ގިރާވަރު ފަޅަށްފަހު ދެން ހިއްކަން ފަށާނީ އުތުރު ތިލަފަޅު: ރައީސް މުޢިއްޒު

ގިރާވަރު ފަޅު ހިއްކުމުގެ މަސައްކަތް ނިމުމާއެކު، ދެން އެންމެ އަވަހަށް ބިން ހިއްކުމުގެ މަޝްރޫޢު ފަށާނީ އުތުރު ތިލަފަޅުގައި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، އުތުރު ތިލަފަޅަކީ މީހުން ދިރިއުޅުމަށާއި ސިނާޢީ މަސައްކަތްތަކަށް ޚާއްސަކޮށްގެން ތަރައްޤީކުރާ ރަށެއް ކަމަށެވެ. މިގޮތުން އެ ރަށުގައި މީހުން ދިރިއުޅޭނެ ސަރަޙައްދެއްގެ އިތުރުން، ސިނާޢީ މަސައްކަތްތަކާއި "ހޯޕް އައިލެންޑް" ވެސް ތަރައްޤީ ކުރެވިގެންދާނެ ކަމަށް އެމަނިކުފާނު ވިދާޅުވިއެވެ.

އުތުރު ތިލަފަޅުގައި ކުރިއަށްގެންދާ އެންމެ ބޮޑު އެއް މަޝްރޫޢަކީ 200 ހެކްޓަރުގެ ބޮޑު އެގްރިކަލްޗަރ އިކޮނޮމިކް ޒޯނެވެ. މި ޒޯނުގެ ފުރަތަމަ ފިޔަވަހީގައި ގްރީން ހައުސްތައް ގާއިމުކޮށް، ރާއްޖެއަށް އެތެރެކުރާ ބާވަތްތައް ހެއްދުމަށް ހަމަޖެހިފައިވާއިރު، ދެވަނަ ފިޔަވަހީގައި ފިޔާ އަދި އަލުވި ފަދަ ބާވަތްތަކާއި، ރާއްޖެއަށް ބޭނުންވާ މިންވަރަށް ބިސް އުފެއްދޭނެ ޕޯލްޓްރީ ފާމެއް ވެސް ތަރައްޤީ ކުރެވޭނެއެވެ.

މީގެ އިތުރުން، ކުށުގެ މާޙައުލަށް ހުށައެޅޭ ކުދިން އިޞްލާޙުކޮށް ރީހެބިލިޓޭޓް ކުރުމަށްޓަކައި "ހޯޕް އައިލެންޑް" ގެ ނަމުގައި ޚާއްސަ މަރުކަޒެއް އެ ރަށުގައި ބިނާކުރާނެއެވެ. 700 މީހުންގެ ޖާގަ ހިމެނޭ މި މަޝްރޫޢަށް އުތުރު ތިލަފަޅުން 15 ހެކްޓަރުގެ ބިން ހިއްކުމަށް ވަނީ ނިންމާފައެވެ.

ސަރުކާރުން މިހާރުވެސް އަންނަނީ މާލެ ސަރަޙައްދުގެ ބިން ހިއްކުމުގެ މަސައްކަތް ބާރު ދުވެލީގައި ކުރިއަށް ގެންދަމުންނެވެ. އެގޮތުން ހުޅުމާލެ 3 ވަނަ ފިޔަވަހި ހިއްކާ ނިމިފައިވާއިރު، ރަސްމާލެ އާއި ގިރާވަރު ފަޅު ހިއްކުމުގެ މަސައްކަތްވެސް ދަނީ ހަލުވިކަމާއެކު ކުރިއަށެވެ. ގިރާވަރު ފަޅުން މިހާތަނަށް 15 ހެކްޓަރަށްވުރެ ބޮޑު ސަރަޙައްދެއް ވަނީ ހިއްކާ ނިންމާލާފައެވެ.