"އަލް އަބްރާރް" ކުންފުނީގެ ހުއްދަ ހިފަހައްޓައިފި

ފުރަން ތައްޔާރުވެފައިވަނިކޮށް، އެއްވެސް މަޤްބޫލު އުޒުރެއް ނެތި ޢުމްރާ ދަތުރު ކެންސަލް ކުރި މައްސަލައިގައި "އަލްއަބްރާރު" ޙައްޖު އެންޑް ޢުމްރާ ކުންފުންޏާ މެދު އިސްލާމީ ކަންތައްތަކާ ބެހޭ ވުޒާރާއިން ފިޔަވަޅު އަޅައިފިއެވެ.

އިސްލާމީ ކަންތައްތަކާ ބެހޭ ވުޒާރާއިން ނެރުނު ނޫސްބަޔާނެއްގައި ވިދާޅުވީ، ޢުމުރާއަށް މީހުން ގެންދިއުމަށް އެ ކުންފުންޏަށް ދޫކޮށްފައިވާ ހުއްދަ މިހާރު ވަގުތީގޮތުން ހިފަހައްޓާފައިވާ ކަމަށެވެ. އަދި މިކަން އެ ކުންފުންޏަށް މިހާރު އަންގާފައިވާ ކަމަށްވެސް އެ ވުޒާރާއިން ވިދާޅުވިއެވެ.

އެ ވުޒާރާއިން އިތުރަށް ހާމަކުރެއްވި ގޮތުގައި، މި މައްސަލައިގައި އިތުރަށް ސާފުކުރަންޖެހޭ މަޢުލޫމާތުތަކާއި ބަލަންޖެހޭ ކަންކަން ބެލުމަށްފަހު، އުސޫލުތަކުގެ ތެރެއިން އަޅަންޖެހޭ އެންމެހާ ފިޔަވަޅުތައް އެ ކުންފުންޏާ މެދު އަޅާނެއެވެ. މި މައްސަލައިގެ ޝަކުވާ ލިބިގެން ބެލި ބެލުމުން، ދަތުރު ކެންސަލްކޮށްފައިވަނީ ރާއްޖެއިން ޢުމްރާއަށް މީހުން ގެންދިއުމާ ބެހޭ އުސޫލާ ޚިލާފަށްކަން ވަނީ ފާހަގަކުރެވިފައެވެ.

މި ރަމަޟާން މަހަށް ޚާއްސަކޮށް، މާރިޗު 3 އިން 26 އަށް ކުރަން ރޭވި ޢުމްރާ ދަތުރު ކެންސަލްކުރީ ދަތުރަށް ފުރަން އެންމެ ފަހުގެ ތައްޔާރީތައް ވަމުންދަނިކޮށެވެ. މަޢުލޫމާތު ލިބިފައިވާ ގޮތުގައި، މި ގްރޫޕާއެކު ޢުމްރާއަށް ދިއުމަށް 120 މީހަކު ވަނީ ފައިސާ ދައްކާފައެވެ. ނަމަވެސް، ދަތުރު ކެންސަލްވިކަން އެންގީ ފުރަން އޮތް ދުވަހުއެވެ.

މި މައްސަލައިގައި ޢުމްރާވެރިންނަށް ލިބުނު ގެއްލުންތަކަށް ލުޔެއް ހޯދައިދިނުމަށް ސަރުކާރުން މިހާރު ވަނީ މަސައްކަތް ފަށާފައެވެ. އެގޮތުން، އިސްލާމީ ކަންތައްތަކާ ބެހޭ ވުޒާރާއާއި، މޯލްޑިވްސް ޙައްޖު ކޯޕަރޭޝަން އަދި މޯލްޑިވިއަން ގުޅިގެން، ނުފުރި ތިބި މީހުންނަށް ޢުމްރާގެ ފުރުޞަތު ފަހިކޮށްދިނުމުގެ މަސައްކަތް ކުރަމުންދާ ކަމަށް އެ ވުޒާރާއިން ވިދާޅުވިއެވެ.