ގައުމީ ސިއްހީ ލެބޯޓަރީގެ އިމާރާތުގެ މަސައްކަތް މިއަހަރު ކޮންޓްރެކް ކުރެވި ޢަމަލީ މަސައްކަތް ފެށޭނެ: ވަޒީރު ނާޒިމް

ރާއްޖޭގައި ޒަމާނީ ފެންވަރުގެ ހިދުމަތްތައް ދެވޭނެ އަދި މުހިއްމު ތަހުލީލުތައް ކުރެވޭނެ އެންމެ ފަހުގެ އާލަތްތަކާއެކު ގާއިމުކުރެވޭ ގައުމީ ސިއްހީ ލެބޯޓަރީއެއް އެޅުމުގެ މަސައްކަތް މި އަހަރު ތެރޭ ކޮންޓްރެކްޓުކުރެވި، އަމަލީ މަސައްކަތް ފެށޭނެ ކަމަށް ސިއްހީ ވަޒީރު އަބްދުﷲ ނާޒިމް އިބްރާހީމް ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވަޒީރު ވިދާޅުވީ، މިހާރު ރޯޝަނީ ބިލްޑިންގުގައި ހިންގަމުންދާ ލެބޯޓަރީއަކީ ޖާގައިގެ ގޮތުން ވަރަށް ދަތި ތަނެއް ކަމަށެވެ.

މި މަޝްރޫއަށް ބޭނުންވާ ފައިސާ މިހާރު ހަމަޖެހިފައިވާކަން ހާމަކުރައްވަމުން ވަޒީރު ވިދާޅުވީ، ޔޫރަޕިއަން އިންވެސްޓްމަންޓް ބޭންކުން 25 މިލިއަން ޑޮލަރު މިކަމަށް ހަމަޖެހިފައިވާ ކަމަށެވެ. މިހާރު ކުރިއަށްދަނީ މަޝްރޫއުގެ ކޮންސަލްޓެންސީ މަރުހަލާ ކަމަށާއި، ޖަރުމަނު ކުންފުންޏަކާ ހަވާލުކޮށްގެން ކުރިއަށްގެންދާ އެ މަސައްކަތް ނިންމައި އަންނަ ޖޫން މަހު ބައިނަލްއަގުވާމީ ޓެންޑަރަށް ހުޅުވާލެވޭނެ ކަމަށްވެސް ވަޒީރު ވިދާޅުވިއެވެ.

އައު ލެބޯޓަރީ އެޅުމަށް ހަމަޖެހިފައިވަނީ 26,000 އަކަފޫޓުގެ ބިމެއްގައެވެ. އެ ބިމުގައި ނުވަ ފަންގިފިލާގެ އިމާރާތަކާއި ތިން ފަންގިފިލާގެ އިމާރާތެއް ބިނާކުރުމަށް ވަނީ ހަމަޖެހިފައެވެ. މީގެ ތެރެއިން އެއް އިމާރާތް ހާއްސަކުރެވޭނީ ތަހުލީލުތައް ކުރުމަށް ބޭނުންވާ ވަސީލަތްތަކަށެވެ. އަދި އަނެއް އިމާރާތް ބޭނުންކުރާނީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ އިދާރީ އަދި ފަންނީ މަސައްކަތްތަކަށެވެ.

މި ލެބޯޓަރީ ގާއިމުވުމުން ވައިރޮލޮޖީ ރިސްކް ލެވެލް އެކެއް އަދި ތިނެއްގެ ވައިރަސްތަކާއި ބެކްޓީރިއާގެ ތަހުލީލުތައް ރާއްޖޭގައި ކުރެވޭނެއެވެ. ވަޒީރު ވިދާޅުވި ގޮތުގައި، "މީގެ ސަބަބުން ރާއްޖެއަށް އެތެރެކުރެވޭ އަދި ރާއްޖެއިން ބޭރުކުރެވޭ ކާބޯތަކެތީގެ ރައްކާތެރިކަން ކަށަވަރުކުރުމަށް ހަދަންޖެހޭ ތަހުލީލުތައް އިތުރަށް ފުރިހަމަވެ ފުޅާވެގެންދާނެ" އެވެ. މީގެ އިތުރުން ސިއްހީ ދާއިރާގެ ދިރާސާތަކަށްވެސް މިކަމުގެ ސަބަބުން މަގުފަހިވާނެއެވެ.

މި އިމާރާތަކީ މުވައްޒަފުންނަށް ބޭނުންވާނެ ގިނަ ވަސީލަތްތަކަކާއެކު ބިނާކުރާ ތަނެކެވެ. އެގޮތުން ލައިބްރަރީ، މަލްޓި ޕާޕަސް ހޯލް، ކަސްރަތު ކުރެވޭނެ އިންތިޒާމު، ޗައިލްޑް ކެއާ އަދި ނަމާދުކުރާނެ ތަންތަން މި އިމާރާތުގައި ހިމެނޭނެއެވެ. މި މަޝްރޫއު ނިމުމުން އެމްއެފްޑީއޭގެ ހިދުމަތްތައް ފުޅާވެ، މުޅި ސިއްހީ ދާއިރާއަށް ބޮޑު ކުރިއެރުމެއް ލިބިގެންދާނެ ކަމަށް ވަޒީރު ފާހަގަކުރެއްވިއެވެ.