ސްޓޫޑެންޓް ލޯނަށް އެދުމުގެ ފުރުޞަތު ވަކި މުއްދަތެއް ނެތި މުޅި އަހަރަށް ހުޅުވާލަނީ

ސްޓޫޑެންޓް ލޯނަށް އެދި ހުށަހެޅުމަށް މިހާތަނަށް ކަނޑައަޅާފައި އޮންނަ ވަކި މުއްދަތު ނުވަތަ ޑެޑްލައިން އުވާލައި، މުޅި އަހަރު ދުވަހު ލޯނަށް އެދުމުގެ ފުރުޞަތު ހުޅުވާލުމަށް ސަރުކާރުން ނިންމަވައިފިއެވެ. މިކަން ހާމަކުރެއްވީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. ޢަލީ ޙައިދަރު އަޙްމަދެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ވިދާޅުވީ، 2026 ވަނަ އަހަރުގެ ލޯނު ސްކީމަށް މުހިންމު ބަދަލުތަކެއް ގެންނަން ސަރުކާރުން ނިންމަވާފައިވާ ކަމަށެވެ. މި ބަދަލުތަކުގެ ތެރެއިން އެންމެ ފާހަގަކޮށްލެވޭ އެއް ކަމަކީ އެޕްލިކޭޝަން ހުށަހަޅަން ވަކި ސުންގަޑިއެއް ނޯންނާނެ ގޮތަށް ހަމަޖެއްސުމެވެ.

ވަޒީރު ޑރ. ޙައިދަރު ވިދާޅުވި ގޮތުގައި، މިހާތަނަށް ވަކި މުއްދަތެއް ކަނޑައެޅިފައި އޮތުމުން ބައެއް ދަރިވަރުންނަށް ލޯނަށް އެދުމުގެ ފުރުޞަތު ގެއްލިފައިވާކަން ވަނީ ފާހަގަކުރެވިފައެވެ. ނަމަވެސް އާ އުސޫލުގެ ދަށުން ދަރިވަރުންނަށް ބޮޑެތި ފަސޭހަތަކެއް ލިބި، ކިޔަވަން ބޭނުންވާ ކޮންމެ ވަގުތަކުވެސް ލޯނަށް އެދުމުގެ މަގު ފަހިވެގެންދާނެއެވެ.

ލޯނަށް އެދޭއިރު ހުށަހަޅަންޖެހޭ މުހިންމު ލިޔުންތައް:

• ކުރު މުއްދަތެއްގެ ތެރޭގައި ކިޔެވުން ފެށޭގޮތަށް، ކިޔަވައިދޭ މަރުކަޒުން ދޫކޮށްފައިވާ ޕްލޭސްމަންޓް ނުވަތަ އޮފަރ ލެޓަރ.
  
• ޕްރޮގްރާމްގެ ފީ ސްޓްރަކްޗަރ. (ލޯނު އިޢުލާނުގައި ނުހިމެނޭ ގައުމެއްނަމަ، އިޢުލާނުކުރި ގައުމެއްގެ ފީއާ އަޅާކިޔޭނެ ލިޔުމެއް).
  
• އެމް.ކިޔު.އޭ. އިން ދޫކުރާ 'އިންޓެންޑެޑް ޕްރޮގްރާމް ރެކޮގްނިޝަން ލެޓަރ'.
  
• ރެގިޔުލޭޓަރީ އޮތޯރިޓީއެއްގެ ހުއްދަ ބޭނުންވާ ދާއިރާއެއްނަމަ، އެ އޮތޯރިޓީއަކުން އެ ޕްރޮގްރާމް ބަލައިގަންނަކަމުގެ ލިޔުން.

ވަޒީރު އިތުރަށް ވިދާޅުވީ، މި ފެށޭ ބަންދު ދުވަސްތަކަށްފަހު ލޯނަށް އެދުމުގެ ފުރުޞަތު ހުޅުވާލެވޭނެ ކަމަށާއި، ދަރިވަރުން ދުރާލާ ލިޔެކިޔުންތައް ތައްޔާރުކުރުމަކީ މުހިންމު ކަމެއް ކަމަށެވެ. އަދި ފުރިހަމަ އެޕްލިކޭޝަނެއް ހުށަހަޅާ ދަރިވަރުންނަށް ވީހާވެސް އަވަހަށް ފައިސާ ހަމަޖައްސައިދިނުމަށް ސަރުކާރުން މަސައްކަތް ކުރާނެ ކަމުގެ ޔަޤީންކަން ދެއްވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ ސްޓޫޑެންޓް ލޯނަކީ އިސްލާމީ ޝަރީޢާގެ ހަމަތަކަށް ފެތޭ (ޝަރީޢާ ކޮމްޕްލަޔަންޓް) ލޯނަކަށް ހެއްދެވުމުގެ ގޮތުން، ލޯނަށް އެއްވެސް އިތުރު ސަރވިސް ޗާޖެއް ނުނަގާ ގޮތަށް މިދިޔަ އަހަރު ހަމަޖައްސަވާފައެވެ.