މި 2 އަހަރުތެރޭ ޖަލަށް 400 ގައިދީންގެ ޖާގަ އިތުރުކޮށްފި: ވަޒީރު އިޙްސާނާ

މިދިޔަ ދެ އަހަރު ދުވަހުގެ ތެރޭގައި ޖަލުތަކަށް އިތުރު 400 ގައިދީންގެ ޖާގަ އިތުރުކޮށް، ކުރީ ސަރުކާރުގައި މާލެ ޖަލު އުވާލުމާ ގުޅިގެން ދޫވި މީހުން އަނބުރާ ޖަލަށް ގެނައުމުގެ މަސައްކަތް ކުރަމުންދާކަމަށް ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ. ވަޒީރު މިހެން ވިދާޅުވީ ވޭތުވެދިޔަ މުއްދަތުގައި ވުޒާރާއިން ކުރެވުނު މަސައްކަތްތަކާ ގުޅޭގޮތުން މަޢުލޫމާތު ދެއްވަމުންނެވެ.

ވަޒީރު އިޙުސާން ވިދާޅުވީ، ކުރިން ރަނގަޅަށް ހިނގަމުންދިޔަ 350 މީހުންގެ ޖާގައިގެ މާލޭ ޖަލާއި، 100 މީހުންގެ ޖާގައިގެ ކަސްޓޯޑިއަލް ފެސިލިޓީ ނިމިދިޔަ ސަރުކާރުން އުވާލާފައިވާ ކަމަށެވެ. މާލޭ ޖަލަކީ ރާއްޖޭގައި ހުރި އެންމެ ފެންވަރު ރަނގަޅު ވަސީލަތްތައް ހުރި ޖަލުކަން ފާހަގަކުރައްވަމުން ވަޒީރު ވިދާޅުވީ، އެތަނާ އިންވެގެން ސްކޫލެއް އެޅުމަށްފަހު ޖަލު ބަންދުކުރުމުން ގިނަ އަދަދެއްގެ ގައިދީން ދޫވެގެން ދިޔަ ކަމަށެވެ. މީގެ އިތުރުން ހުޅުމާލޭގައި 100 މީހުންގެ ޖާގަ ހެދުމަށް ކުރީ ސަރުކާރުން ހަވާލުކުރި މަޝްރޫޢަކީ އިންތިހާއަށް އަގުބޮޑުކޮށް ކުރިއަށްގެންދިޔަ މަސައްކަތެއްގެ ގޮތުގައި ވަޒީރު ސިފަކުރެއްވިއެވެ.

ޖަލުގެ ޖާގަ އިތުރުކުރުމަށް ކުރެވުނު މަސައްކަތްތަކަށް އަލިއަޅުއްވާލައްވަމުން ވަޒީރު ވިދާޅުވީ، "އޭރު 100 މީހުންގެ ގޮޅިއެއް ހެދުމަށް 39 މިލިޔަން ރުފިޔާ ހޭދަ ކުރި. އެތައް ދުވަހެއްވީއިރު ޚިދުމަތަކަށް ނާދޭ. މިދިޔަ 4 މަހު ކުރި މަސައްކަތުން 100 މީހުންގެ ޖާގަ ހުޅުމާލޭގައި މިވަނީ ހެދިފައި. 5 މިލިޔަންގެ ބަޖެޓަކުން އެކަން ކުރެވިއްޖެ، ޢަމަލީ މަސައްކަތުގައި ކަރެކްޝަންގެ މުވައްޒަފުންގެ އެހީތެރިކަމާއެކު." މި މަސައްކަތުގެ ސަބަބުން ޖާގަ ނެތިގެން ދޫވެފައި ތިބި މީހުން އަނބުރާ ޖަލަށް ގެނައުމަށް ބޮޑު ކާމިޔާބީއެއް ލިބިފައިވާ ކަމަށްވެސް ވިދާޅުވިއެވެ.

ޖަލުތަކުގެ ސަލާމަތީ ކަންކަން ވަރުގަދަކުރުމުގެ ގޮތުން މާފުށީ ޖަލުގައި އަލަށް ބޮޑީ ސްކޭނަރު ބަހައްޓާފައިވާކަން ވަޒީރު އިޢުލާންކުރެއްވިއެވެ. މިކަމުގެ ސަބަބުން ހަށިގަނޑުގެ ކޮންމެ ތަނެއްގައި ފޮރުވައިގެން ޖަލަށް އެއްޗެހި ވައްދަން އުޅުނަސް އެނގޭނެ ކަމަށާއި، ގައިދީންނާއި އާއިލާތަކުގެ އިތުރުން ޖަލު އޮފިސަރުންވެސް ޖަލަށް ވަދެވޭނީ ސްކޭން ކުރުމަށްފަހު ކަމަށް ވަޒީރު ވިދާޅުވިއެވެ. މިއީ ޖަލަށް ފޯނު ވެއްދުމާއި ސްކޭމް ކޯލްތަކުގެ މައްސަލައަށް ލިބޭނެ ބޮޑު ހައްލެއް ކަމަށް ސަރުކާރުން ދެކެއެވެ.

މީގެ އިތުރުން، ޖަލުތަކުން ދޭ ޚިދުމަތްތައް ހޯދުމަށް އިދާރާތަކަށް ދާންޖެހޭ ޖެހުން ނިމުމަކަށް ގެނެސް، އޮންލައިންކޮށް ޚިދުމަތް ހޯދޭނެ ޕޯޓަލްއެއް މިހާރު ވަނީ ތަޢާރަފުކޮށްފައެވެ. މި ބަދަލާއެކު އާއިލާތަކަށް ލުއިފަސޭހަކަމާއެކު ޚިދުމަތްތައް ލިބިގެންދާނެއެވެ.

އަތޮޅުތަކުގެ ސަލާމަތީ ކަންކަމާ ގުޅޭގޮތުން ވަޒީރު ވިދާޅުވީ، ފުލުހުންގެ ޚިދުމަތް ހަރުދަނާކުރުމަށް 53 އިމާރާތެއްގެ މަސައްކަތް ކުރިއަށްދާ ކަމަށެވެ. އޭގެ ތެރެއިން މި ސަރުކާރުން ފެށި ދެ އިމާރާތެއްގެ މަސައްކަތް ނިންމާ މިހާރު ޚިދުމަތް ދޭން ފަށާފައިވާއިރު، މި މަހުގެ ނިޔަލަށް އިތުރު 11 ތަނެއްގެ މަސައްކަތް ނިމި ޚިދުމަތަށް ގެނެވޭނެ ކަމަށްވެސް ވަޒީރު ޢަލީ އިޙުސާން ވިދާޅުވިއެވެ.