އެއްވެސް ރަށެއް އުނިނުވާނެހެން ހުރިހާ ސަރަހައްދަކަށް މަސައްކަތް ވަނީ ރޭވިފައި: ވަޒީރު ޒަމީރު

ޕްރޮޖެކްޓު ލިސްޓުގައި އެއްވެސް ރަށެއް އުނިނުވާނެހެން ހިމަނައި، ހުރިހާ ސަރަހައްދަކަށް މަސައްކަތް ރޭވިފައި ވާނެ ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ. 

ވަޒީރު ޒަމީރު މިހެން ވިދާޅުވީ މިއަދު ރައްޔިތުންގެ މަޖިލީހުގައި މެމްބަރުންގެ ސުވާލުތަކަށް ޖަވާބުދެއްވުމަށް ވަޑައިގެން މަޖިލީހުގައި ވާހަކަފުޅު ދައްކަވަމުންނެވެ. 

ވަޒީރު ވިދާޅުވީ ޕީއެސްއައިޕީ ޕްރޮޖެކްޓް ލިސްޓުގައި ކުޑަ އަދަދެއް ޖެހުމުން އެ މަސައްކަތް ކުރިއަށް ނުދާކަން ފާހަގަވާކަމަށެވެ. އަދި ބަޖެޓުގައި މަޝްރޫޢު ހިންގުމަށް ފައިސާ ނެތިގެން ނުވަތަ ސަރުކާރުގެ ކޭޝް ފްލޯގައި މަޝްރޫއުތައް ހިންގޭނެ ފައިސާ ނެތިގެން މަޝްރޫޢުތައް މަޑުޖެހޭކަން ފާހަގަވެފައިވާ ކަމަށެވެ. 

އެގޮތުން، އެމްޓީސީސީއަށް ވެސް ކޮންމެ ދުވަހަކު ޕްރޮޖެކްޓެއް ހަވާލުކުރަމުންދިޔަ ތަން މީގެކުރިން ފެނިގެން ދިޔަ ކަމަށާއި، އެންމެ ފަހުން ނިމިގެން ދިޔައިރު އެކުންފުނީގެ ޕައިޕްލައިންގައި، 18 ބިލިއަން ރުފިޔާ ފައިނޭންސް ވެސް ކުރެވޭނެ ގޮތެއް ނެތި އެބަހުރިކަމަށެވެ.

 “އެ ހުރިހާ ކަމަކަށް ބަލާފައި މި ފަހަރުގެ ޕްރޮޖެކްޓައް އަޅުގަނޑުމެން ވިސްނާފައި އޮތީ ޕްރޮޖެކްޓްގެ ޕްރެޕެރެޓީ ފަންޑު އެލޮކޭޓްކޮށް ހަދާފައި ރައީސްގެ ޕްރިޔޯރިޓީ ލިސްޓުގެ ތެރެއިން ޕްރޮޖެކްޓަށް ކުރިއަށް ގެންދިއުމަށް." ވަޒީރު ޒަމީރު ވިދާޅުވިއެވެ.

ވަޒީރު ވިދާޅުވީ މިހާރު ގެންގުޅޭ ލިސްޓުގައި އެއްވެސް ރަށެއް އުނިވެފައި ނޯންނާނެ ކަމަށާއި ރާއްޖެ ހުރިހާ ރަށަކަށް ސިޓީތަކާއި މާލެ ސަރަހައްދި ހިމެނޭހެން މަސައްކަތްތައް އޮތީ ރޭވިފައި ކަމަށެވެ. އެ މަޝްރޫތައް އިޢުލާނު ކުރަމުން ގެންދާނީ ބަޖެޓް ސްޕޭސް ލިބިގެން ކުރިއަށް ގެންދެވޭ ގޮތަކަށް ކަމަށް ވިދާޅުވިއެވެ.