ބ. އޭދަފުށީގައި ޤައުމީ ޔުނިވަރސިޓީގެ ކެމްޕަސް އެޅުމުގެ އަމަލީ މަސައްކަތް ފަށައިފި

ބ. އޭދަފުށީގައި ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) ގެ ކެމްޕަސް އެޅުމުގެ ޢަމަލީ މަސައްކަތް ރަސްމީކޮށް ފަށައިފިއެވެ. މި މަޝްރޫޢުގެ މަސައްކަތް ރަސްމީކޮށް ފައްޓަވައިދެއްވީ މަތީ ތަޢުލީމާއި މަސައްކަތްތެރިކަމާ ބެހޭ ވަޒީރު ޑރ. ޢަލީ ހައިދަރު އަޙްމަދުއެވެ.

އޭދަފުށީގައި ޤައުމީ ޔުނިވަރސިޓީގެ ކެމްޕަހެއް ތަރައްޤީކުރުމުގެ މަސައްކަތް ސަރުކާރުން ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމް.ޓީ.ސީ.ސީ) އާއެވެ. މި މަސައްކަތް އެ ކުންފުންޏާ ހަވާލުކުރެއްވުމަށް ނިންމެވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރުގެ އޯގަސްޓް މަހު އެ ރަށަށް ކުރެއްވި ދަތުރުފުޅުގައި، ރަށުގެ ރައްޔިތުންނާ ބައްދަލުކުރެއްވުމަށް ބޭއްވި ޚާއްޞަ ޖަލްސާގައެވެ.

މިއީ އަތޮޅުތެރޭގައި މަތީ ތަޢުލީމާއި ތަމްރީނުގެ ފުރުޞަތުތައް ފުޅާކުރުމަށް ސަރުކާރުން ގެންގުޅުއްވާ ހަރުދަނާ ސިޔާސަތުގެ ދަށުން، ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީ.އެސް.އައި.ޕީ) ގެ ތެރެއިން ކުރިއަށްގެންދާ މުހިންމު މަޝްރޫޢެކެވެ.

ޖުމްލަ 80.79 މިލިއަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢު ނިންމުމަށް ހަމަޖެހިފައިވަނީ 720 ދުވަހުގެ ތެރޭގައެވެ. މި މަޝްރޫޢުގެ ދަށުން ތަރައްޤީކުރެވޭ ބައިތަކުގެ ތެރޭގައި ހިމެނެނީ:

6000 އަކަފޫޓުގެ ސަރަޙައްދެއްގައި 2 ފަންގިފިލާގެ ދަރިވަރުންގެ އެކޮމޮޑޭޝަން ބްލޮކެއް.
3200 އަކަފޫޓުގެ ސަރަޙައްދެއްގައި 2 ފަންގިފިލާގެ މުވައްޒަފުންގެ އެކޮމޮޑޭޝަން ބްލޮކެއް.
3000 އަކަފޫޓުގެ ސަރަޙައްދެއްގައި 2 ފަންގިފިލާގެ އެޑްމިނިސްޓްރޭޓިވް ބްލޮކެއް.
4000 އަކަފޫޓުގެ ސަރަޙައްދެއްގައި 2 ފަންގިފިލާގެ ކްލާސްރޫމް ބްލޮކެއް.
4000 އަކަފޫޓުގެ ސަރަޙައްދެއްގައި 2 ފަންގިފިލާގެ އެކަޑަމިކް ފެސިލިޓީޒް ބްލޮކެއް.

ގާތްގަނޑަކަށް 3500 މީހުންގެ އާބާދީއެއް އޮންނަ ބ. އަތޮޅުގެ ވެރިކަންކުރާ ރަށް، އޭދަފުއްޓަކީ ތަޢުލީމީ ޒުވާނުން ގިނަ ރަށެކެވެ. މި ރަށުގެ ގިނަ ޒުވާނުންނަކީ ސަރުކާރުގެ އެކި މުއައްސަސާތަކާއި ކައިރި ރިސޯޓްތަކުގައި ވަޒީފާ އަދާކުރާ ފަރާތްތަކެވެ. އެހެންކަމުން، ރަށުގައި ޤައުމީ ޔުނިވަރސިޓީގެ ކެމްޕަހެއް ޤާއިމުވުމަކީ އޭދަފުށީގެ އިތުރުން މުޅި ބ. އަތޮޅަށްވެސް ތަޢުލީމީ ދާއިރާއިން ލިބިގެންދާނެ ވަރަށް ބޮޑު ކުރިއެރުމެކެވެ.

ސަރުކާރުން މިހާރުވެސް އަންނަނީ އަތޮޅުތަކުގައި މަތީ ތަޢުލީމުގެ ފުރުޞަތުތައް އިތުރުކުރުމަށްޓަކައި، ދިވެހިރާއްޖޭގެ އިސްލާމީ ޔުނިވަރސިޓީއާއި ޤައުމީ ޔުނިވަރސިޓީގެ އިތުރު ކެމްޕަސްތައް ބިނާކުރުމުގެ މަސައްކަތްތައް ރާއްޖޭގެ އެކި ކަންކޮޅުތަކުގައި ކުރިއަށްގެންދަމުންނެވެ.