ޓިކްޓޮކް މެދުވެރިކޮށް އިސްލާމްދީނާ ގުޅޭގޮތުން ދޮގު މަޢުލޫމާތު ފަަތުރާ މީހަކު ހޯދުމަށް ފުލުހުން އިޢުލާނުކޮށްފި

މީސް މީޑއާގެ މަންސައެއްކަމަށްވާ ޓިކްޓޮކް މެދުވެރިކޮށް އިސްލާމްދީނާ ގުޅޭގޮތުން ދޮގު މަޢުލޫމާތު ފަތުރަމުންދާ މީހަކު ހޯދުމަށް ދިވެހި ފުލުހުންގެ ޚިދުމަތުން އިޢުލާނުކޮށްފިއެވެ.

މި މީހާއަކީ މީސް މީޑިއާގައި އިސްލާމް ދީނަށް ތައުހީނުކޮށް، ދިވެހި ރައްޔިތުންގެ ދީނީ އެއްބައިވަންތަކަމަށް ބުރޫއަރާފަދަ ވާހަކަ ދައްކަމުންދާ މީހެކެވެ.

މިކަމާއި ގުޅިގެން ފުލުހުން ވިދާޅުވީ، އިސްލާމްދީނަށް ތައުހީނުކޮށް ފުރައްސާރަކުރުމާއި، ދިވެހި ރައްޔިތުންގެ އެއްބައިވަންތަކަން ނަގާލަން މަސައްކަތްކުރުމާއި، މީހުންގެ މެދުގައި ދީނީ ގޮތުން ބައިބައިވުން އުފެދޭ ބާވަތުގެ ވާހަކައާއި އިސްލާމްދީނުގެ އަސްލުތަކާ ގުޅޭ ގޮތުން ދޮގު މަޢުލޫމާތު، ސޯޝަލް މީޑިއާގެ ޕްލެޓްފޯމް ޓިކްޓޮކް މެދުވެރިކޮށް ފެތުރިކަމަށް ތުހުމަތު ކުރެވޭ މައްސަލައެއްގެ ތަޙުޤީގަށް މީހަކު ހާޒިރުކުރަން ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަޙުޤީގަށް ހާޒިރުވުމަށް ޗިޓު ރައްދުކުރެވިފައި ނުވާތީ، ޖިނާޢީ މައްސަލަތައް ތަޙުޤީގުކުރުމުގައި ފުލުހުން ޢަމަލުކުރާނެ އިޖުރާޢަތުގެ ޤަވާއިދުގެ 27 ވަނަ މާއްދާގައިވާ ގޮތުގެމަތިން ތަޙުޤީގަށް ހާޒިރުވުމަށް އަންގައި އިޢުލާނުކުރާ ކަމަށެވެ.

ފުލުހުން އިތުރަށް ވަނީ، ޙުސައިން ޔޫސުފް (44އ)، ހިޔަލީގެ/ނ.ކުޑަފަރި، މިމަހުގެ 18 ވަނަ ދުވަހުގެ 12:00  އަށް  ސާޖަންޓް އާދަމް ޙަލީމް ކުރިމިނަލް އިންވެސްޓިގޭޝަން ބިލްޑިންގ އަށް ހާޒިރުވުމަށް އަންގާފައެވެ.