ހަނގުރާމަވެރި ސަރަޙައްދުތަކުގައި ތާށިވެފައި ތިބި 60 މީހަކު ރާއްޖެ ގެނައުމަށް އެބަ މަސައްކަތްކުރަން: ވަޒީރު އިޙްސާން

ހަނގުރާމަވެރި ސަރަޙައްދުތަކުގައި ތާށިވެފައި ތިބި 60 މީހަކު ރާއްޖެ ގެނައުމަށް މަސައްކަތްކުރަމުންދާކަމަށް ދާޚިލީ ސަލާމަތާ ފަނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ، ހަނގުރާވެރި އެކި ސަރަޙައްދުތަަކަށް ގޮސް ތާށިވެ އަނބުރާ ރާއްޖެ ނާދެވިފައި ގިނަ ބަޔަކު އެބަ ތިބި ކަމަށާއި، ހަނގުރާމައިގައި ބައިވެރިވެފައިވާ ފަރާތްތަކާއި، ބައިވެރިވުމަށް އެކުގައި ގެންދިޔަ ޢާއިލާ މެންބަރުން، ހަނގުރާމަވެރި ސަރަޙައްދުގައި ތާށިވެފައި ތިބި ތިބުން ނިނުމަކަށް ގެނެސް، ވީހާވެސް އަވަހަށް ރާއްޖެއަށް ގެނައުމަށް ރައީސުލްޖުމްހޫރިއްޔާ އަންގަވާފައިވާ ކަމަށެވެ.

މީގެ އިތުރުން، އެ މީހުން ރާއްޖޭގެ މުޖްތަމަޢުއަށް ނެރުމަށް ގެންނަންޖެހޭ ހުރިހާ ތަމްރީންތަކާއި ޕްރޮގްރާމްތައް ފުރިހަމަކުރުމަށްފަހު ރީ-އިންޓްރޭޓްކުރަން ޖެހޭ ފަރާތްތައް ކުރުމަށް އަންގާފައިވާކަން ވަޒީރު ފާހަގަކުރެއްވިއެވެ.

އެގޮތުން ކުރިން ވާނީ 23 ފަރާތެއް ރީ އިންޓަގްރޭޓްކޮށްފައި. މިހާރު މަސައްކަތް ކުރަމުންދަނީ ސީރިއާގެ ދެ ސަރަޙައްދެއްގެ ތިބިކަމަށް ބެލެވުނު 60 އެއްހާ މީހުންގެ މަސައްކަތް. އެ ސަރަޙައްދާއި އެހެން ޤައުމުތަކުގައި ތާށިވެފައި ތިބި މީހުން ގެނައުމުގެ މަސައްކަތް ކުރިއަށް އެބަގެންދަން.

ވަޒީރު ވިދާޅުވިއެވެ.

ވަޒީރު  އިތުރަށް ވިދާޅުވީ، އެ މަސައްކަތް ކުރިއަށް ގެންދަނިކޮށް ތުރުކީގައި ރާއްޖޭގެ 3 ރަށްޔިތަކު ހަނގުރާމައިގައި ބައިވެރިވުމަށް އެހެން ޤައުމަކަށް ގޮސް ފަހުން ތުރުކީއަށް ހިޖުރަކޮށް ތާށިވެފައިވާމަށް މަޢުލޫމާތު ލިބިފައިވާ ކަމަށެވެ. އަދި ތުރުކީގެ ސަރުކާރުން އެ ފަރާތްތައް ހައްޔަރުކުރުމަށްފަހު ދިވެހި ސަރުކާރަށް އެންގުމުން އެ ފަރާތްތައް ރާއްޖެއަށް ގެނައުމަށް މަސައްކަތްކޮށްފައިވާ ކަމަށާއި، އެގޮތުން 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ ރާއްޖެއަށް ގެނެގެސްފައިވާކަމަށް ވަޒީރު ވިދާޅުވިއެވެ.

ހަމަ އެހެންމެ، އެ ދެމައިންނަށް ނެޝަނަލް ރީ-އިންޓަގްރޭޓިވް ފެސިލިޓީގައި ޚިދުމަތް ދެމުންދާކަން ވަޒީރު ވަނީ ފާހަގަކުރައްވާފަ އެވެ.