ސިފައިންގެ 72 ވަނަ އަސާސީ ތަމްރީނު ކޯސް އިފްތިތާޙްކޮށްފި

ދިވެހި ސިފައިންގެއާ އަލަށް ގުޅޭ މީހުން ތަމްރީނު ކުރުމަށް ބާއްވާ 72 ވަނަ އަސާސީ ތަމްރީނު ކޯސް ރަސްމީކޮށް އިފްތިތާޙްކޮށްފިއެވެ.

އެމްއެންޑީއެފް ސަދަން އޭރިއާ ކޮމާންޑުގައި މިއަދު ބޭއްވި މި ރަސްމިއްޔާތު ޝަރަފުވެރިކޮށްދެއްވީ ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒްގެ ކޮމާންޑިންގ އޮފިސަރ، ބްރިގޭޑިއަރ ޖެނެރަލް ޢަބްދުﷲ އިބްރާހީމްއެވެ.

މިފަހަރުގެ ކޯހުގައި ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް، ނޭޝަނަލް ސާރވިސްގެ ފުރަތަމަ ބުރުން ދަސްވެނިވެ ސިފައިންގެއަށް ވަނުމަށް ޝައުޤުވެރިކަން ފާޅުކުރި ކުދިން ހިމަނާފައިވާ ކަމަށް އެމްއެންޑީއެފުން މަޢުލޫމާތުދެއެވެ. ޖުމްލަ 146 ދަރިވަރުން ބައިވެރިވާ މި ކޯހުގައި 22 އަންހެން ސިފައިން ހިމެނެއެވެ.

ރަސްމިއްޔާތުގެ ޝަރަފުވެރި މެހުމާން ބްރިގޭޑިއަރ ޖެނެރަލް ޢަބްދުﷲ އިބްރާހީމް ވަނީ ކޯހުގެ ބައިވެރިންނާއި އިންސްޓްރަކްޓަރުންނާ ބައްދަލުކުރައްވައި ނަސޭހަތްތެރިވެ ވަޑައިގެންފައެވެ. އެމަނިކުފާނު ވަނީ "އަޚުލާޤު ރަނގަޅު ސިފަވަންތަ ބަޔަކަށް ވުމަށާއި، ކޯސް ކާމިޔާބުކަމާއެކު ނިންމުމަށް ހިތްވަރާއެކު މަސައްކަތް ކުރުމަށް" ދަރިވަރުންނަށް ބާރުއަޅުއްވާފައެވެ. މީގެ އިތުރުން ތަމްރީނުތައް ކުރިއަށްގެންދާއިރު ދަރިވަރުންގެ ރައްކާތެރިކަމަށް ޚާއްޞަ ސަމާލުކަމެއް ދިނުމަށް މުދައްރިބުންގެ ކިބައިން އެމަނިކުފާނު އެދިވަޑައިގެންނެވިއެވެ.

މި ރަސްމިއްޔާތުގައި ދަރިވަރުންނަށް އިޤުރާރު ލައިދިނުމާއި، މުދައްރިބުންގެ ވަޢުދު ކިޔައިދިނުން ކުރިއަށް ދިޔައެވެ. ރަސްމިއްޔާތުގައި ސަދަން އޭރިއާ ކޮމާންޑުގެ ކޮމާންޑަރ ކާނަލް މުޙައްމަދު ޖަމްޝާދާއި، ޑެޕިއުޓީ ކޮމާންޑަރ ލެފްޓިނެންޓް ކާނަލް މުޙައްމަދު ނިލާމްގެ އިތުރުން ކޮމާންޑް ސާޖަންޓް މޭޖަރ ނާޡިމް މުޙައްމަދާއި އެކި ރޭންކުތަކުގެ އޮފިސަރުން ބައިވެރިވެ ވަޑައިގެންނެވިއެވެ.

ސިފައިންގެ އަސާސީ ތަމްރީނު ކޯހަކީ، ސިފައިންގެއަށް ޝަރުތު ހަމަވާ، ޤައުމު ދެކެ ލޯބިވާ ކުޅަދާނަ ސިފައިންގެ މީހަކު އުފެއްދުމަށްޓަކައި ސިފައިންގެއާ އަލަށް ގުޅޭ ކޮންމެ މީހަކު ފުރިހަމަކުރުން މަޖުބޫރު ތަމްރީނެކެވެ.