ޑިޖިޓަލް ޕޭރެންޓންގ އާއި ސައިބަރ ސޭފްޓީ ސެޝަނެއް ރެހެންދި ސުކޫލު މުދައްރިސުންނަށް ހިންގައިފި

ޑިޖިޓަލް ޕޭރެންޓންގ އާއި ސައިބަރ ސޭފްޓީ ސެޝަނެއް ރެހެންދި ސުކޫލު މުދައްރިސުންނަށް ކުރިއަށް ގެންގޮސްފިއެވެ.

މި ސެޝަނަކީ، މުޖުތަމަޢުގައި ހިނގާ ކުށްތަކުން ރައްކާތެރިކުރުމަށް ސުކޫލުތަކުގެ މުދައްރިސުންނާއި ބެލެނިވެރިން ހޭލުންތެރިކުރުވުމަށް ފުލުހުން ކުރަމުންގެންދާ މަސައްކަތްތަކުގެ ތެރެއިން ކުރިއަށް ގެންދިޔަ ސެޝަނެކެވެ. އެގޮތުން، މި މަހުގެ 3 ވަނަ ދުވަހު އެ ސުކޫލުގައި ކުރިއަށްގެންދިޔަ މި ސެޝަނަކީ ސައިބަރ ކްރައިމް ސެންޓަރާއި ހުޅުމާލެ ފޭސް 1 ގެ ނެއިބަހުޑް ސަޕޯޓް ޔުނިޓު ގުޅިގެން ކުރިއަށް ގެންދިޔަ ސެޝަނެކެވެ.

މި ސެޝަނުގައި، އިންޓަނެޓް ބޭނުންކުރާއިރު ސަމާލުކަންދޭންޖެހޭ ކަންކަމާއި، އެކި އެޕްލިކޭޝަންތައް ރަނގަޅު ގޮތުގައި ބޭނުންކުރާނެ ގޮތާއި، އެޕްލިކޭޝަންތައް އަޕްޑޭޓްކުރުމަށާއި، އިންޓަނެޓް މެދުވެރިކޮށް ހިންގާ ނޭދެވޭ ކަންކަމުން ރައްކާތެރިވުމަށް ކުރެވިދާނެ ކަންކަން ކިޔައިދީފައިވެއެވެ. އަދި ގޮތް ނޭނގޭ ލިންކުތަކަށް ނުވަނުމަށާއި، ކާކުކަން ނޭނގޭ މީހުންނަށް ތިމާގެ ޒާތީ މަޢުލޫމާތު ހިއްސާނުކުރުމަށާއި، އޮންލައިން ވިޔަފާރިކުރުމުގައި ސަމާލުކަންދޭންޖެހޭ ކަންކަން ވެސް ކިޔަދީފައިވާކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާޅުވިއެވެ.

މީގެ އިތުރުން، ދަރިވަރުން ސުކޫލުގައި ހޭދަކުރާ ވަގުތުތަކުގައި ދަރިވަރުންގެ ހަރަކާތްތައް ރަނގަޅަށް މޮނީޓަރކުރުމަށާއި، ގަނާކުރުމުގެ ޝިކާރައަށްވެ ނުވަތަ ނަފުސާނީގޮތުން ބަލި ދަރިވަރުން ދެނެގަނެ އެފަދަ ދަރިވަރުންނަށް ބޭނުންވާ އެހީތެރިކަން ފޯރުކޮށްދިނުމަށް މަސައްކަތްކުރާނެ ގޮތްތަކުގެ މަޢުލޫމާތު ހިއްސާކޮށްފައިވެއެވެ. ހަމަ އެހެންމެ، މުދައްރިސުންނަކީ ވެސް ބެލެނިވެރިއެއްގެ ދައުރުއަދާކުރާ ބަޔަކަށް ވުމާއެކު، އިންޓަނެޓު މެދުވެރިކޮށް ދަރިންނަށް ކުރިމަތިވެދާނެ ނޭދެވޭ ކަންކަމާއި އެފަދަ ކަންކަމުން ރައްކާތެރިކުރުމަށާއި، ދަރިން ގެންގުޅޭ ޑިވައިސްތަކާއި ބޭނުންކުރާ އެޕްތައް ބެލެނިވެރިން ކޮންޓްރޯލުކުރާނެ ގޮތުގެ އިތުރުން ސްކްރީން ޓައިމް ލިމިޓްކުރާނެ ގޮތުގެ މަޢުލޫމާތު ވެސް ހިއްސާކޮށްފައިވެއެވެ.

އަދި ސުކޫލުގައި ދަރިވަރުންގެ ފަރާތުން ފެންނަ ނޭދެވޭ ކަންކަމާ ގުޅޭގޮތުން ޚިޔާލު ބަދަލުކޮށް، އަދި އެފަދަ ކަންކަން ހައްލުކުރުމަށް މުދައްރިސުންނަށް ކުރެވިދާނެ ކަންކަމާ ގުޅޭގޮތުން މަޝްވަރާކޮށްފައިވާއިރު، މި ސެޝަނުގައި ރެހެންދި ސުކޫލުގެ 240 މުދައްރިސުން ބައިވެރިވެފައިވާކަމަށް އެ ވުޒާރާއިން މަޢުލޫމާތުދެއެވެ.

މުޖުތަމަޢުގައި ހުރި މިފަދަ މައްސަލަތަކުގެ ހާލަތު ދަނެގަނެ، ރައްކާތެރިގޮތުގައި އިންޓަނެޓު ބޭނުންކުރުމަށް އަހުލުވެރިކުރުވައި، ސުކޫލާއި ގޭތެރޭގައި ދުޅަހެޔޮ ޑިޖިޓަލް މާހައުލެއް ޤާއިމުކުރުމަށް މަޢުލޫމާތު ދިނުމުގެ މިފަދަ އެކި ޕްރޮގްރާމްތައް ފުލުހުން ހިންގަމުންދާކަން ފާހަގަކޮށްލެވެއެވެ.