ސައުދީގެ އަރަމްކޯ ތެޔޮ ސާފުކުރާ މަރުކަޒަކަށް ޑްރޯން ހަމަލާއެއް އަރައިފި

ސައުދީ އަރަބިއްޔާގެ އިރުމަތީ އައްސޭރިފަށުގައި އޮންނަ ރައުސް ތަންނޫރާގައި ހުންނަ އަރަމްކޯގެ ތެޔޮ ސާފުކުރާ މަރުކަޒަށް އީރާނުން ވަރުގަދަ ޑްރޯން ހަމަލާއެއް މިއަދު ދީފިއެވެ.

މީޑިއާ ރިޕޯޓްތައް ބުނާގޮތުގައި، މި ހަމަލާއާ ގުޅިގެން އެ މަރުކަޒުގައި ބޮޑު އަލިފާންގަނޑެއް ވަނީ ރޯވެފައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ވެސް އެ ސަރަހައްދުން ބޯ ދުންތައް އަރަމުންދާ މަންޒަރު ފެންނަން އެބަހުއްޓެވެ. ރައުސް ތަންނޫރާއަކީ ސައުދީ އަރަބިއްޔާގެ ތެޔޮ ސާފުކުރުމާއި ބޭރު ގައުމުތަކަށް ތެޔޮ ފޮނުވުމުގައި ބޭނުންކުރާ އެންމެ މުހިންމު އެއް މަރުކަޒެވެ.

މި ހަމަލާއަކީ މިދިޔަ ހޮނިހިރު ދުވަހު އެމެރިކާއާއި އިސްރާއީލުން ގުޅިގެން އީރާނަށް ދިން ހަމަލާތަކުގެ ބަދަލުހިފުމުގެ ގޮތުން ދިން ހަމަލާއެކެވެ. އެމެރިކާއާއި އިސްރާއީލުގެ ހަމަލާތަކުގައި އީރާނުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ ހިމެނޭހެން އެ ގައުމުގެ އިސް ލީޑަރުންތަކެއް ވަނީ އަވަހާރަކޮށްލާފައެވެ.

އީރާނުގެ ރެޑް ކްރެސެންޓުން ބުނާ ގޮތުގައި، ހޮނިހިރު ދުވަހުން ފެށިގެން އެމެރިކާއާއި އިސްރާއީލުން ދެމުންދާ ހަމަލާތަކުގައި އީރާނުން މިހާތަނަށް 201 މީހުން މަރުވެ، 747 މީހުން ވަނީ ޒަހަމްވެފައެވެ.

މީގެ ބަދަލުހިފުމުގެ ގޮތުން އީރާނުން ދަނީ އިސްރާއީލުގެ އިތުރުން، އެމެރިކާގެ އަސްކަރީ މަރުކަޒުތައް ހުންނަ ގަލްފުގެ ގައުމުތަކަށް ވެސް ހަމަލާދެމުންނެވެ. މިގޮތުން ގަތަރު، ޔޫއޭއީ، ބަހްރޭން، އިރާގު، އުރުދުން، ކުވެއިތު، އޮމާން އަދި ސައުދީ އަރަބިއްޔާއަށް އީރާނުގެ މިސައިލާއި ޑްރޯން ހަމަލާތައް ވަނީ އަމާޒުވެފައެވެ.