ރ. އަތޮޅުގެ ދެ ރަށެއްގައި މަތީ ތަޢުލީމުގެ މުހިންމު މަޝްރޫޢުތަކެއް ހިންގުމަށް އެއްބަސްވުމެއްގައި ސޮއިކޮށްފި

ރ. އަތޮޅުގެ ދެ ރަށެއްގައި މަތީ ތަޢުލީމުގެ މުހިންމު މަޝްރޫޢުތަކެއް ހިންގުމަށް އެއްބަސްވުމެއްގައި ސޮއިކޮށްފި އެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ވިދާޅުވީ، އެއްބަސްވުން އެކުލަވާލާފައިވަނީ ރ. އިންނަމާދޫގައި ޓެކްނިކަލް ވޮކޭޝަން އެޑިޔުކޭޝަން އެންޑް ޓްރެއިނިންގ(ޓިވެޓް) ސެންޓަރެއް ބިނާކުރުމާއި، ރ.ހު ޅުދުއްފާރުގައި އެކޮމޮޑޭޝަން ފެސިލިޓީއެއް ޤާއިމުކުމުގެ މަސައްކަތްތައްކުރުމަށް ކަމަށެވެ.

އެ ވުޒާރާއިން ވިދާޅުވީ، އިންނަމާދޫ ޓިވެޓް ސެންޓަރު ޚާއްޞަކުރެވިފައިވަނީ ރާއްޖޭގެ ސަގާފީ އަދި އިޤްތިޞާދީ ގޮތުން މުހިންމު ދާއިރާއެއް ކަމަށްވާ ބޯޓް-ބިލްޑިންގ ނުވަތަ ދޯނިފަހަރު ބަނުމުގެ ދާއިރާއިން މީހުން ތަމްރީނު ކުރުމަށް ކަމަށެވެ. އަދި މަސައްކަތުގެ ދުވެލި އަވަސްކުރުމުގެ ގޮތުން މި އިމާރާތް ތައްޔާރުކުރާނީ ޕްރީ-ފެބް އުސޫލުން ކަމަށާއި، މި އިންސްޓިޓިއުޓްގައި ކިޔަވައިދިނުމަށް ބޭނުންވާނެ އެންމެހާ ޒަމާނީ ވަޞީލަތްތައް ޤާއިމުކުރެވޭނެކަމަށް އެ ވުޒާރާއިން މަޢުލޫމާތުދެއެވެ. މި މަޝްރޫޢުގެ މަސައްކަތް ކުރިއަށް ގެންދިއުމަށް ހަވާލުކުރެވިފައިވަނީ ސެންޓްރަލް ލައިން ޕވޓ. ލޓޑ. އާއެވެ.

މީގެ އިތުރުން، ހުޅުދުއްފާރުގައި ޤާއިމްކުރާ އެކަމަޑޭޝަން ފެސިލިޓީއަކީ، ދަރިވަރުންނަށް ބޭނުންވާ ބޯހިޔާވަހިކަން ފޯރުކޮށްދިނުމަށް ތަރައްޤީކުރާ ތަނެއްކަމަށް އެ ވުޒާރާއިން މަޢުލޫމާތުދެއެވެ. އަދި މި ފެސިލިޓީގައި ތަފާތު މޮޑެލްތަކުގެ އެކަމަޑޭޝަން ހިމެނޭއިރު، ދަރިވަރުންގެ ޢާއިލާތަކަށް އެކުގައި ތިބެވޭނެ ފަދަ 2 ކޮޓަރީގެ އަދި 3 ކޮޓަރީގެ އެޕާޓްމަންޓްތަކުގެ އިތުރުން، ވަކިން ދިރިއުޅެވޭނެ ސްޓޫޑިއޯ އެޕާޓްމަންޓްތައް ހުންނާނެކަމަށް އެ ވުޒާރާއިން ވިދާޅުވިއެވެ. އަދި ކޮންމެ އެޕާޓްމަންޓެއްގައިވެސް ކެއްކުމާއި ލޯންޑްރީ ފަދަ އަސާސީ ހުރިހާ ޚިދުމަތްތަކެއް ލިބޭއިރު، މި މަޝްރޫޢުގެ މަސައްކަތް ކުރިއަށް ގެންދިއުމަށް ހަވާލުކޮށްފައިވަނީ އެމް.ޓީ.ސީ.ސީ އާއެވެ.

މި މަޝްރޫޢުތަކާ ގުޅިގެން ވަޒީރު ޙައިދަރު ވިދާޅުވީ، މި މަޝްރޫޢުތަކުގެ މައިގަނޑު ބޭނުމަކީ ރަށުގައި ތިބެގެން ފެންވަރު ރަނގަޅު ތަޢުލީމު ހޯދުމުގެ ފުރުޞަތު ރައްޔިތުންނާ ވީހާވެސް ގާތުން ފޯރުކޮށްދިނުން ކަމަށެވެ. އަދި މި މަޝްރޫޢުތަކުގެ ސަބަބުން މަސައްކަތްތެރިކަމުގެ ބާޒާރަށް ބޭނުންވާ ފަންނީ އަދި ހުނަރުވެރި ދިވެހި ޒުވާނުން އުފެއްދުމަށް ބޮޑު ބާރަކަށް ވެގެންދާނެ ކަމަށާއި، ސަރުކާރުގެ އަމާޒަކީ ދިވެހި ކޮންމެ ކުއްޖަކަށްވެސް، އެކުއްޖަކު ހުރި ރަށަކުން ނުވަތަ ކައިރި ރަށަކުން މަތީ ތަޢުލީމުގެ ފުރުޞަތު ހޯދައިދިނުންކަން ވަޒީރު ފާހަގަކުރެއްވިއެވެ. އަދި ވަޒީރު ވަނީ މަސައްކަތް ހަވާލުކުރެވުނު ކޮންޓްރެކްޓަރުންނަށް، ވީ އެންމެ އަވަހަކަށް ޑިޒައިންގެ މަސައްކަތްތައް ނިންމައިދެއްވާ ޢަމަލީ މަސައްކަތް ފެށުމަށް އިލްތިމާސްކުރައްވާފައެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ހާމަކުރި ގޮތުގައި، މި ދެ ރަށުގައި ބިނާކުރެވޭ ވަޞީލަތްތަކުގެ އިތުރުން ރ. އަލިފުށްޓާއި ދުވާފަރުގައި ކުރިއަށްދާ މަޝްރޫޢުތަކާއެކު، ރ. އަތޮޅު ވެގެންދާނީ މަތީ ތަޢުލީމު ދިނުމުގައި ފާހަގަކޮށްލެވޭ އަތޮޅަކަށެވެ. އަދި މިއީ އެ ސަރަޙައްދުގެ ޒުވާނުންގެ މުސްތަޤުބަލަށްޓަކައި އެޅޭ ވަރުގަދަ ބިންގަލެއްކަން އެ ވުޒާރާއިން ވަނީ ފާހަގަކުރައްވާފައެވެ.