"ސަރުކާރުން އެޅުއްވި ހަރުދަނާ ފިޔަވަޅުތަކާއެކު އެސްޓީއޯ އިން ވިއްކާ އަސާސީ ކާބޯތަކެތީގެ އަގުތައް އެއްވަރެއްގައި ވަނީ ހިފެހެއްޓިފައި"

ސަރުކާރުން އެޅުއްވި ހަރުދަނާ ފިޔަވަޅުތަކާއެކު އެސްޓީއޯ އިން ވިއްކާ އަސާސީ ކާބޯތަކެތީގެ އަގުތައް އެއްވަރެއްގައި ވަނީ ހިފެހެއްޓިފައިކަމަށް އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ވިދާޅުވެއްޖެއެވެ.

އެ ވުޒާރާއިން ވިދާޅުވީ، ރަމަޟާން މަހުގެ ގާތްގަނޑަކަށް މެދާ ހަމައަށް އައިއިރުވެސް، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ވިއްކާ އަސާސީ ކާބޯތަކެތީގެ ބާވަތްތައް ރާއްޖޭގެ ހުރިހާ ސަރަޙައްދަކުންވެސް ހެޔޮ އަގުގައި ލިބެން ހުރިކަން ސަރުކާރުން ކަށަވަރުކޮށްދީފައިވާ ކަމަށެވެ.

އެގޮތުން، މި ބަރަކާތްތެރި ރަމަޟާން މަހަށް ތައްޔާރުވުމުގެ ގޮތުން، ގަނޑުކޮށް މުދާ ހޯދުމާއި ރަށްރަށަށް މުދާ ފޯރުކޮށްދިނުމުގައި ދުރާލައި އެޅި ހަރުދަނާ ފިޔަވަޅުތަކުގެ ސަބަބުން، މުދަލަށް އޮތް ޑިމާންޑް ބޮޑުވި ނަމަވެސް ބާޒާރުގެ އަގުތައް އެއްވަރެއްގައި ހިފެހެއްޓިފައިވާކަމަށް އެ ވުޒާރާއިން ވިދާޅުވިއެވެ. އަދި ވަކިން ޚާއްޞަކޮށް އަސާސީ ކާބޯތަކެތީގެ ލިސްޓަށް އިތުރުކުރެވުނު 23 ބާވަތާއެކު، ހަނޑޫ، ހަކުރު އަދި ފުށް ހިމެނޭހެން ޖުމުލަ 26 ބާވަތެއްގެ އަގު އިންތިހާއަށް އުފުލިގެން ނުދާނޭހެން އެސްޓީއޯއިން ކަނޑައަޅާފައިވާ ހެޔޮ އަގުތަކުގެ ސަބަބުން ބާޒާރުގައި ތަކެތީގެ އަގު ހިފެހެއްޓިފައިވާކަން އެ ވުޒާރާއިން ވަނީ ފާހަގަކުރައްވާފައެވެ.

މީގެ އިތުރުން، ކުރިއަށް އޮތް ހަފްތާތަކުގައި ވެސް މުދާ މެދުނުކެނޑި ލިބޭނެކަން ކަށަވަރުކުރުމަށްޓަކައި، އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ދަނީ ބާޒާރުގައި ތަކެތީގެ އަގުތައް ހުރި މިންވަރު މޮނިޓަރކޮށް، ކަމާބެހޭ ފަރާތްތަކާ ގުޅިގެން ކުރަންޖެހޭ އެންމެހައި މަސައްކަތްތައް ކުރަމުންނެވެ.

މިއީ ރައްޔިތުންނަށް މެދުކެނޑުމެއް ނެތި، ހެޔޮ އަގުގައި މުދާ ފޯރުކޮށްދީ، މި ރަމަޟާން މަހު ޢާއިލާތަކުން އުފުލަންޖެހޭ މާލީ ބުރަ ކުޑަކޮށްދީ، ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށް ސަރުކާރުން ކުރާ މުހިންމު މަސައްކަތެކެވެ.