާނީވެސް އެހެންތާއެވެ. އެމީހުން ބުނާގޮތުން މިދައްކަނީ އެމީހުންނަށްލިބޭ އާމްދަނީގެ 50% ދައުލަތަށް ދައްކަން ޖެހޭ ވާހަކަ ވިއްޔާއެވެެ. ކަމުގެ ޙަޤީގަތަށް ބަލާއިރު މިކަމުގައި ރިސޯޓު އޯނަރުން ކަންބޮޑުވާންޖެހޭ އެއްވެސް ސަބަބެއް ނެތެވެ. ބިލިއަނުން ފައިދާވަމުންދާއިރު މިލިއަނަކުން މާރުކުރުމަށްފަހު ބާކީއަށް ވާގޮތެއް ނޭންގެއެވެ. އެމީހުން ބުނާގޮތުގައި ވިޔަފާރިތައް ހިނގާ ގޮތުން ކުރަން މިއީ ކުރަން އުދަނގޫ ކަމެކެވެ. 

އެގޮތުން ބަހަނާއެއްގެ ގޮތުގައި ދައްކަނީ އެކި ގެސްޓުން ރިސޯޓުތަކުގައި ހޭދަކުރާ ވަގުތާއި ފައިސާގެ އަދަދު ތަފާތުވުމުގެ ސަބަބުން ލިބޭ ޑޮލަރަށްވުރެ މާރުކުރަންޖެހޭ އަދަދު އިތުރުވުމުގެ ފުރުސަތު އޮވެދާނެކަމެވެ. އަދި އެކި ފަންތީގެ ރިސޯޓުތަކުގެ އަގަށް ބެލުމެއް ނެތި އެއްއަދަދަކުން މާރުކުރަން ޖެހުމަކީ ޓޫރިސްޓު ވިޔަފާރިތަކުގެ ކަންބޮޑުވުމެއް ކަމުގައި ފާހަގަ ކޮށްފައިވެއެވެ. އެއާއެކުވެސް އިންވެސްޓުމެންޓަށް ނަގާފައިވާ ލޯނުތައް އަދާކުރުމަށް ޑޮލަރު ނެތުމާއި މުވައްޒަފުންނަށް ޑޮލަރުން ދޭ މުސާރައާއި ސާވިސް ޗާޖު ދިނުމަށް ދަތިވާނެކަމަށް ބުނެފައިވެއެވެ. 

ކަން އޮތްގޮތަށް ބަލާނަަމަ ގަވާއިދުގައި ކޮންމެ މަހަކު އަންނަ ފަތުރުވެރިންގެ ތެރެއިން ކޮންމެ މީހެއްގެ ބޮލަކަށް 500 ޑޮލަރު މާރުކުރަންޖެހޭނެ ކަމަށް ބަޔާންކުރި ނަމަވެސް ތިން މަސްދުވަހުގެ މުއްދަތެއް ޑޮލަރު މާރުކުރުމަށް ދީފައި އޮވެ އެވެ. އެއާއެކު ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރަން މަރުކަޒީ ބޭންކުން ކަނޑައަޅާފައިވަނީ ފަތުރުވެރިން ހޭދަކުރާ ފައިސާގެ އަދަދު ހޯދާ، ދިރާސާ ކުރުމަށްފަހުގައެވެ.

މިކަމުގައި ރިސޯޓު އޯނަރުން ދެކޮޅު ހަދަންވީ ސަބަބެއް ނޭންގެނީ، އެއްވެސް ހާލެއްގައި މިއީ އެމީހުންގެ ފައިސާއިން ވަކި އިންސައްތައެއް ނެގުމަށް ނުވާތީއެވެ. ނުވަތަ މިއީ ޓެކްސްއެއްވެސް ނޫނެވެ. އަދި ލޯނެއްވެސް ނޫނެވެ. ހަމައެކަނި 500 ޑޮލަރު މަރުކަޒީ ބޭންކުން ކަނޑައަޅާފައިވާ ރޭޓުން މާރުކުރުމެވެ. އެވެސް ބޮލަކަށް ލިބޭ 1000އަށްވުރެ ބޮޑު އަދަދަކުން ކުޑަ މިންވަރެކެވެ. 

ބައިގަރުުނުވީ ފަތުރުވެރިކަމުގެ ސިނާޢަތުން ރާއްޖެއަށް ކޮންމެސްވަރެއްގެ ފައިދާއެއް ވަމުން ދިޔަނަމަވެސް އަހަރެއްގެ މައްޗަށް ރާއްޖެއަންނަ މިލިއަނަކަށްވުރެ ގިނަ ފަތުރުވެރިންގެ އަތުން ޤައުމަށް ވަންނަންވާ ވަރަށް ނުވަތަ ވަންނަމުންދާ މިންވަރު ދިވެހި ކޮންމެ ރައްޔިތެއްގެ ބޮލަށް ބަހާލެވޭވަރު ނުވާނަމަ މިކަމުން ޤައުމަށްވާ ފައިދާ އަކީ ކޮބައިތޯއެވެ. މަސްވެރިކަމަކީ ލޭނާރުކަމުގައި ބުނާއިރު ފަތުރުވެރިކަމަކީ ރާއްޖޭގެ އިޤްތިޞާދުގެ މައިބަދައެވެ. އެހެންނަމަވެސް  ސިނާއަތަށް ލިބޭ އާމްދަނީން ދިވެހިރާއްޖޭގެ މާލީ ނިޒާމަށް މާބޮޑު ފައިދާއެއް ވެފައެއް ނުވެއެވެ. 

ކަޅު ބާޒާރު!

ފަހުގެ ތާރިޚުގައި އެންމެ ގިނައިން އަޑުއިވޭ އެއް ބަހަކަށް ވެފައިވަނީ "ބްލެކް މާރކެޓް" ނުވަތަ "ކަޅު ބާޒާރު" އެވެ. ސުވާލަކީ ޑޮލަރުގެ ދަތި ދުވަސްވަރުގައިވެސް ކަޅު ބާޒާރުގައި ބޭނުން ވަރަކަށް ޑޮލަރު ލިބެން ހުންނަނީ ކިހިނެއް ހެއްޔެވެ. މިބުނާ ކަޅު ބާޒާރަށް ޑޮލަރު ނެރެނީ ކިހިނެއް ހެއްޔެވެ. ރާއްޖޭގައި ޑޮލަރު ލިބޭ ބަޔަކަށް ފަތުރުވެރިންނާއި ވިޔަފާރި ވެރިން ތިބި އިރު ކަޅު ބާޒާރަށް ޑޮލަރު ނެރެދޭން މިނޫން ބަޔަކު ނުތިބޭނެކަން ޔަގީންވެއެވެ. 

ކަން މިހެން އޮތުމާއެކު މަރުކަޒީ ބޭންކުން ޑޮލަރު މާރުކުރުމަށް ރިސޯޓް އޯނަރުން ދެކޮޅު މިހަދަނީ ކަޅު ބާޒާރުގައި ދައުރުކުރާނެ ޑޮލަރުގެ މިންވަރު މަދުވެދާނެތީ ކަމަށް ވެދާނެހެއްޔެވެ؟ 

ވޭތުވެދިޔަ ދުވަސްތަކުގައިވެސް ކަން ހިނގަމުންއައީ މިހެންނެވެ. އެކި ވެރިން ޤައުމާ ހަވާލުވެ ފައިބައިގެންދަނީ މިކަންކަން ފެނި އަތުން ހިފައިގެންނެވެ. ޙަޤީގަތަކީ ބޮޑެތި ވިޔަފާރިވެރިންގެ ބަހަށް ނުވިކި ކަން ކުރަން ވެރިއަކަށް އައީ ރައީސް ޑރ.މުޙައްމަދު މުޢިއްޒު ކަމެވެ. ކަޅު ބާރާޒުގައި ޑޮލަރު މާރުކުރުން ހުއްޓުވާ، މިކުޅިވަރަށް ނިމުމެއް ގެންނަން ކެރުނު ވެރިއަކަށް ހުރީ ރައީސް މުޢިއްޒުއެވެ.