ދަތިކަމެއް ނެތި ޑޮލަރު ލިބޭނެ: ވަޒީރު ސަޢީދު

ރާއްޖެއަށް ޑޮލަރުގެ ތާށިކަމެއް ނެތް ކަމަށާއި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންނަށް ވެވަޑައިގެންނެވި ވަޢުދުފުޅުތަކާ އެއްގޮތަށް ކަންކަން ކުރިއަށްދާނެ ކަމުގެ ޔަޤީންކަން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ދެއްވައިފިއެވެ.

އިޤްތިޞާދީ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ސަޢީދު ވިދާޅުވީ، ރާއްޖެއިން ބޭރަށް ފުރާ ދިވެހިންނަށް އެއާޕޯޓުން ދޫކުރާ 500 ޑޮލަރު، 1,000 ޑޮލަރަށް އިތުރުކުރުމަށް ރައީސް ވެވަޑައިގެންފައިވާ ވަޢުދުފުޅު ފުއްދުމުގެ މަސައްކަތް ބޭންކް އޮފް މޯލްޑިވްސް މެދުވެރިކޮށް ހަމަޖެހެމުންދާ ކަމަށެވެ. ރައީސް މުޢިއްޒު ކުރިން ވިދާޅުވެފައިވަނީ ޑޮލަރު މާރުކުރުމުގެ ޤަވާއިދު ރަނގަޅަށް ތަންފީޒުކުރެވޭނަމަ، މިއަހަރުގެ ފުރަތަމަ ކުއާޓަރުން ފެށިގެން މި ބަދަލު ގެންނަވާނެ ކަމަށެވެ.

ވަޒީރު އިތުރަށް ފާހަގަކުރެއްވި ގޮތުގައި، މި ރަމަޟާން މަހު މުދާ އިމްޕޯޓުކުރާ ފަރާތްތަކަށް ލުއިދިނުމުގެ ގޮތުން، ޓީޓީ ހަދަން ބޭނުންވާ ފަރާތްތަކަށް ހަފްތާއަކު 1.2 މިލިއަން ޑޮލަރާ ހަމައަށް 15.42 ގެ ރޭޓުގައި ޑޮލަރު ދޫކުރަމުންދެއެވެ. "ރައީސް ވިދާޅުވި ގޮތަށް އެ އެރޭންޖްމަންޓްތައް ބޭންކް އޮފް މޯލްޑިވްސް އިން ވާނީ ހަމަޖައްސައިދީފައި. އެ އޮތް ޑެޑްލައިންތަކަށް ކަންކަން ހަމަޖެހެމުންދާނެ،" ވަޒީރު ވިދާޅުވިއެވެ.

މީގެ އިތުރުން، މި ސަރުކާރުން މިހާތަނަށް ވެސް ޑޮލަރު ދޫކުރާ މިންވަރު އިތުރުކޮށްފައިވާކަން ވަޒީރު ފާހަގަކުރެއްވިއެވެ. އެގޮތުން ޙައްޖާއި ޢުމްރާއަށް ދާ ފަރާތްތަކަށާއި ބޭރުގައި ކިޔަވާ ދަރިވަރުންނަށް އެއްވެސް ދަތިކަމެއް ނެތި މިހާރު ވެސް ޑޮލަރު ލިބެމުންދާ ކަމަށް އޭނާ ވިދާޅުވިއެވެ. ސަރުކާރުގެ އަމާޒަކީ ނިޒާމީ ގޮތެއްގައި އޮތް ބޭރު ފައިސާގެ ކަޅު ބާޒާރުގެ މައްސަލަ ހައްލުކޮށް، ސަރުކާރު ހިއްސާވާ ކުންފުނިތައް އެ ބާޒާރަށް ބަރޯސާވުން ހުއްޓުވުމެވެ.

ރާއްޖޭގެ ބޭރު ފައިސާގެ ރިޒާވް ވަރުގަދަކުރުމަށްޓަކައި މިދިޔަ އަހަރު އަލަށް ތަޢާރަފުކުރި ބޭރު ފައިސާގެ ޤާނޫނު މިހާރު އަންނަނީ ތަންފީޒުކުރަމުންނެވެ. މި ޤާނޫނުގެ ދަށުން ފަތުރުވެރިކަމުގެ ދާއިރާގެ ވިޔަފާރިތަކުން ކޮންމެ ފަތުރުވެރިއަކަށް ކަނޑައެޅިފައިވާ ވަކި ނިސްބަތަކުން ބޭންކުތަކަށް ޑޮލަރު މާރުކުރަން ޖެހެއެވެ. އަދި އެހެނިހެން ވިޔަފާރިތަކުން ލިބޭ އާމްދަނީގެ 20 އިންސައްތަ ބޭންކުތަކަށް މާރުކުރުން ވަނީ ލާޒިމްކޮށްފައެވެ.