ސަރުކާރުގެ އަމާޒަކީ މިހާރު ކުރިއަށްގެންދާ އައިސްޕްލާންޓްތަކުގެ މަސައްކަތް މިއަހަރު ނިންމުން: ވަޒީރު ޝިޔާމް

ސަރުކާރުގެ އަމާޒަކީ މިހާރު ކުރިއަށްގެންދާ އައިސްޕްލާންޓްތަކުގެ މަސައްކަތް މިއަހަރު ތެރޭގައި ނިންމާ އޮޕަރޭޝަނަށް ގެނައުންކަމަށް މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ، ސަޢުދީ ފަންޑުންނާއި ސަރުކާރުގެ ބަޖެޓުން ޚަރަދުކޮށްގެން އައިސްޕްލާންޓް ތަރައްޤީކުރުމަށް ނިންމާފައިވާކަމަށެވެ.

އެގޮތުން، މަސްވެރިންނަށް ދިމާވާ މައްސަލަތައް ޙައްލުކުރުމަށްޓަކައި ކުރާ މަސައްކަތްތުގެ ތެރެއިން އައިސް ލިބުމުގެ ދަތިތައް ޙައްލުކުރުމުގެ މަސައްކަތް ކުރަމުންދާއިރު، 6 ރަށެއްގައި ޤާއިމްކުރި އައިސްޕްލާންޓްތައް އޮޕަރޭޝަނަށް ގެނެސްފައިވާކަން ވަޒީރު ފާހަގަކުރެއްވިއެވެ. ހަމަ އެހެންމެ، އުތުރާއި ހުވަދުއަތޮޅުގައި އަލަށް ޤާއިމްކުރި އައިސްޕްލާންޓްތަކާއެކު އެ ސަރަޙައްދުގައި މަސްވެރިކަން ކުރާ ފާރަތްތަކަށް ލުއިފަސޭހަތަކެއް ލިބޭނެކަމަށާއި، މިހާރުވެސް 9 އައިސްޕްލާންޓެއް ޤާއިމްކުރުމުގެ ޢަމަލީ މަސައްކަތް ކުރިއަށްދާކަމަށް ވަޒީރު ވިދާޅުވިއެވެ.

އައިސް ޕްލާންޓްތައް ތަރައްޤީކުރުމުގެ ޢަމަލީ މަސައްކަތް ކުރިއަށްދާ ރަށްތައް:

• ލ. މާބައިދޫ
• ލ. މާވަށް
• ލ. ހިތަދޫ
• މ.ވޭވަށް
• ޅ. ނައިފަރު
• ށ. ކޮމަންޑޫ
• މ. މުލައް
• ކުޅުދުއްފުށި ސިޓީ
• ދ. ހުޅުދެލި
  

މީގެ އިތުރުން މަސްވެރިކަމާއި ކަނޑުގެ ވަޞީލަތްތަކާ ބެހޭ ވުޒާރާއިން ކުރިއަށްގެންދާ އިތުރު މަސައްކަތްތަކަށް އަލިއަޅުއްވާލާ ވާހަކަފުޅު ދައްކަވަމުން ވަޒީރު ވިދާޅުވީ، މިފްކޯގެ ހިންގުން ހަރުދަނާކުރުމަކީ އަދުގެ ސަރުކާރުން ވަރަށް ބޮޑު އިސްކަމެއްދޭ ސިޔާސަތެއް ކަމަށެވެ. އެގޮތުން، މިހާރު ދިވެހިރާއްޖޭގެ ކޯލްޑްސްޓޯރޭޖް ކެޕޭސިޓީ 9500 މެޓްރިކް ޓަނުގައި ހުރި ނަމަވެސް، މި ކެޕޭސިޓީ 25،000 ޓަނަށް އިތުރުކުރުމަކީ ސަރުކާރުގެ އަމާޒެއްކަން ވަޒީރު ފާހަގަކުރެއްވިއެވެ.

ހަމަ އެއާއެކު، މިމަހުގެ ނިޔަލަށް ރާއްޖޭގެ އެކި ސަރަޙައްދުތަކުގައި ޖުމްލަ 48 ވަދުކަނދުފަތި އަޅާފައިވާ ކަމަށާއި، 42 ދޮށީކަނދުފަތި ޤާއިމްކުރެވިފައިވާކަން ވަޒީރު ފާހަގަކުރެއްވިއެވެ. މި ކަނދުފަތިތައް ޤާއިމްކުރުމުގެ މަޤްޞަދަކީ، އެ ސަރަޙައްދުގެ މަސްވެރިކަން އިތުރަށް ކުރިއަރުވާ ފުޅާކުރުން ކަމަށާއި، ކަނދުފަތި ޤާއިމްކުރުމާ ގުޅިގެން އެ ސަރަޙައްދުގެ މަސްވެރިން، ޚާއްޞަކޮށް ޒުވާން މަސްވެރިންނާއި ސްޕޯޓްސް ފިޝިންގްގައި ޝާމިލްވާ ފަރާތްތަކަށް ވަރަށް ބޮޑު ލުއި ފަސޭހަތަކެއް ލިބިގެންދާނެކަމަށް ވަޒީރު ވިދާޅުވިއެވެ.

މީގެ އިތުރުން، 10 ޑިސެމްބަރު 2024 އިން ފެށިގެން 3 މާރިޗު 2026 ގެ ނިޔަލަށް މަސްވެރިން ކިރުވި މަހަށް 1،034،160،719 ރުފިޔާ ދޫކޮށްފައިވާކަން ވެސް ވަޒީރު އުފަލާއެކު ފާހަގަކުރެއްވިއެވެ.