ދަނޑުވެރިކަމުގެ އުފެއްދުންތަކަށް ރާއްޖޭގައި އަގު އެއްކުރުމުގެ މަސައްކަތް ފަށަނީ

ދިވެހި ދަނޑުވެރިން އުފައްދާ އުފެއްދުންތަކަށް ރާއްޖޭގައި އަގު އެއްކުރުމުގެ (ވެލިއު އެޑިޝަން) މަސައްކަތް ވަރަށް އަވަހަށް ފެށިގެންދާނެ ކަމަށް ދަނޑުވެރިކަމާއި ޖަނަވާރާ ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.

 ވަޒީރު މިފަދައިން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، އެ ވުޒާރާއިން ކުރިއަށްގެންދާ ތަރައްގީގެ މަޝްރޫއުތަކުގެ ތަފުސީލު ހިއްސާކުރައްވަމުންނެވެ.

ވަޒީރު ވިދާޅުވި ގޮތުގައި ދަނޑުވެރިކަމުގެ އުފެއްދުންތަކަށް އަގު އެއްކުރުމުގެ މަސައްކަތް ހާއްސަ ގޮތެއްގައި ކުރިއަށް ގެންދިއުމަށް ށ. ގޮއިދޫގައި ވަނީ މަރުކަޒެއް ގާއިމުކޮށްފައެވެ. ސާކްގެ އެހީތެރިކަމާއެކު ކުރިއަށްގެންދާ މި މަޝްރޫއުގެ ދަށުން ގާއިމުކުރި މި ފެސިލިޓީއަށް ބޭނުންވާ މެޝިނަރީއާއި އެހެނިހެން ސާމާނު ހޯދުމަށް މިހާރު ވަނީ އިއުލާނުކޮށްފައެވެ.

"ށ. ގޮއިދޫގައި ވެލިއު އެޑިޝަން ފެސިލިޓީއެއް ގާއިމުކޮށްފައިވޭ. މި ފެސިލިޓީއަށް ބޭނުންވާ މެޝިނަރީއާއި ތަކެތި ހޯދަންވަނީ އިއުލާނުކޮށްފައި. އިރާދަކުރެއްވިއްޔާ ވަރަށް އަވަހަށް ށ. ގޮއިދޫގައި ވެލިއު އެޑެޑް ތަކެތި އުފައްދަން ފަށާނެ،" ވަޒީރު ވިދާޅުވިއެވެ.

މީގެ އިތުރުން، މުރަނގަ އުފައްދާ މިންވަރު އިތުރުކޮށް، މުރަނގައިން އަގު އެއްކޮށްފައިވާ ތަކެތި އުފެއްދުމަށް ހާއްސަ މަޝްރޫއެއް ހިންގުމަށް ސަރުކާރުން ވަނީ ރާވާފައެވެ. މި މަޝްރޫއުގެ ދަށުން ބޭނުންވާ މެޝިނަރީތައް މި އަހަރު ތެރޭގައި ހޯދައި، އަގު އެއްކުރުމުގެ ތަމްރީނުތައް ދިނުމުގެ މަސައްކަތްވެސް މިއަހަރުގެ ތެރޭގައި ފެށުމަށް ވަނީ ހަމަޖެހިފައެވެ.

ދަނޑުވެރިކަމުގެ ދާއިރާ ފުޅާކުރުމުގެ ގޮތުން، ރާއްޖޭގެ 13 ރަށެއްގައި ފަތްކެޔޮ އާލާކުރުމަށް ބިންތަކެއް ހާއްސަކޮށްފައިވާ ކަމަށްވެސް ވަޒީރު ފާހަގަކުރެއްވިއެވެ. މި ރަށްރަށަށް ބޭނުންވާ ގަސްކާނާއާއި އެހެނިހެން ވަސީލަތްތައް ފޮނުވައި، ފަތްކެޔޮ އުފައްދާ މިންވަރު އިތުރުކުރުމުގެ އަމަލީ މަސައްކަތްތައް ކުރިއަށްދާނެ ކަމަށް ޑރ. މާރިޔާ ވިދާޅުވިއެވެ.