ރޯދަ މަސް ނިމުމުގެ ކުރިން ސަރުކާރުގެ ޓެކްސީލައިންގެ ޚިދުމަތް ފެށުމަށް ތައްޔާރުވަނީ

މާލޭގެ ދަތުރުފަތުރުގެ ނިޒާމަށް ދިމާވެފައިވާ ގޮންޖެހުންތަކަށް ޙައްލެއް ހޯދުމުގެ ގޮންޖެހުންތަކަށް ޙައްލެއް ހޯދުމުގެ ގޮތުން، ރޯދަ މަސް ނިމުމުގެ ކުރިން ސަރުކާރުގެ ޓެކްސީލައިންގެ ޚިދުމަތް ފެށުމަށް މަސައްކަތް ކުރަމުންދާ ކަމަށް ދަތުރުފަތުރާއި، މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު އަމީން ވިދާޅުވީ، މި ޚިދުމަތަށް ބޭނުންވާ ޓެކްސީތައް މިހާރު ރާއްޖެ ގެނައުމުގެ މަގުމަތީގައިވާ ކަމަށެވެ. މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ޙަވާލުކޮށްގެން ކުރިއަށްގެންދާ މި މަޝްރޫޢަކީ، ޓެކްސީ ހޯދުމުގައި އާންމުންނަށް ދިމާވާ ދަތިތަކަށް ދާއިމީ ހައްލެއް ހޯދައިދީ، ޒަމާނީ ފެންވަރެއްގައި މި ޚިދުމަތް ފޯރުކޮށްދިނުމަށް ސަރުކާރުން ފަށާ މުހިންމު މަސައްކަތެކެވެ.

ވަޒީރު ވިދާޅުވީ، މި ޚިދުމަތަށް ބޭނުންކުރާ ޓެކްސީތައް ފަރުމާކޮށްފައިވަނީ ރާއްޖޭގެ މާޙައުލާ ގުޅޭގޮތަށް ކަމަށެވެ. ވަކިން ޚާއްޞަކޮށް، ރާއްޖެއަކީ ކަނޑާ ކައިރި ޖަޒީރާ ރަށްތަކެއްގެ މައްޗަށް އެކުލެވޭ ތަނަކަށްވާތީ، ކާރުތަކުގެ އިލެކްޓްރޯނިކް ވަސީލަތްތަކަށް އެކަމާ ގުޅޭ ބަދަލުތައް ގެނެސްފައިވާނެ ކަމަށް އަމީން ފާހަގަކުރެއްވިއެވެ.

މި މަޝްރޫޢުގެ ދަށުން ތިން މޮޑެލްއެއްގެ ޓެކްސީ ރާއްޖެ ގެނައުމަށް ވަނީ ހަމަޖެހިފައެވެ. އޭގެ ތެރޭގައި ތައިލޭންޑުން ގެންނަ 60 ކާރާއި، ޗައިނާއިން ގެންނަ ދެ މޮޑެލްއެއްގެ ކާރުތައް ހިމެނެއެވެ. ވަޒީރު ވިދާޅުވި ގޮތުގައި، މިމަހުގެ 11 ވަނަ ދުވަހު ފުރަތަމަ ބެޗުގެ ކާރުތައް މާލެ އަންނާނެއެވެ. އަދި ޗައިނާއިން ގެންނަ ދެވަނަ ބެޗު އަންނާނެ ތާރީޚެއް ކުރިއަށް އޮތް ހުކުރު ދުވަހު ކަށަވަރުވާނެއެވެ.

ޓެކްސީލައިންގެ ޚިދުމަތް ފެށުމަށް ހަމަޖެހިފައިވަނީ މަރުޙަލާތަކަކަށް ބަހާލައިގެންނެވެ. އެގޮތުން، މިމަހުގެ 18 ވަނަ ދުވަހު ލިމިޓެޑް ސާވިސްތަކަކާއެކު ޚިދުމަތް އިފްތިތާޙްކޮށް، އީދުގެ ކުރިން އާންމުންނަށް މި ޚިދުމަތް ލިބޭނެ ގޮތް ހެދުމަށް ސަރުކާރުން އަންނަނީ މަސައްކަތް ކުރަމުންނެވެ.

މި ޚިދުމަތަށް ޖުމްލަ 150 ކާރު ބޭނުންކުރުމަށް ނިންމާފައިވާއިރު، ޚިދުމަތް ދިނުމަށްޓަކައި 407 ޑްރައިވަރުން ހޯދުމުގެ މަސައްކަތް އެމްޓީސީސީން ވަނީ ފަށާފައެވެ. މީގެ ތެރޭގައި 285 ފުލްޓައިމް ޑްރައިވަރުންނާއި 122 ޕާޓްޓައިމް ޑްރައިވަރުން ހިމެނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މި ޚިދުމަތް ތައާރަފްކުރަނީ، މާލޭގެ މަގުތަކުގެ ތޮއްޖެހުން ކުޑަކޮށް، ރައްޔިތުންނަށް އިތުބާރު ހުރި އަދި ފަސޭހަ ޓެކްސީގެ ޚިދުމަތެއް ކަށަވަރުކޮށްދިނުމުގެ މަޤްޞަދުގައެވެ.