އިތުރު 31 ރަށަށް މިމަހު އެމްބިއުލާންސް ފޮނުވާނެ: ވަޒީރު ނާޒިމް

ރާއްޖޭގެ އިތުރު 31 ރަށަކަށް މި މަހުގެ ތެރޭގައި އެމްބިއުލާންސް ފޮނުވުމަށް ހަމަޖެހިފައިވާ ކަމަށް ޞިއްޙީ ވަޒީރު ޢަބްދުﷲ ނާޒިމް އިބްރާޙިމް ވިދާޅުވެއްޖެއެވެ. ނޫސްވެރިންނާ ބައްދަލުކުރައްވައި ވާހަކަފުޅުދައްކަވަމުން ވަޒީރު ވިދާޅުވީ، ޞިއްޙީ މަރުކަޒުތަކާއި ހޮސްޕިޓަލްތަކުގެ ވަސީލަތްތައް ހަމަކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނަ ކަމަށެވެ.

އެމްބިއުލާންސް ފޮނުވުމުގެ މަސައްކަތް ކުރިއަށްދާ ގޮތުގެ ތަފްޞީލު ދެއްވަމުން ވަޒީރު ވިދާޅުވީ، މި މަހުގެ ތެރޭގައި ދެ ބުރަކަށް ބަހާލައިގެން އެމްބިއުލާންސްތައް ރަށްރަށަށް ފޮނުވާނެ ކަމަށެވެ. "އަންނަ ހަފްތާގައި 14 ރަށަކަށް އެމްބިއުލާސް ފޮނުވާނެ. އަދި މަހުގެ ފަހުކޮޅު އަނެއް 17 ރަށަށް ފޮނުވާނެ،" ވަޒީރު ވިދާޅުވިއެވެ. މީގެ އިތުރުން، މިދިޔަ މަހުވެސް 56 ރަށަކަށް އެމްބިއުލާންސް ފޮނުވާފައިވާކަން ވަޒީރު ފާހަގަކުރެއްވިއެވެ.

ބޮޑެތި އާބާދީތަކާއި ސިޓީތަކަށް އަމާޒުކޮށްގެން ޕެރަމެޑިކް އެމްބިއުލާންސްތަކެއް ހޯދުމުގެ މަސައްކަތް ކުރަމުންދާކަން ހާމަކުރައްވަމުން، އެ އެމްބިއުލާންސްތައް އަންނަ މަހުގެ ތެރޭގައި ލިބޭނެ ކަމަށް ވަޒީރު ވިދާޅުވިއެވެ. މިއީ ޞިއްޙީ ޚިދުމަތުގެ ފެންވަރު މަތިކުރުމަށް ކުރެވޭ މުހިންމު މަސައްކަތެއްގެ ގޮތުގައި ވަޒީރު ސިފަކުރެއްވިއެވެ.

ޞިއްޙީ ދާއިރާގެ ޢުމްރާނީ ތަރައްޤީއަށް ކުރެވޭ މަސައްކަތްތަކަށް އަލިއަޅުއްވާލައްވަމުން ވަޒީރު ވިދާޅުވީ، ހެލްތު ސެންޓަރުތަކުގެ ތަރައްޤީއާއި ވަސީލަތްތައް ހޯދުމުގެ 170 މަސައްކަތެއް މިހާރުވެސް ކުރިއަށްދާ ކަމަށެވެ. އެގޮތުން، ޞިއްޙީ މަރުކަޒުތަކަށް ބޭނުންވާ 190 މިލިޔަން ރުފިޔާގެ ތަކެތި ހޯދުމުގެ މަސައްކަތް އެސްޓީއޯއާ ގުޅިގެން ސަރުކާރުން ދަނީ ކުރިއަށްގެންދަމުންނެވެ.

އެމްބިއުލާންސްތަކަށް ދިމާވާ މަރާމާތުގެ މައްސަލަތަކަށް ދާއިމީ ޙައްލެއް ހޯދުމަށްޓަކައި، އެ މަސައްކަތް ދިގު މުއްދަތަކަށް ބަޔަކާ ހަވާލުކުރުމުގެ މަސައްކަތް ކުރަމުންދާ ކަމަށްވެސް ވަޒީރު ވިދާޅުވިއެވެ. މިކަމުގެ ސަބަބުން ބައެއް ރަށްރަށުން މަރާމާތުގެ ޚިދުމަތް ނުލިބުމުގެ ސަބަބުން ދިމާވާ ގޮންޖެހުންތަކަށް ނިމުމެއް އަންނާނެ ކަމަށް ޞިއްޙީ ވަޒީރު ޢަބްދުﷲ ނާޒިމް އިބްރާޙިމް ވިދާޅުވިއެވެ.