ޚަބަރު
ރަމަޟާން މަހު ޢުމްރާއަށް ނުފުރިފައި ތިބި ޢުމްރާވެރިންނަށް ޚާއްޞަ އިންތިޒާމުތަކެއް ހަމަޖައްސަނީ
ޢުމްރާއަށް ފުރުން--
ރަމަޟާން މަހު ޢުމްރާއަށް ނުފުރިފައި ތިބި ޢުމްރާވެރިންނަށް ޚާއްޞަ އިންތިޒާމުތަކެއް ހަމަޖެއްސުމުގެ މަސައްކަތް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއްޖެއެވެ.
އެ ވުޒާރާއިން ވިދާޅުވީ، އެކި ކުންފުނިތައް މެދުވެރިކޮށް ރަމަޟާން މަހު ޢުމްރާގެ އަޅުކަމަށް ދިއުމަށް ތައްޔާރުވެފައިވާ ބައެއް ފަރާތްތަކަށް ނުފުރިފައިވުމާއި، ބައެއް ޤައުމުތަށް މެދުވެރިކޮށް ޓްރާންސިޓްކޮށް ފުރަން އުޅުނު ފަރާތްތަކަށް، އެޤައުމުތަކުގެ ޕްލައިޓްތައް ކެންސަލްވުމުގެ ސަބަބުން ނުފުރިފައިވާތީ، މި ފަރާތްތަކަށް ޢުމްރާއަށް ފުރޭނެ އިންތިޒާމެއް ހޯދާ އެކަން ހަމަޖައްސައިދެއްވުމަށް ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު އިރުޝާދު ދެއްވުމާއެކު، އެ ވުޒާރާއާއި، ދިވެހިރާއްޖޭގެ ޙައްޖު ކޯޕަރޭޝަނާއި މޯލްޑިވިއަން ގުޅިގެން އެކަމަށް މަސައްކަތް ފަށާފައިވާ ކަމަށެވެ.
މިކަމާއި ގުޅޭ ގޮތުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވީ، މިވަގުތާއި ހަމައަށް ފުރަން ބޭނުންވެފައި ތިބި މީހުންގެ ޢަދަދު 150 އަށް އަރާކަމަށާއި، ފްލައިޓު ޗާޓަރު ކުރެވޭނެ އިންތިޒާމް ހަމަޖެހިއްޖެނަމަ އިތުރު ފަރާތްތަކަށްވެސް ޖާގަ ހުރި މިންވަރަކުން ޖާގަ ދެވޭނެކަމަށެވެ. އަދި ވަގުތު ކުޑަތަންވެފައިވުމުން މިކަމުގައި ހުރި ދަތިތައް ޙައްލުވޭތޯ މަސައްކަތްކުރަމުންދާކަމަށް ވަޒީރު ވިދާޅުވިއެވެ. މި ދަތުރު ހަމަޖެހިއްޖެނަމަ، ދަތުރަށް ޚަރަދު ކުރާނީ ޢާންމު އުސޫލުން ޢުމްރާވެރިންކަން ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، ރައްޔިތުންނާ ގުޅުން ހުރި މިފަދަ ކަންކަން ހައްލުކޮށްދެެއްވުމަށް ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބަހައްޓަވަމުން ގެންދަވާ އަހައްމިއްޔަތަށްޓަކައި ވަރަށް އިޚްލާޞްތެރިކަމާއެކު ރައީސަށް ޝުކުރު އަރިސްކުރައްވާކަމަށާއި އަދި މޯލްޑިވިއަންއާއި، މޯލްޑިވްސް ޙައްޖު ކޯޕަރޭޝަނަށް ޝުކުރު ދަންނަވާކަމަށެވެ.
މީގެ އިތުރުން، މިފަދަ ކޮންމެ ކަމެއްގައި ވެސް ދިވެހި ރައްޔިތުން ދެއްވާ އެހީތެރިކަން ވަފާހަގަކުރައްވާ، ވަޒީރު ވަނީ އެކަމަށް ޝުކުރު ދަންނަވާފައެވެ.
Ads by MSS
