ދޮށީ އުމުރުގެ މީހުން ދަތުރުކުރުމަށް ބޭނުންވާ އުޅަނދެއް ޖަޕާން ސަރުކާރުގެ އެހީގައި ގެންނަނީ

ދޮށީ އުމުރުގެ މީހުން ދަތުރުކުރުމަށް ބޭނުންވާ އުޅަނދެއް ޖަޕާން ސަރުކާރުގެ އެހީގައި ރާއްޖެ ގެނައުމަށް އެއްބަސްވުމެއްގައި ސޮއިކޮށްފިއެވެ.

މިކަމަށްޓަކައި ބޭއްވި ޚާއްޞަ ރަސްމިއްޔާތެއްގައި، ޖަޕާނު ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޖަޕާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމީކޯއެވެ. އަދި ދިވެހި ރެޑް ކްރެސެންޓުގެ ފަރާތުން މި  އެއްބަސްވުމުގައި ސޮއިކުރެއްވީ، ސެކެޓްރީ ޖެނެރަލް އަޙްމަދު ޝާބިންއެވެ.

މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ޖަޕާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމީކޯ ވިދާޅުވީ، މި ވެހިކަލްގެ ސަބަބުން މާލޭގައި ދިރިއުޅޭ ޢުމުރުން ދުވަސްވީ ފަރާތްތަކަށް ދަތުރުފަތުރު ކުރުމަށް ބޮޑެތި ފަސޭހަތަކެއް ލިބިގެންދާނެ ކަމަށެވެ.

އުމުރުން ދުވަސްވީ މީހުންގެ އާބާދީ މާލޭގަވެސް އިތުރުވަމުން ދާއިރު، ޞިއްޙީ ޚިދުމަތަކީ ވަރަށް ބޮޑު މައްސަލައެއް. މި ޕްރޮޖެކްޓުގެ ދަށުން އުމުރުން ދުވަސްވީ މީހުންނަށް ރައްކާތެރިކަމާއެކު ދަތުރު ކުރެވޭނެ. މި ވެހިކަލްތަކުގެ ސަބަބުން ނާޒުކު ހާލަތްތަކުގައި ޞިއްޙީ ހާލަތު ރަނގަޅުވެ، ކުއްލި ޙާލަތްތަކުގައި ބުރަ ކުޑަވެގެންދާނެ. 

ސަފީރު އިޝިގާމީ ރުމީކޯ ވިދާޅުވިއެވެ.

މީގެ އިތުރުން، ދިވެހި ރެޑް ކްރެސެންޓުގެ ސެކެޓްރީ ޖެނެރަލް އަޙްމަދު ޝާބިން ވިދާޅުވީ، މި މަޝްރޫޢުގެ ސަބަބުން ހިނގާބިނގާވެ އުޅުމާއި، ޞިއްޙީ ޚިދުމަތްތައް ލިބުމާއި މިނޫނަސް ދަތުރުފަތުރު ކުރުމަށް ބޮޑެތި ފަސޭހަތަކެއް ލިބިގެންދާނެ ކަމަށެވެ. އެގޮތުން، އުމުރުން ދުވަސްވީ މީހުންގެ ތެރެއިން ގިނަ މީހުންނަށް ހިނގާބިނގާވެ އުޅުމާއި، ޞިއްޙީ ޚިދުމަތް ލިބުމާއި، އިޖްތިމާޢީ ބައިވެރިވުން ފަދަ ގޮންޖެހުންތަކާ ކުރިމަތިލާން ޖެހޭއިރު، އެމީހުންނަށް ޚާޢްސަކޮށްގެން މި އުޅަނދުތައް މާލެ ގެނެވުމުން އެ މީހުންނަށް ރައްކާތެރި އަދި ވަގުތުން ދަތުރުފަތުރު ކުރުމުގެ ފުރުޞަތު ފަހިވެގެންދާނެކަން ޝާބިން ވަނީ ފާހަގަކުރައްވާފައެވެ.

ދޮށީ އުމުރުގެ މީހުން ދަތުރުކުރުމަށް ބޭނުންވާ މި އުޅަނދު ޖަޕާން ސަރުކާރުގެ އެހީގައި ރާއްޖެ ގެނައުމަކީ 65،784 ޑޮލަރުގެ މަޝްރޫޢެއްކަން ފާހަގަކޮށްލެވެއެވެ.