ހދ. އަތޮޅުގެ ކެމްޕޭން ޖަގަހައެއް މާލޭގައި ހުޅުވައިފި

ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ތައްޔާރުވުމުގެ ގޮތުން، ހދ. އަތޮޅުގެ ކެމްޕޭނަށް ޚާއްޞަ ޖަގަހައެއް މާލޭގައި ރަސްމީކޮށް ހުޅުވައިފިއެވެ.

މި ޖަގަހަ ހުޅުއްވައިދެއްވީ ރައީސުލްޖުމްހޫރިއްޔާގެ ނާއިބު އަލްއުސްތާޒު ހުސެއިން މުހައްމަދު ލަތީފެވެ.

މާލޭގެ އިރުދޭމާ ހިނގުމުގައި ހުންނަ ހ. އޮއިސްޓަރގައި ޤާއިމުކުރި މި ޖަގަހަ ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާގެ ނާއިބުގެ އަރިހުގައި، ޕާޓީގެ ލީޑަރޝިޕްގެ ބޭފުޅުންނާއި ކެންޑިޑޭޓުން ބައިވެރިވެވަޑައިގެންނެވިއެވެ. މި ރަސްމިއްޔާތުގައި ޚާއްޞަކޮށް ހދ. އަތޮޅުގެ އެކި ދާއިރާތަކަށް ވާދަކުރައްވާ ކެންޑިޑޭޓުން ބައިވެރިވެވަޑައިގެންފައިވާކަން ފާހަގަކުރެވެއެވެ.

ޖަގަހަ ހުޅުވުމުގެ ޙަފްލާގައި ވާހަކަދައްކަވަމުން ރައީސުލްޖުމްހޫރިއްޔާގެ ނާއިބު އަލްއުސްތާޒު ހުސެއިން މުހައްމަދު ލަތީފް ވަނީ އިންތިޚާބުގެ މުހިންމުކަމާ ގުޅޭގޮތުން ވާހަކަފުޅު ދައްކަވާފައެވެ. މީގެ އިތުރުން ވިލިމާލޭ ދާއިރާގެ މެމްބަރު އަދި ކޮންގްރެސް ޕާޓީގެ ޑެޕިއުޓީ ޕީޖީ ލީޑަރު މުހައްމަދު އިސްމާއީލާއި، އިގްތިސާދީ ތަރައްގީއާ ވިޔަފާރިއާ ބެހޭ ވުޒާރާގެ ސްޓޭޓް މިނިސްޓަރު ހުސެއިން ޒާހިރު ވެސް މި ރަސްމިއްޔާތުގައި ވާހަކަދެއްކެވިއެވެ.

މި ބައްދަލުވުމުގައި ހދ. އަތޮޅުގެ ތަމްސީލުކުރައްވާ ބޭފުޅުންގެ ތެރެއިން ހދ. ނާވައިދޫ ކައުންސިލުގެ ރައީސް އަލީ ރަޝީދާއި، ހދ. ވައިކަރަދޫ ކައުންސިލް މެމްބަރު ކަމަށް ވާދަކުރައްވާ ހުދާ މުހައްމަދު ވެސް ވަނީ ވާހަކަދައްކަވާފައެވެ. މި ޖަގަހައަކީ ކުރިއަށް އޮތް އިންތިޚާބުތަކަށް އަމާޒުކޮށްގެން ކެމްޕޭންގެ މަސައްކަތްތައް ވިލަރެސްކުރުމަށް ހުޅުވުނު މުހިންމު މަރުކަޒެކެވެ.