އެމެރިކާއާއި އިޒްރޭލުން އީރާނުގެ ނިއުކްލިއަރ މަރުކަޒަށް ދިން ހަމަލާތަކުގައި ރޭޑިއޭޝަން ލީކެއް ނުވާކަމަށް ބުނެފި

އެމެރިކާއާއި އިޒްރޭލުން ގުޅިގެން އީރާނުގެ ނިއުކްލިއަރ މަރުކަޒަކަށް ދިން ވައިގެ ހަމަލާތަކާ ގުޅިގެން، އެއްވެސް ވަރަކަށް ރޭޑިއޭޝަން ބޭރުވެފައި ނުވާކަމަށް އީރާނުގެ މީޑިއާތަކުން ރިޕޯޓްކޮށްފިއެވެ.

އީރާނުން ބުނި ގޮތުގައި، އެމެރިކާއާއި އިޒްރޭލުގެ އަސްކަރީ ފައުޖުތަކުން ހަމަލާ އަމާޒުކޮށްފައިވަނީ އެ ގައުމުގެ ނަޠަންޒްގައި ހުންނަ ނިއުކްލިއަރ މަރުކަޒަށެވެ. ނަމަވެސް، މި ހަމަލާތަކަށްފަހު އެ ސަރަހައްދުގެ ތިމާވެއްޓަށް ނުރައްކާވާ ފަދަ އެއްވެސް ރޭޑިއޯއެކްޓިވް މާއްދާއެއް ލީކުވެފައިވާކަން ރެކޯޑް ކުރެވިފައެއް ނުވެއެވެ.

އދ. ގެ ނިއުކްލިއަރ ވޮޗްޑޮގަށް އީރާނުން ކަނޑައަޅުއްވާފައި ހުންނަވާ ސަފީރު ހޯމަ ދުވަހު ވިދާޅުވީ، އެމެރިކާއާއި އިޒްރޭލުން އީރާނާ ދެކޮޅަށް ހިންގި އަސްކަރީ އޮޕަރޭޝަންތަކުގެ ތެރެއިން އެ މަރުކަޒަށް ހަމަލާދީފައިވާ ކަމަށެވެ. މިއީ ބައިނަލްއަގުވާމީ ގާނޫނުތަކާ ޚިލާފަށް ދީފައިވާ ހަމަލާތަކެއްގެ ގޮތުގައި އީރާނުން ސިފަކުރެއެވެ.

މި ހަމަލާތަކަކީ އީރާނުގެ ނިއުކްލިއަރ ޕްރޮގްރާމަށް ހުރަސްއެޅުމުގެ ގޮތުން އެމެރިކާއާއި އިޒްރޭލުން ދެމުންދާ ހަމަލާތަކުގެ ތެރެއިން ދީފައިވާ ހަމަލާއެކެވެ. އީރާނުގެ އޮފިޝަލުން ވިދާޅުވާ ގޮތުގައި، ހަމަލާގެ ސަބަބުން ލިބުނު ގެއްލުންތައް ދެނެގަތުމުގެ މަސައްކަތް މިހާރު ދަނީ ކުރަމުންނެވެ.