އެފްޑީސީ ފްލެޓްތައް ކުއްޔަށް ދޭނަމަ 50،000 ރުފިޔާ އިން ޖޫރިމަނާކޮށް ފްލެޓް އަތުލަނީ

ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ ފްލެޓްތައް ތިންވަނަ ފަރާތަކަށް ކުއްޔަށް ދޭނަމަ، އެ ފަރާތްތައް ބައިލައްކަ ރުފިޔާއިން ޖޫރިމަނާކޮށް ފްލެޓް އަތުލާނެކަމުގެ އިންޒާރު އެ ކޯޕަރޭޝަނުން ދީފިއެވެ. މިއީ އިޖުތިމާޢީ ބޯހިޔާވަހިކަމުގެ ސިޔާސަތުގެ ދަށުން ދޫކޮށްފައިވާ ތަންތަން ނަހަމަ ގޮތުގައި ބޭނުންކުރުން ހުއްޓުވުމަށް އެޅި ފިޔަވަޅެކެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އަތްފޯރާ ފަށުގައި ދޫކޮށްފައިވާ މި 4،000 ފްލެޓަކީ ދެ ކޮޓަރި އާއި ތިން ކޮޓަރީގެ އެޕާޓްމެންޓްތަކެކެވެ. އެފްޑީސީން ބުނި ގޮތުގައި، މިފަދަ އިޖުތިމާއީ ބޯހިޔާވަހިކަމުގެ އެއްވެސް ތަނެއް ކުއްޔަށް ދީގެން އަމިއްލަ މަންފާއެއް ހާސިލުކުރުމަކީ ފްލެޓް ދޫކުރުމުގެ އެއްބަސްވުމާ ކަނޑައެޅިގެން ހިލާފު ކަމެކެވެ.

މި މައްސަލަ އަނެއްކާވެސް ފެންމަތިވެފައިވަނީ، އެފްޑީސީގެ ތިން ކޮޓަރީގެ އެޕާޓްމެންޓެއް 23،000 ރުފިޔާއަށް ކުއްޔަށް ދިނުމަށް މީހަކު ސޯޝަލް މީޑިއާގައި އިޝްތިހާރު ކުރުމާ ގުޅިގެންނެވެ. ސަރުކާރުން މި ފްލެޓްތަކަށް ކަނޑައަޅާފައިވާ މަހު ކުއްޔަކީ 11،500 ރުފިޔާ ކަމަށްވާއިރު، އެ ފަރާތުން ކުއްޔަށް ދޭން އުޅުނީ ސަރުކާރުގެ އަގަށްވުރެ ދެގުނަ ބޮޑު އަގުގައެވެ.

މިކަމާ ގުޅިގެން އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ، އެފްޑީސީގެ ފްލެޓްތަކަކީ ތިންވަނަ ފަރާތަކަށް ކުއްޔަށް ދެވޭނެ ތަންތަން ނޫން ކަމަށެވެ. އަދި މިފަދަ އަމަލުތައް ހިންގާ ފަރާތްތައް 50،000 ރުފިޔާއާ ހަމައަށް ޖޫރިމަނާކޮށް، ފްލެޓްގެ އެއްބަސްވުން އުވާލެވޭނެ ކަމަށް އޭނާ ވިދާޅުވިއެވެ.

ހަމްދާން އިތުރަށް ވިދާޅުވީ، އިޖުތިމާއީ ބޯހިޔާވަހިކަމަށް ދޫކޮށްފައިވާ ތަންތަން ބޭނުންކޮށްގެން ވިޔަފާރި އުސޫލުން ފައިދާ ހޯދުމަކީ ހުރިހާ ދިވެހީންގެ ހައްޤަށް އަރައިގަތުން ކަމަށެވެ. އަދި މިއީ ސަރުކާރުން ބޯހިޔާވަހިކަމުގެ ހައްޤު ކަށަވަރުކޮށްދިނުމަށް ކުރަމުންދާ މަސައްކަތްތަކަށް އެޅޭ ވަރަށް ބޮޑު ހުރަހެއް ކަމަށްވެސް އޭނާ ފާހަގަކުރެއްވިއެވެ.