މަތިވެރީ ޔޫ.އެސް.ސީ 26 ވަނަ ޤުރްއާން މުބާރާތް ނިންމާލައިފި، މިއަހަރު "އުޖާލާ ނޫރު" ގެ މަޤާމަށް މުޠީޢު!

އއ. މަތިވެރީގައި ހިންގާ ޖަމްޢިއްޔާއެއް ކަމަށްވާ ޔުނިއަން ސްޕޯޓްސް ކްލަބް (ޔޫ.އެސް.ސީ) ގެ 26 ވަނަ ޤުރްއާން މުބާރާތް ކާމިޔާބުކަމާއެކު ނިންމާލައިފި އެވެ.

މިއީ ޔޫ.އެސް.ސީ އިން ކޮންމެ އަހަރަކު އެއްފަހަރު، އަރިއަތޮޅު އުތުރުބުރީގެ ހުރިހާ ރަށަކަށް ހުޅުވާލައިގެން "އުޖާލާ ނޫރު" ގެ ނަމުގައި ކުރިއަށްގެންދާ ޤުރްއާން މުބާރާތެކެވެ.

ޔޫ.އެސް.ސީ އިން މަޢުލޫމާތުދޭ ގޮތުގައި، މި މުބާރާތް ބޭއްވުމުގެ މަޤްޞަދަކީ ހިތްތަކުގެ ނޫރެއްކަމުގައި ކީރިތި ޤުރްއާން ހެދުމަށްޓަކައި އެކަމަށް އެހީތެރިކަން ފޯރުކޮށްދިނުމާއި، ތުއްތު ކުދިންނާއި ބޮޑެތި މީހުންގެ ކިބައިގައި ކީރިިތި ޤުރްއާން ކިޔެވުމަށާއި، އަޑުއެހުމަށް ޝައުޤުވެރިކަން އުފެއްދުމެވެ. ހަމަ އެހެންމެ، އެންމެ ރީތިކޮށް ޤުރްއާން ކިޔަވާ ކުދިން ފާހަގަކޮށް، އެކުދިންގެ ކިޔެވުން ބަލައިގަނެ، އެ ކުދިންނަށް ހިތްވަރުދިނުމާއި، ޤުރްއާން ކިޔެވުމުގައި ތާއަބަދަށް ދެމިހުރުމަށް އެހީތެރިކަން ފޯރުކޮށްދިނުމަކީ ވެސް މި މުބާރާތުގެ މަޤްޞަދެއްކަމަށް އެ ކްލަބުން ވަނީ ބުނެފައެވެ.

މިމަހުގެ 19 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް މަތިވެރީގައި ކުރިއަށްގެންދިޔަ މި މުބާރާތުގައި، 9 އަހަރާއި 45  އަހަރުން މަތީގެ ކޮންމެ ބައިވެރިއަކަށް ވަނީ ގުރުއަތުން ނެގޭ 3 ސުވާލެއް ކޮށްފައެވެ. މީގެ ތެރޭގައި، ޙިފްޡް 2 ސުވާލާއި، ތިލާވާ 1 ސުވާލާއި، ތިލާވާގެ ބައިން ތަޖްވީދުގެ 1 ސުވާލު ހިމެނެއެވެ. މީގެ އިތުރުން، މި މުބާރާތުގައި 4 އަހަރުން ދަށުގެ އުމުރުފުރާއެއް އެކުލަވާލާފައިވާއިރު، އެ އުމުރުފުރާގެ ބައިވެރިންނަށް ބޭނުން ސޫރަތެއް ކިޔެވުމުގެ ފުރުޞަތު ވަނީ ދީފައެވެ.

މި މުބާރާތުގައި ބައިވެރިވެ ކިޔެވި 4 އަހަރުން ދަށުގެ އުމުރުފުރާގެ ކޮންމެ ބައިވެރިއަކަށް ވެސް ވަނީ ހަދިޔާއެއް ދީފައެވެ.  ހަމަ އެއާއެކު، މި މުބާރާތުގެ 6-9 އަހަރުންދަށުގެ އުމުރުފުރާއިން އެންމެ މޮޅު 5 ދަރިވަރުން ހޮވާފައިވާއިރު، 9 އަހަރުން ދަށުން ފެށިގެން 45 އަހަރުން މަތީގެ އުމުރުފުރާއިން 1 ވަނަ، 2 ވަނަ، އަދި 3 ވަނަ ވަނީ ހޮވާފައެވެ. ހަމަ އެހެންމެ، މުޅި މުބާރާތުން ވެސް 1 ވަނަ، 2 ވަނަ، އަދި 3 ވަނަ ހޮވާފައިވާކަން ފާހަގަކޮށްލެވެއެވެ.

މިއަހަރުގެ މުބާރާތުގެ ނަތީޖާ ފާޅުކުރުމުގެ ޖަލްސާ ރޭ ބާއްވާފައިވާއިރު، މި ޖަލްސާ ޝަރަފްވެރިކޮށްދެއްވީ އިސްލާމީ ކަންތައްތަކާ ބެހޭ ވުޒާރާގެ ޑެޕިއުޓީ މިނިސްޓަރ އަލްއުސްތާޛް އަލީ ވަޙީދު އަބްދުލްރަޙްމާން އެވެ. މިއަހަރު މުޅި މުބާރާތުން 1 ވަނަ ޙާޞިލްކޮށް، "އުޖާލާ ނޫރު" ގެ މަޤާމު ހޯދާފައިވަނީ އަލްޙާފިޡް އިބްރާހިމް މުޠީޢު މުޙައްމަދު (ޒަމާނީކުލަ/އއ. މަތިވެރި) އެވެ. އަދި މުބާރާތުގެ ދެވަނަ ނާޢިމް ބިން ނާހިދު ހޯދާފައިވާއިރު، މުބާރާތުގެ ތިންވަނަ ޙާޞިލްކޮށްފައިވަނީ މުޙައްމަދު ރާޢީ ބިން ޝަމްސުﷲ އެވެ. މި މުބާރާތުގެ ވަނަވަނައަށް އައި ފަރާތްތަކަށް އަގުހުރި އިނާމުތަކެއް ދީފައިވާއިރު، މުޅި މުބާރާތުން 1 ވަނަ ޙާޞިލްކުރި ދަރިވަރަށް ޔޫ.އެސް.ސީ އާއި އަލް-ފަޖްރް ޙައްޖު އެންޑް ޢުމްރާ ގްރޫޕުގެ ފަރާތުން ވަނީ ޢުމްރާ ދަތުރެއް ހަދިޔާކޮށްފައެވެ.

މިއަހަރުގެ މުބާރާތާއި ގުޅިގެން ވާހަކަދައްކަވަމުން ޔޫ.އެސް.ސީގެ ރައީސް ހުސެއިން ޝަރީފް ވިދާޅުވީ، ކޮންމެ އަހަރެއްގެ މުބާރާތެކޭ އެއްފަދައިން މިއަހަރުގެ މުބާރާތް ވެސް ނިންމާލެވުނީ ގިނަ ފަރާތްތަކެއްގެ އެހީތެރިކަމާ އެކުގައި ކަމަށެވެ. އެގޮތުން، މިއަހަރުގެ މުބާރާތަށް ސްޕޮންސަރ ދިން ފަރާތްތަކުގެ ތެރޭގައި (ލަޕާލް، ކްރިސްޓަލް ކްރާފްޓް، ހައި ޓައިޑް، ނާރްމިލިއޯ، ލުއްލު ކޭޓަރިންގ ސީރީސް، އިރުބެ އެކަޑަމީ، އަލް-ފަޖްރް ޙައްޖު އެންޑް ޢުމްރާ، އެސްޔޫ ކޯނާ، ވެލާނާ ވައިބްސް، ވެލާނާ ވިއު، މައްޗަވަރު، ވެލި ބީޗް، އެރައިވަލް، އަދި މިނީ ޑައިމަންޑް) ހިމެނެއެވެ. މީގެ އިތުރުން، މުބާރާތް ހިންގުމަށް މަތިވެރީ ކައުންސިލްގެ ފަރާތުން ވަރަށް ބޮޑު އެހީތެރިކަމެއް ލިބިފައިވާކަން އެ ކްލަބުގެ ރައީސް ފާހަގަކުރެއްވިއެވެ.

މަތިވެރީގެ ކުދި ބޮޑު ރައްޔިތުންގެ ލާބައާއި މަންފާއަށްޓަކައި ޔޫ.އެސް.ސީ އިން ގިނަ މަސައްކަތްތަކެއް ކުރަމުން އަންނައިރު، އެ ކްލަބުގެ އަމާޒަކީ ކުރިއަށް އޮތް ތާނގައި ކްލަބުން ރާވާ ހިންގާ ޙަރަކާތްތައް އިތުރުކުރުންކަން ފާހަގަކޮށްލެވެއެވެ.