ދަތުރުކުރުމުގައި ދަތިވެފައިވާ ފަތުރުވެރިންގެ ވިސާގެ މުއްދަތު އިތުރުކޮށްދޭން ނިންމައިފި

މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގެ ސަބަބުން ދަތުރުކުރުމުގައި ދަތިތަކާ ކުރިމަތިލާންޖެހިފައިވާ ފަތުރުވެރިންނަށް ދޫކޮށްފައިވާ ވިސާގެ މުއްދަތު އިތުރުކޮށްދިނުމަށް މޯލްޑިވްސް އިމިގްރޭޝަނުން ނިންމައިފިއެވެ.

މި ނިންމުން ނިންމާފައިވަނީ މެދުއިރުމަތީގެ ވައިގެ ސަރަހައްދުތައް ބަންދުކުރުމާ ގުޅިގެން ރާއްޖެއަށް ދަތުރުކުރާ ގިނަ ފްލައިޓްތަކެއް ކެންސަލްވެ، ފަތުރުވެރިންނަށް ފުރޭނެ ގޮތެއް ނެތުމުންނެވެ.

މޯލްޑިވްސް އިމިގްރޭޝަނުން ވިދާޅުވީ ފެބުރުވަރީ މަހުގެ 28 ވަނަ ދުވަހުން ފެށިގެން މެދުއިރުމަތީގެ ހަމަނުޖެހުންތަކުގެ ސަބަބުން ދަތުރުފަތުރުގެ ނިޒާމަށް ބޮޑެތި ބުރުތަކެއް އަރާފައިވާ ކަމަށެވެ. މިކަމުގެ ސަބަބުން ރާއްޖޭގައި ތިބި ބައެއް ފަތުރުވެރިންގެ ވިސާގެ މުއްދަތު ހަމަވުމުގެ ކުރިން ފުރޭނެ އިންތިޒާމެއް ނެތުމުން، އެ ފަރާތްތަކަށް ލުއި ފަސޭހަކޮށްދިނުމުގެ ގޮތުން ޓުއަރިސްޓް ވިސާގެ މުއްދަތު އިތުރުކޮށްދިނުމަށް ވަނީ ހަމަޖެހިފައެވެ.

މެދުއިރުމަތީގެ ހަނގުރާމައާ ގުޅިގެން ރާއްޖެއިން ނުފުރި ތިބި ފަތުރުވެރިންގެ ހާލު ބަލައި، އެފަރާތްތަކަށް ބޭނުންވާ ފަސޭހަ އިންތިޒާމްތައް ހަމަޖެއްސުމަށް ސަރުކާރުން އަންނަނީ މަސައްކަތް ކުރަމުންނެވެ. އެގޮތުން ފްލައިޓްތައް ކެންސަލްވާން ފެށި ހިސާބުން ފަތުރުވެރިންނަށް އެމީހުން ތިބި ރިސޯޓްތަކަށް ނުވަތަ ގެސްޓްހައުސްތަކަށް އެނބުރި ދެވޭނެ މަގު ވަނީ ފަހިކޮށްދީފައެވެ. މީގެ އިތުރުން، އެއާޕޯޓުގައި މަޑުކުރަން ބޭނުންވި ފަތުރުވެރިންނަށް ކުރީގެ ޑޮމެސްޓިކް ޓާމިނަލްގައި ވަނީ ޚާއްސަ އިންތިޒާމްތަކެއް ހަމަޖައްސައިދީފައެވެ.

ވެލާނާ އިންޓަރނޭޝަނަލް އެއަރޕޯޓުގެ ޑޮމެސްޓިކް ޓާމިނަލްގައި މިހާރު ވަނީ ފްލައިޓްތައް ކެންސަލްވި އެއަރލައިންތަކަށް ޚާއްސަ ސަރވިސް ކައުންޓަރުތަކެއް ޤާއިމްކޮށްފައެވެ. އެމްއޭސީއެލްގެ ތަފާސްހިސާބުތަކަށް ބަލާއިރު، ފެބުރުވަރީ 28 ވަނަ ދުވަހު އެކަނިވެސް 9 ފްލައިޓެއް ކެންސަލްވެ 1,716 ފަސިންޖަރުންނަށް ދަތިތަކާ ކުރިމަތިވިއެވެ. އަދި ޖެހިގެން އައި ދުވަހު 19 ފްލައިޓެއް ކެންސަލްވެ، ޖުމްލަ 3,530 ފަސިންޖަރުންނަށް ވަނީ ދަތުރުފަތުރުގެ ދަތިތަކާ ކުރިމަތިލާން ޖެހިފައެވެ.

ސަރުކާރުގެ ކަމާބެހޭ އިދާރާތަކުން އަންނަނީ މި ހާލަތު މޮނިޓަރ ކުރަމުންނެވެ. އަދި ފަތުރުވެރިންނަށް ބޭނުންވާ އިތުރު އެހީތެރިކަން ފޯރުކޮށްދިނުމަށާއި، ފްލައިޓްތައް އަލުން ފެށުމާއެކު އެ ފަރާތްތަކަށް ފުރޭނެ އިންތިޒާމްތައް ހަމަޖެއްސުމަށް އެއަރލައިންތަކާ ގުޅިގެން މަސައްކަތް ކުރަމުންދާ ކަމަށްވެސް ސަރުކާރުން ވަނީ ހާމަކޮށްފައެވެ.