ފަރަންސޭސިވިލާތުން ދިވެހިރާއްޖެއަށް ކަނޑައަޅާފައި ހުންނަވާ އޮނޮރަރީ ކޮންސުލްއަށް ޚާރިޖީ ވަޒީރު އެގްޒެކުއަޓަރ އަރުވައިފި

ފަރަންސޭސިވިލާތުން ދިވެހިރާއްޖެއަށް ކަނޑައަޅުއްވާފައި ހުންނަވާ އޮނަރަރީ ކޮންސުލް، އަލްފާޟިލާ ފާތިމަތު ޒުރައިޤް މުޙައްމަދަށް، ދިވެހިރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް މިއަދު އެގްޒެކުއަޓަރ އަރުވައިފިއެވެ.

މިކަމަށްޓަކައި ބޭއްވި ރަސްމިއްޔާތަށްފަހު، ވަޒީރު ޑރ. ޚަލީލް ވަނީ އެކަމަނާ އަށް މަރުޙަބާ ދަންނަވައި، މަޤާމުގެ މަސްޢޫލިއްޔަތުތައް ފުރިހަމައަށް އަދާކުރައްވާނެ ކަމުގެ އިތުބާރު އޮތްކަން ހާމަކުރައްވާފައެވެ. އަދި ދިވެހިރާއްޖެއާއި ފަރަންސޭސިވިލާތާ ދެމެދު އޮންނަ ޒަމާންވީ ރަޙްމަތްތެރިކަމުގެ ގުޅުން، ޚާއްޞަކޮށް ފަތުރުވެރިކަމާއި ވިޔަފާރީގެ ދާއިރާއިން އިތުރަށް ހަރުދަނާކުރުމަށް ސަރުކާރުން ދޭ އަހައްމިއްޔަތުކަން ވަޒީރު ތަކުރާރު ކުރެއްވިއެވެ.

މީގެ އިތުރުން، އޮނަރަރީ ކޮންސުލް ވަނީ ޚާރިޖީ ވަޒީރަށް ޝުކުރު އަދާކުރައްވައި، ރާއްޖޭގައި ދިރިއުޅޭ އަދި ޒިޔާރަތްކުރާ ފަރަންސޭސި ރައްޔިތުންނަށް ފޯރުކޮށްދޭންޖެހޭ ޚިދުމަތްތައް ދިނުމުގައި ދެމިހުންނަވާނެ ކަމުގެ ޔަޤީންކަން ދެއްވާފައެވެ. ހަމަ އެއާއެކު، ދެ ޤައުމުގެ ދެމެދުގައި އޮތް ގުޅުން އާ ހިސާބަކަށް ގެންދިއުމަށްޓަކައި ރާއްޖޭގެ ކަމާބެހޭ މުއައްސަސާތަކާ ގުޅިގެން ގާތުން މަސައްކަތް ކުރައްވާނެ ކަމަށްވެސް އެކަމަނާ ވަނީ ވިދާޅުވެފައެވެ.

އޮނަރަރީ ކޮންސުލުންނަކީ، އެ ބޭފުޅުން ތަމްސީލުކުރައްވާ ޤައުމުތަކުގެ ރައްޔިތުންނަށް ކޮންސިއުލަރ އެހީތެރިކަން ފޯރުކޮށްދިނުމަށާއި، ދެ ޤައުމުގެ ދެމެދުގައި އޮންނަ ގުޅުން ބަދަހިކުރުމަށް އައްޔަންކުރެވޭ ބޭފުޅުންނެވެ.

އެގްޒެކުއަޓަރ އެރުވުމާއެކު، ފާތިމަތު ޒުރައިޤް މުޙައްމަދު މިހާރު ވަނީ ރަސްމީކޮށް ފަރަންސޭސިވިލާތުން ރާއްޖެއަށް ކަނޑައަޅުއްވާފައި ހުންނަވާ އޮނަރަރީ ކޮންސުލްގެ މަސްއޫލިއްޔަތުތަކާ ޙަވާލުވެވަޑައިގަންނަވާފައެވެ.