ހުޅުމާލޭ ފުރަތަމަ ފިޔަވަހީގައި ހުންނަ ކެފޭއެއްގެ ބަދިގޭގައި އަލިފާނުގެ ޙާދިސާއެއް

ހުޅުމާލޭ ފުރަތަމަ ފިޔަވަހީގައި ހުންނަ ކެފޭއެއްގެ ބަދިގޭގައި އަލިފާނުގެ ޙާދިސާއެއް ހިނގައިފި އެވެ.

އެމްއެންޑީއެފުން ވިދާޅުވީ، ހުޅުމާލޭގެ ފޭސް 1 ގައި ހުންނަ "ކްލީން ޕްލޭޓް" ނަމަކަށް ކިޔާ ކެފޭގެ ބަދިގޭގައި ރޯވި އަލިފާން، އެމްއެންޑީއެފް މާލެ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަންގެ ފަޔަރ ފައިޓަރުން ނިއްވާލާފައިވާ ކަމަށެވެ.

އެމްއެންޑީއެފުން އިތުރަށް ވިދާޅުވީ، މި ހާދިސާގެ މަޢުލޫމާތު ރޭ މެންދަމު 02:20 ހާއިރު އެމްއެންޑީއެފް މާލެ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަނަށް ލިބުމާއެކު އެ ފަޔަރ ސްޓޭޝަނުގެ ފަޔަރފައިޓަރުން އެ ސަރަޙައްދަށް ގޮސްފައިވާ ކަމަށެވެ. އެގޮތުން، ފަޔަރފައިޓަރުން ކުރި މަސައްކަތުން އެ ކެފޭގެ ބަދިގޭގައި ރޯވެފައިވާ އަލިފާން ނިއްވާލެވުނީ ރޭ މެންދަމު 02:34 ހާއިރުކަމަށް އެމްއެންޑީއެފުން މަޢުލޫމާތުދެއެވެ.

މި ޙާދިސާގައި އަލިފާން ރޯވެފައިވަނީ ކެފޭގެ ބަދިގޭގައި ބޭނުންކުރަމުން އައި ގޭސްފުޅީގައި ކަމަށާއި، ކެފޭގެ ބަދިގޭގެ އެކި ބައިތަކަށް އެކިވަރުގެ ގެއްލުން ވެފައިވާކަމަށް އެމްއެންޑީއެފުން ވިދާޅުވިއެވެ.

މި ޙާދިސާގައި އެއްވެސް މީހަކަށް އަނިޔާއެއް ވިކަމުގެ ރިޕޯޓު ލިބިފައެއް ނުވެއެވެ.