ގުރުއަތުން ހޮވޭ 5 ފަރާތަކަށް ލިބޭ ސްކޮލަރޝިޕްގެ ފުރުސަތާއެކު "ދާލަން" އެކްސްޕޯ ފަށައިފި

ޒިޔާރަތްކުރާ މީހުންގެ މެދުގައި ނަގާ ގުރުއަތުން ހޮވޭ 5 މީހަކަށް ސްކޮލަރޝިޕްގެ ފުރުސަތާއެކު "ދާލަން" އެކްސްޕޯ ފަށައިފިއެވެ. 

ދާލަން: ނެޝަނަލް ސްކިލްސް އެންޑް ކެރިޔަރ އެކްސްޕޯ 2024" އިފްތިފާޙްކުރުމުގެ ރަސްމިއްޔާތު ޝަރަފުވެރިކޮއްދެއްވީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވަޒީރު، ޑރ. މަރްޔަމް މާރިޔާއެވެ. މި ރަސްމިއްޔާތުގައި،  ޑރ.މަރްޔަމް މާރިޔާގެ އިތުރުން، ދިވެހިބަހާއި ސަޤާފަތާއި ތަރިކައާއި ބެހޭ ވަޒީރު، އާދަމް ނަސީރު، ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ކޯޕަރޭޓް ޑިވެލޮޕްމަންޓް، މުޙައްމަދު ޝާހިދު އަދި ދަނޑުވެރިކަމާއި ބެހޭ ވަޒީރު އައިޝަތު ރަމީލާ ވަނީ މި ރަސްމިއްޔާތުގައި ބައިވެރިވެވަޑައިގަންނަވާފައެވެ.

މި އެކްސްޕޯގައި ސަރުކާރު އޮފީސްތަކާއި ކުންފުނިތަކާއި މަތީ ތަޢުލީމުދޭ މަރުކަޒުތަކާއި ކޮލެޖު ޔުނިވަރސިޓީތަކުގެ ސްޓޯލްތައް ވަނީ ބަހައްޓާފައެވެ. މި ސްޓޯލްތަކުން ވަޒީފާގެ ފުރުޞަތުތަކާއި ކުރިއަށްދެވިދާނެ ދާއިރާތަކާއި ގުޅޭގޮތުން މަޢުލޫމާތު ފޯރުކޮށްދެއެވެ. އަދި މަތީ ތަޢުލީމުދޭ މަރުކަޒުތަކުގެ ސްޓޯލްތަކުން އެތަންތަނުން ކުރިއަށްގެންދާ ކޯސްތަކާ ބެހޭގޮތުން މައުލޫމާތު ފޯރުކޮށްދެއެވެ.

"ދާލަން: ދި ނެޝަނަލް ސްކިލްސް އެންޑް ކެރިއަރ އެކްސްޕޯ" ކުރިއަށްދަނީ މިމަހުގެ 15 އިން 16 އަށް ހުޅުމާލޭ ސެންޓްރަލް ޕާކުގައެވެ.

މި އެކްސްޕޯގައި 45 ސްޓޯލް ހުންނައިރު އެކްސްޕޯއަށް ޒިޔާރަތްކުރާ މީހުންގެ މެދުގައި ނަގާ ގުރުއަތުން ހޮވޭ 5 މީހަކަށް ސްކޮލަރޝިޕްގެ ފުރުސަތު ލިބުގެންދާނެކަމަށް މަތީ ތަޢުލީމާބެހޭ ވުޒާރާގެ މައުލުމާތު ދެއްވައެވެ. އެކްސްޕޯ އިފްތިތާޙް ކުރުމަށް ބޭއްވި ރަސްމިއްޔާތުގައި މިނިްސްޓްރީ ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ފަރާތުން ވަނީ "ހަފްތާ 52" ފޮތް ތަޢާރަފްކޮއްފައެވެ.