ދިރޭ މަސް އެކްސްޕޯޓްކުރުމުގެ ހުއްދަ ދޫކުރުން ދަނޑުވެރިކަމާއި ދިރޭތަކެއްޗާ ބެހޭ ވުޒާރާއަށް ބަދަލުކޮށްފި

މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން މީގެކުރިން ދޫކުރަމުންދިޔަ ދިރޭ މަސް އެކްސްޕޯޓްކުރުމުގެ ހުއްދައާއި، އެފަދަ ޝިޕްމެންޓްތަކަށް ދޫކުރާ އިންޓަނޭޝަނަލް ވެޓެރިނަރީ ހެލްތް ސަރޓިފިކެޓް ދޫކުރުން ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ ދަށަށް ބަދަލުކޮށްފިއެވެ.

މި ބަދަލާ ގުޅިގެން، ރާއްޖެއިން ދިރޭ މަސް ބޭރުކުރުމަށް ބޭނުންވާ ހުއްދަތައް ދެން ދޫކުރާނީ ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިންނެވެ. އެ ވުޒާރާއިން ހާމަކުރެއްވި ގޮތުގައި، އެކްސްޕޯޓް ހުއްދައަށް އެދި ހުށަހަޅަންޖެހޭނީ އެ ވުޒާރާގެ އޮންލައިން ޕޯޓަލް (aos.egov.mv) މެދުވެރިކޮށެވެ.

އަލަށް ހުއްދައަށް އެދޭ ކުންފުނިތަކުން، އެ ކުންފުންޏަކާއި ހުއްދައަށް އެދޭ ފަރާތުގެ އީފާސް ލިންކް ކުރުމަށްޓަކައި، ކުންފުނީގެ ރަޖިސްޓްރީއާއި އައިޑީ ކާޑުގެ ކޮޕީ ވުޒާރާއަށް މެއިލް ކުރަންޖެހޭނެއެވެ. އެކްސްޕޯޓް ހުއްދަ ދޫކުރުމަށް 2 އާއި 3 ރަސްމީ ދުވަސް ހޭދަވާނެތީ، ދުރާލާ ހުއްދައަށް އެދުމަށް ވުޒާރާއިން އިރުޝާދު ދެއްވައެވެ. އަދި ހުއްދައަށް އެދޭއިރު، އެކްސްޕޯޓް ކުރާނެ ބާވަތްތަކާއި އަދަދު ހިމެނުމަށްވެސް ވަނީ އެދިފައެވެ.

އިންޓަނޭޝަނަލް ވެޓެރިނަރީ ހެލްތް ސަރޓިފިކެޓް ދޫކުރުމާ ގުޅޭގޮތުން އެ ވުޒާރާއިން ވިދާޅުވީ، މި ސަރޓިފިކެޓް ދޫކުރެވޭނީ ވުޒާރާގެ ވެޓެރިނޭރިއަނަކު އެއާޕޯޓަށް ހާޒިރުވެ، ޝިޕްމެންޓް ބަލައި ފާސްކުރުމަށްފަހުގައެވެ. އެހެންކަމުން، ޝިޕްމެންޓް ތައްޔާރުކުރުމުގެ މަދުވެގެން 6 ގަޑިއިރު ކުރިން އެކަން ވުޒާރާއަށް އަންގަންވާނެއެވެ. އަދި ވެލާނާ އިންޓަނޭޝަނަލް އެއާޕޯޓަށް ޝިޕްމެންޓް ގެންދާނެ ވަގުތުވެސް މެއިލް މެދުވެރިކޮށް އަންގަންޖެހެއެވެ.

ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން އިތުރަށް ވިދާޅުވީ، ދުރާލާ ހުއްދަ ނުހޯދާ ނުވަތަ ޝިޕްމެންޓް ފޮނުވާކަން ނާަންގާ ފަރާތްތަކަށް ސަރޓިފިކެޓް ދޫކުރުމުގައި ދަތިތަކާ ކުރިމަތިވާނެ ކަމަށެވެ. އަދި މިފަދަ ސަބަބުތަކާހުރެ އިންސްޕެކްޝަން ލަސްވެ، ޝިޕްމެންޓަށް ލިބޭ އެއްވެސް ގެއްލުމަކަށް އެ ވުޒާރާއިން ޒިންމާ ނުވާނެ ކަމަށްވެސް ވަނީ ބަޔާންކޮށްފައެވެ.