އެމްޑީޕީގެ ކެންޑިޑޭޓުން އިންތިޚާބުކޮށްފި ނަމަ މަސައްކަތްކުރާނީ ސަރުކާރާ އިދިކޮޅަށް: ނައިބް ރައީސް

ކުރިއަށް އޮތް ލޯކަލް ކައުންސިލް އިންތިޙާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި އެމްޑީޕީގެ ކެންޑިޑޭޓުން އިންތިޙާބުކޮށްފި ނަމަ، އެ ބޭފުޅުން މަސައްކަތްކުރާނީ ސަރުކާރާ އިދިކޮޅަށް ކަމަށް ނައިބް ރައީސް ހުސެއިން މުހައްމަދު ލަތީފް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ޕީއެންސީގެ ހދ. އަތޮޅުގެ ކެމްޕެއިން ޖަގަހަ މާލޭގައި ހުޅުވުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ނައިބު ރައީސް ވިދާޅުވީ ކައުންސިލަރުންނަކީ ޕީއެންސީގެ ސަރުކާރާ ގުޅިގެން މަސައްކަތް ކުރަން ދަންނަ ބަޔަކަށް ވާންޖެހޭ ކަމަށެވެ. އިދިކޮޅު ފަރާތްތަކުން ސަރުކާރަށް އެއްބާރުލުން ދިނުމުގެ ބަދަލުގައި ޕޯޑިއަމްތަކުގައި ވާހަކަ ދައްކަވަނީ ސަރުކާރަށް އުނދަގޫވާނެ ގޮތަށް ކަމަށް އެމަނިކުފާނު ފާހަގަކުރެއްވިއެވެ. އަދި ސަރުކާރުގެ ސިޔާސަތުތަކަށް ތާއީދުކުރުމާއި ރައީސް ޑރ. މުހައްމަދު މުއިއްޒު ނިންމަވާ ނިންމެވުންތައް ތަންފީޒުކުރުމަށް ރައްޔިތުންނަށް ހެޔޮ ނަސޭހަތް އިދިކޮޅުން ނުދޭ ކަމަށްވެސް ވިދާޅުވިއެވެ.

"އަޅުގަނޑުމެންނަށް އެބަ ޔަގީންވޭ، އެއިން ބޭފުޅަކު އިންތިޚާބުވެއްޖެ ނަމަ، ސަރުކާރާ ސީދާ އިދިކޮޅަށް ކަން އެބޭފުޅުން މަސައްކަތް ކުރައްވާނީ. އެއީ މިދިޔަ ތަނުގައި އެބޭފުޅުން މަސައްކަތް ކުރައްވާފައި އޮތް ގޮތް،" ނައިބު ރައީސް ވިދާޅުވިއެވެ.

ނައިބު ރައީސް އިތުރަށް ވިދާޅުވީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބޭއްވުމާ ގުޅޭގޮތުން އިދިކޮޅުން މީގެ ކުރިން ދައްކާފައިވާ ވާހަކަތަކަކީ ދިވެހިންގެ ހަނދާނުން ފިލައިގެންދާނެ ކަންކަން ނޫން ކަމަށެވެ. އެހެންކަމުން، އެފަދަ ބަޔަކު އިންތިޚާބުކޮށްފި ނަމަ ރަށްރަށަށް ތަރައްޤީ ގެނެވޭނެތޯ ރައްޔިތުން ވިސްނަންޖެހޭ ކަމަށް އެމަނިކުފާނު ވިދާޅުވިއެވެ. އަދި ޤައުމުގެ ހަމަޖެހުމަށް ރައީސް ނިންމަވާ ނިންމެވުންތަކަށް އިދިކޮޅުން ކުރަނީ "ޖެއްސުން" ކަމަށްވެސް ސިފަކުރެއްވިއެވެ.

އަންނަ މަހުގެ 4 ގައި ބޭއްވުމަށް ހަމަޖެހިފައިވާ އިންތިޙާބާ ދިމާކޮށް މުޒާހަރާ ކުރަން އުޅެނީ ޤައުމު ހަލަބޮލި ކުރުމުގެ ބޭނުމުގައި ކަމަށާއި، އެއީ ރައީސުލްޖުމްހޫރިއްޔާ ބޭނުންފުޅުވާ ގޮތް ނޫން ކަމަށް ނައިބު ރައީސް ވިދާޅުވިއެވެ. ސަރުކާރުގެ ސިޔާސަތުތައް ވަރަށް ސާފުކޮށް ބަޔާންކޮށްފައިވާނެ ކަމަށްވެސް އެމަނިކުފާނު ވިދާޅުވިއެވެ.

ވާހަކަފުޅު ނިންމަވާލައްވަމުން ނައިބު ރައީސް ވަނީ ކުރިއަށް އޮތް ލޯކަލް ކައުންސިލް އިންތިޚާބުގައި ސަރުކާރު ހިންގާ ޕީއެންސީގެ ކެންޑިޑޭޓުންނަށް ވޯޓު ދެއްވުމަށް ރައްޔިތުންގެ ކިބައިން އެދިވަޑައިގެންފައެވެ.