ކަރަންޓު ޑިސްޓްރިބިއުޝަން ފޮށިތަކުގައި ޕޯސްޓަރާއި ސްޓިކަރ ހަރުނުކުރުމަށް ސްޓެލްކޯ އިން އެދިއްޖެ

ސްޓެލްކޯގެ އެކި އިމާރާތްތަކުގެ ފާރުތަކާއި، ކަރަންޓު ޑިސްޓްރިބިއުޝަން ފޮށިތަކުގައި ޕޯސްޓަރާއި ސްޓިކަރ ހަރުނުކުރުމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް، ސްޓެލްކޯއިން އިން އެދިއްޖެއެވެ.

ސްޓެލްކޯއިން ވިދާޅުވީ، އެ ކުންފުނިން ޚިދުމަތްދޭ ސަބްސްޓޭޝަން އިމާރާތްތަކާއި، ސަބްސްޓޭޝަން ޢިމާރާތްތަކުގެ ފާރުތަކުގެ ބޭރުގައި އަދި ޑިސްޓްރިބިއުޝަން ފޮށިތަކުގެ ބޭރުގައި އެކި ފަރާތްތަކުން ޕޯސްޓަރު، ސްޓިކަރ ފަދަ ތަކެތި ތަތްކުރަމުންދާކަން ތަކުރާރުކޮށް ފާހަގަކުރެވިފައިވާ ކަމަށެވެ. އަދި މިކަމުގެ ސަބަބުން ޑިސްޓްރިބިއުޝަން ފޮށި ހުޅުވާ، ކުރަންޖެހޭ މަސައްކަތްތައް ކުރުމަށް އެކި ދަތިތައް ދިމާވަމުންދާކަމަށް އެ ކުންފުނިން ވަނީ ފާހަގަކުރައްވާފައެވެ.

މީގެ އިތުރުން އެ ކުންފުނިން ވިދާޅުވީ، ސަބްސްޓޭޝަން ޢިމާރާތްތަކުގެ ބޭރުގައި ހަރުކޮށްފައިވާ އިންޒާރު ނުވަތަ ނުރައްކާ ބޯޑުތަކުގެ މަތީގައި ސްޓިކަރ އަދި ޕޯސްޓަރ ތަތްކުރުމުގެ ސަބަބުން ރައްކާތެރިކަމާއެކު ދެމެހެއްޓެނެވި ގޮތެއްގައި ކަރަންޓުގެ ޚިދުމަތް ދިނުމަށް އެ ކުންފުނިން ކުރަމުންދާ މަސައްކަތްތަކަށް ހުރަސް އެޅޭކަމަށެވެ.

އެހެންކަމުން، އެ ސަރަޙައްދުތަކުގައި ޕޯސްޓަރ އަދި ސްޓިކަރ ފަދަ އެއްވެސް އެއްޗެއް ތަތްނުކުރުމަށް ސްޓެލްކޯއިން ވަނީ ރައްޔިތުންގެ ކިބައިން އެދިފައެވެ.