މިދިޔަ ފެބްރުއަރީގެ ނިޔަލަށް ފުރަތަމަ ޑިގްރީގެ ފައިސާގެ ގޮތުގައި 556،174 ރުފިޔާ ދޫކޮށްފައިވޭ: ވަޒީރު ހައިދަރު

މިދިޔަ ފެބްރުއަރީގެ ނިޔަލަށް ފުރަތަމަ ޑިގްރީގެ ފައިސާގެ ގޮތުގައި ދަރިވަރުންނަށް 556،174 ރުފިޔާ ދޫކޮށްފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ވަޒީރު ވިދާޅުވީ، ފުރަތަމަ ޑިގްރީއަށް މިއަހަރުގެ ފެބްރުއަރީގެ ނިޔަލަށް 46 ދަރިވަރުންނަށް 556،174 ރުފިޔާ ދޫކުރެވިފައިވާ ކަމަށެވެ. ހަމަ އެހެންމެ، 2001 ދަރިވަރުންނަށް ލޯނުގެ ގޮތުގައި 20 މިލިއަނަށްވުރެ ގިނަ ރުފިޔާ ދޫކުރެވިފައިވާ ކަމަށާއި، 105 ދަރިވަރުންނަށް ސްކޮލަރޝިޕްގެ ގޮތުގައި 33.9 މިލިއަން ރުފިޔާ ދޫކުރެވިފައިވާކަން ވަޒީރު ވަނީ ފާހަގަކުރައްވާފައެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން މިހާރު ކުރިއަށްދާ އިތުރު މަސައްކަތްތަކަށް އަލިއަޅުއްވާލާ ވަޒީރު ވިދާޅުވީ، އެމްއެންއެސްޑީއޭގެ ޓެކްނިކަލް ޕެނަލް އަދި ސެކްޓަރ ކައުންސިލް މެންބަރުން ބައިވެރިވާ ކޮންމެ ބައްދަލުވުމަކަށް 500 ރުފިޔާގެ އެލަވަންސެއް ދިނުމަށް ރައީސުލްޖުމްހޫރިއްޔާ ނިންމަވާފައިވާ ކަމަށެވެ. ހަމަ އެހެންމެ، މަސައްކަތްތެރިންނާ ވަޒީފާދޭ ފަރާތްތަކުގެ އަގު ޤައުމީ ފެންވަރުގައި ވަޒަންކުރުމުގެ ގޮތުން "ނޭޝަނަލް ލޭބަރ އެވޯޑް" ދިނުމުގެ ޙަފްލާއެއް މިއަހަރުގެ ޖުލައި މަހު ބޭއްވުމަށް ތައްޔާރުވަމުންދާކަން ވަޒީރު ފާހަގަކުރެއްވިއެވެ.

މީގެ އިތުރުން، އެ ވުޒާރާގެ ޕްލޭނިންގް ޑިޕާޓްމަންޓުން ރިސާޗް ގްރާންޓު އެކުލަވާލައި، ޤައުމީ ޔުނިވާސިޓީ އާއި ވިލާ ކޮލެޖު އަދި އިސްލާމިކް ޔުނިވާސިޓީއާއެކު އެއްބަސްވުން ހަދައި، ދިރާސާ ކުރުމަށް ކޮންމެ މުވައްސަސާއަކަށް 1.5 މިލިއަން ރުފިޔާ ކަނޑައެޅިފައިވާކަމަށް ވަޒީރު ވިދާޅުވިއެވެ. އަދި ބޭރު ބަސް ދަސްކޮށްދިނުމަށް ފަތުރުވެރިކަމުގެ ދާއިރާއަށް އަމާޒުކޮށް 1000 ފުރުޞަތު ދީފައިވާއިރު، އޭގެތެރޭގައި އަރަބި، ފްރެންޗް، އަދި ޖަރުމަން ބަހާއި ކޮރެއަން ބަސްވެސް ހިމެނޭކަން ވަޒީރު ފާހަގަކުރެއްވިއެވެ.

ވަޒީރު އިތުރަށް ވިދާޅުވީ، 2026 ވަނަ އަހަރުގެ ޖަނަވަރީ އަދި ފެބްރުއަރީގައި 2006 ސަނަދެއް ވެލިޑޭޓްކޮށް، 1355 ދަރިވަރުންގެ ގްރެޖުއޭޝަން ހުއްދަ ދީފައިވާ ކަމަށެވެ.